Sa Faia i Cebu le [Sauniga] o le Suatiaina o le Eleele mo Fale o le Malumalu Fou a Filipaina

Sa suatia e Elder Dallin H. Oaks o le Korama a Aposetolo e Toasefululua le eleele mo fale o le Malumalu o Cebu Filipaina, i Lahug, Aai o Cebu, i le aso 14 Novema, 2007.

I le taimi o le sauniga, sa saunoa Elder Oaks ua latou potopoto iina e le gata ina “ia faapaia le eleele i le Alii,” ae “ia tatalo … ina ia saunia i tatou lava mo faamanuiaga o le malumalu.”

I lana tatalo o le faapaiaga, sa talosagaina ai e Elder Oaks se faamanuiaga mo tagata Filipino ina ia ola i le filemu, lotogatasi, ma le manuia; mo le malumalu ina ia fausia e aunoa ma se ponatia; ma tagata ina ia lagonaina le paia o le fale.

Pe tusa ma le 400 tagata o le ekalesia, e aofia ai au peresitene o siteki ma itu, epikopo, ma peresitene o paranesi, au peresitene o ausilali a siteki o siteki e fitu e latalata ane ma itu, o peresitene o misiona e ono i le itulagi e i ai le Malumalu fou o Cebu Filipaina, ma taitai o nuu ma alaalafaga, sa potopoto i lenei sauniga faale-talafaasolopito.

Sa auai foi Elder Quentin L. Cook o le Korama a Aposetolo e Toasefululua; Elder Keith R. Edwards, Peresitene o le Eria a Filipaina; ma ona fesoasoani, o Elder Won Yong Ko ma Elder Michael J. Teh o le Au Fitugafulu.

I le luasefulutolu tausaga talu ona fausia le uluai malumalu i Filipaina, sa ta’ua ai e Peresitene Anthony John Balledos o le Siteki a le Aai o Cebu Filipaina i lana tatalo, le agaga faafetai o le Au Paia Filipino, ona o le a fausia se malumalu lona lua i Filipaina i Cebu, e tautuaina ai tagata o le au paia i vaega tutotonu ma saute o le Atu Filipaina.

I le afiafi, ina ua maea le suatiaina o le eleele, sa faia e Elder Oaks se faigalotu ma le silia ma le 3,000 tagata o le Au Paia, ma sa ia fautuaina ai i latou ina ia sauniuni mo le malumalu e ala i le atiina ae o “amio paia.” Fai mai a ia, o amio paia e fesoasoani tatou te “sauniuni ai e tali atu i fesili o le a fesiligia ai i tatou e le Alii” i le faamasinoga mulimuli. O ia amio e aofia ai tatalo faaletagata lava ia ma le aiga, faitauina o tusitusiga paia, ma le taumafa i le faamanatuga i Aso Sa taitasi.

O fale o le Malumalu o Cebu Filipaina, lea e i se eria e silia ma le valu eka [4.7 hectares], o le a aofia ai fale mo tagata e autovaa mai i le malumalu, o se falelotu, fale mo peresitene o le malumalu ma le misiona, ma se ofisa o le misiona. O le malumalu lava ia o le a faaaoga ai se vaega e 2,391 sikuea mita.

O le Malumalu o Cebu Filipaina, o le 132 a’i lea o malumalu o le Ekalesia ua fofogaina mai, faaaoga, po o fausiaina foi.