Savali a le Au Peresitene Sili
O Oa e Faavavau Lona Taua
A o ou tamaitiiti, sa ou fiafia lava e faitau le tusi O Le Motu o Oloa, sa tusia e Robert Louis Stevenson. Sa ou matamata foi i ni tifaga o le faiga po o le sailiga e tofu ai ni tagata se toatele ma se fasi faafanua ua matafi, e tatai atu ai i se oa natia pe afai e mafai ona maua ma tuufaatasia uma ia fasi faafanua.
Ou te manatua le faalogologo i se polokalama e 15 minute o le leitio i afiafi taitasi o le vaiaso—o le Jack Armstrong, o le Faataitaiga Sili o Tama Amerika. A o amataina, e sau mai le leitio se leo e tumu i mea faalilolilo: “Tatou o atu nei ma Jack ma Betty i le faitotoa faalilolilo manaia agai i le nofoaga o loo tanu ai elefane, i le mea o loo natia ai le oa. Ae faatali; o loo faatali mai i le ala tulaga matautia.” E leai se mea e mafai ona taofia au mai lo’u faalogologo i lenei polokalama. Se pei lava o au la e taitaia le sailiga o le oa taua o alei.
E i ai se isi taimi i se nofoaga e ese mai, sa fetalai ai le Faaola o le lalolagi e uiga i oa. I Lana Lauga i luga o le Mauga, sa Ia fetalai mai ai:
“Aua tou te toloai oa mo outou i le lalolagi, o i ai le mogamoga ma le ele e faaumatia ai, o i ai foi tagata gaoi e eli atu, ma gaoi ai:
“A ia outou toloai oa mo outou i le lagi, e le o i ai se mogamoga, po o se ele e faaumatia ai, e le o i ai foi tagata gaoi e eli atu, ma gaoi ai:
“Aua o le mea ua i ai lo outou oa, e i ai atoa foi ma o outou loto.”1
O le taui na folafola mai, e le o se oa o alei, auro po o ario. E le o i ai foi se fanua e fia ni eka po o se teugatupe faaagaga. Sa fetalai le Matai e uiga i oa e mafai e soo se tagata ona maua—o le olioli e le mafaamatalatalaina iinei ma le fiafia e faavavau pe a mavae le oti.
Ua ou filifili e avatu ia a’u fasi faafanua e tolu e taialaina ai oe i lou fiafia e faavavau. O ia fasi faafanua o:
-
Aoao mai i mea ua tuanai.
-
Sauniuni mo le lumanai.
-
Ola i le taimi nei.
Sei o tatou auiliiliina vaega taitasi o le faafanua.
Aoao mai i mea ua Tuanai
E tofu i tatou ma se talatuu—pe mai augatuaa paionia, na liliu mulimuli ane po o nisi foi na fesoasoani e faatulaga lelei o tatou olaga. O lenei talatuu e maua mai ai se faavae e fausia i osigataulaga ma le faatuatua. O tatou, ua maua le avanoa ma le matafaioi e fausia ai i luga o faavae pito i lalo ua matua malolosi ma mausali.
E i ai se tala na tusia e Karen Nolen, lea sa faasalalauina i le New Era i le 1974, o loo faamatala ai se tagata e igoa ia Benjamin Landart, o le sa 15 ona tausaga i le 1888, ma o se ta vaiolini maoae. O le nofo ai o ia ma lona tina ma ona uso ma tuafafine i se faatoaga i Iuta i matu, sa avea o se luitau i nisi taimi ia Benjamin, ona e le tele ai sona taimi e ta ai lana vaiolini e pei ona manao ai. O nisi taimi e loka ai e lona tina le vaiolini seiloga ua uma ona fai ana feau i le faatoaga, aua e matua tofotofoina lava Benjamin e ta ae le faia ana feau.
I le tau faaiuiuga o le 1892 sa talosagaina ai Benjamin e malaga atu i Sate Leki e faataitai ona tata pe pasia mo le faili aloaia a le teritori. Na manatu o ia, o se miti lena ua avea ma mea moni. Ina ua mavae le tele o vaiaso o aoao ma tatalo, sa alu o ia i Sate Leki i le masina o Mati i le 1893 mo le faataitaiga ua leva ona faatalitali i ai. Ina ua faalogo Mr. Dean, o le taitai faili, o tata Benjamin, sa ia fai atu loa ia Benjamin, o ia o se ta vaiolini aupito sili ona lelei ua faalogo ai i sisifo o Denver. Sa faatonuina Benjamin e malaga atu i Denver mo faataitaiga i le taimi o le tautoulu, ma sa ia iloa ai foi o le a lava se tupe na te maua e tausia ai ia lava, ma sina tupe foi e totoe e lafo mai i lona aiga.
Ina ua mavae se vaiaso talu ona ia maua le tala fiafia, sa aami atu o ia e le epikopo i lona ofisa, ma sa fesili atu i ai pe le mafai ona faataatia ese lana tata i le faili mo ni tausaga se lua. Sa tau atu e le epikopo ia Benjamin, a o lei amata sailia ana tupe o loo i ai se mea o loo nofo aitalafu ai i le Alii. Ona ia talosagaina lea o Benjamin e na te talia se valaauga i le misiona.
Sa lagona e Benjamin o le lafoaia o lona avanoa e tata ai i le au faaili a le teritori, o se mea e toetoe lava ina le mafai ona ia onosaia, ae sa ia iloaina foi lana faaiuga e tatau ona fai. Sa ia folafola atu i le epikopo, afai e i ai lava se isi auala e mafai ai ona maua se tupe mo ia e auauna atu ai, o le a ia taliaina le valaau.
Ina ua faamatala atu e Benjamin le valaau i lona tina, sa matua sili lona fiafia. Sa ia fai atu ia te ia, sa manao lava lona tama e faamisiona ae na fasiotia o ia a o lei maua sona avanoa. Peitai, ina ua la talanoaina le faatupeina o le misiona, sa nenefu foliga o lona tina. Sa tau atu i ai e Benjamin, o le a na le faatagaina lava o ia e toe faatau atu se vaega o lo latou fanua. Sa pulatoa atu le tina i mata o lana tama mo sina taimi ona faapea atu lea, “Ben, e i ai se auala e mafai ona maua ai le tupe. O le aiga lenei o loo [i ai] se mea se tasi e matua tele sona tau e auina atu ai oe i lau misiona. E tatau ona faatau atu lau vaiolini.”
Ina ua mavae aso e ono, i le aso 23 o Mati, 1893, sa tusia ai e Benjamin i lana tusi faamaumau: “Sa ou ala ae i le taeao nei ma aveese mai lau vaiolini i lona ato. Sa ou tataina le pese sa ou fiafia i ai, i le aso atoa. I le afiafi ina ua pogipogi ma ua le mafai ona ou toe taina, sa ou teuina loa i lona ato. Ua lava lea. O a taeao ou te tuua ai [mo lau misiona].”
Ina ua mavae tausaga e fasefululima, i le aso 23 o Iuni, 1938, sa tusia ai e Benjamin i lana tusi talaaga: “O le faaiuga aupito sili ua ou faia i lou olaga, o le lafoai atu lea o se mea sa ou faapelepele i ai, i le Atua e sili atu ona ou alofa i ai. Na te lei faagaloina lava au ona o lena osigataulaga.”2
Aoao mai i mea ua tuanai.
Sauniuni mo le Lumanai
O loo tatou ola i se lalolagi fesuisuiai. Toetoe o vaega uma o o tatou olaga ua fetuunaia e tekinolosi. E tatau ona tatou gafataulimaina nei tulaga auiluma—e oo lava i nei suiga lofituina—i se lalolagi e lei moemiti i ai o tatou augatama.
Manatua le folafolaga a le Alii: “Afai ua saunia outou, o le a outou le matatau ai lava.”3 O le matau po o le fefe o se fili faaumatia lea o le alualu i luma.
E tatau ona sauniuni ma fuafua, ina ia aua nei maimauina o tatou olaga i mea e le aoga. A leai se sini, e le mafai ona i ai se manuia moni. O se tasi o faauigaga sili o le manuia ua ou faalogo i ai e tau faapea lona faaupuga: O le manuia o le faataunuuina auauai o se manatu lelei atoatoa aoga. Fai mai se isi tagata, o le faalavelave o le leai o se sini, e mafai ona faaaluina lou olaga atoa e te tamoe ai mai le isi itu o le malae i le isi itu, ae e te le oo lava i le tini.
I le tele o tausaga ua mavae, sa i ai se pese fatu e i ai upu nei, “O le moomoo e mafai ai o lea / Ia tau lava ina moomoo ai pea/ ona e le toe popole lea.”4 Ou te fia fai atu iinei i le taimi nei, o le moomoo e le aveesea ai le sauniuni lelei e fetaiai ma fitaituga o le olaga. O le sauniuni e faigata, ae e matua taua lava mo lo tatou alualu i luma.
O la tatou faigamalaga i le lumanai, o le a le o se alatanu lamolemole e alu atu iinei e tau i le faavavau. Ae, o le a i ai vaeluaga o magaala ma pioga o le auala, ou te le i taua foi patupatu e le manaomia. E ao ina tatou tatalo i aso taitasi i se Tama Faalelagi e alofa, ma e finagalo ina ia manuia o tatou olaga taitoatasi.
Sauniuni mo le lumanai.
Ola i le Taimi Nei
O nisi taimi e alu ai le tele o taimi o le aso tatou te mafaufau ai i le lumanai. O le faasolo o mafaufauga i aso ua tuanai ma le moomoo mo le lumanai, e ono maua ai se nofogofie, ae o le a le suitulaga ai le ola ai i le taimi nei. O le aso lenei o lo tatou avanoa, ma e tatau ona tatou pue maia.
Sa lapatai mai Polofesa Harold Hill, i le tala faamusika a Meredith Willson The Music Man, “Afai e na o lou mafaufau lava i le lumanai [ae le faia mea e tatau ona fai i le aso], o le a e iloa i le lumanai e leai sau mea na faia ananafi.”
O le a leai se taeao e manatua pe afai tatou te le faia se mea i le aso, ma ina ia ola atoatoa i le aso, e tatau ona tatou faia le mea e sili ona taua. Ia aua nei o tatou faatuutuu i mea e sili ona taua.
Ou te manatua sa ou faitau i se tala i se tagata ina ua faatoa mavae le maliu o lona faletua, sa ia tatalaina le pusatoso o lana pusatu ma maua ai ofu sa ia faatauina ina ua la asiasi atu i le vaega i sasae o le Iunaite Setete i le iva tausaga ua tuanai. Na te lei ofuina lava, ae sa ia teuina mo se aso faapitoa. O lea la, o le a le oo mai lava lena aso.
Ina ua faamatala atu lena mea i se uo, na faapea atu le tane a lē ua maliu, “Aua nei teuina se mea mo na o se aso faapitoa. O aso taitasi uma o lou olaga, o se aso faapitoa.”
Na fai mai lena uo i se taimi mulimuli ane, o na upu na suia ai lona olaga. Sa fesoasoani ai ia te ia e tuu lona tolopoina o mea e aupito sili ona taua ia te ia. Fai mai a ia: “O lea ua tele lo’u taimi e faaalu i lo’u aiga. Ua ou faaaogaina ipu malamalama i aso uma. O le a ou ofu fou foi ou te alu ai i le faleoloa pe a ou manao ai. Ua le toe i ai ni upu ‘e i ai se aso’ ma le ‘i se aso’ i lau utuvagana. Ua ou faaaluina foi se taimi e telefoni ai i ou aiga ma uo mamae. Ua ou telefoni foi i uo ua leva e faalelei ni feupuaiga i aso ua mavae. Ua ou tau atu i tagata o lo’u aiga ou te alofa tele ia te i latou. Ua ou taumafai e aua nei faatuai pe tolo se mea e mafai ona talie ma fiafia ai o matou olaga. Ma o taeao taitasi, ou te faapea ifo ai ia te au lava, e mafai ona avea lenei aso ma aso faapitoa. O aso taitasi, o itula taitasi, o minute taitasi, e faapitoa.”
Sa faamatalaina e Arthur Gordon i le tele o tausaga ua mavae i se mekasini a le atunuu le faataitaiga matagofie o lenei tofamanino. Na ia tusia:
“Ina ua tusa ua sefulutolu ou tausaga ae sefulu lou uso, sa folafola mai e lou Tama na te aveina i maua i le faafiafiaga felanulanuai. Ae ina ua oo i le taimi o le taumafataga i le aoauli, sa i ai se telefoni; o se mataupu faapisinisi na matua manaomia vave ai o ia i le taulaga. Sa ma nofo sauniuni o se tala e le fiafia ai. Ona ma faalogo atu lea o faapea lana tala [i le telefoni], ‘Leai, ou te le alu atu. Fai i ai e faatali.’
“Ina ua toe sau o ia i le laulau, sa ataata Tina. ‘E te iloa oe, e toe sau foi ma toe sau ia faafiafiaga felanulanuai.’
“‘Ou te iloa,’ o le tala lea a Tama. ‘Ae e le toe foi mai le olaga faatamaitiiti.’5
Sa faamatala e Elder Monte J. Brough, sa avea ma se Fitugafulu, se taumafanafana i lona aiga i Randolph, Iuta, a o laitiiti, sa tonu ia te ia ma lona uso laitiiti o Max la te fausia se fale i luga o se laau tele i tua o le latou fale. Sa la faia ni fuafuaga mo se fausaga aupito matagofie i o laua olaga. Sa la faaputuputuina ni laupapa mai lo latou pitonuu ma la’u i luga o le vaega o le laau, e i ai ni lala se lua e manaia mo le fau ai o le fale. Sa faigata ma sa la naunau lava e faauma le galuega. O le ata faalemafaufau o le fale ua maea i luga o le laau, sa maua ai se uunaiga tele mo i laua e faauma le la galuega.
Sa la galulue i le taumafanafana atoa, ma na iu ina maea i le tautoulu a o lei amataina le aoga mo le tausaga fou. Sa saunoa Elder Brough, o le a le galo lava ia te ia le lagona o le olioli ma le lotomalie na la maua ina ua mafai ona la olioli i fua o a laua galuega. Sa la nofonofo i lo la fale i luga o le laau, ma tilotilo solo mo ni nai minute, ona o ifo lea i lalo o le laau—ma e lei toe foi lava i ai. Sa le mafai e le galuega ua maea, tusa lava po o le a lona matagofie, ona faatumauina lo la naunau i ai mo se aso se tasi. A tuu i se isi faaupuga, o le faagasologa o le fuafuaina, faaputuputu, fauga, ma le galulue—ae e le o le galuega ua maea—sa maua ai le lotomalie tumau ma le fiafia sa la oo i ai.
Ia tatou olioli i le olaga a o tatou ola ai, ma ia faapei o Elder Brough ma lona uso o Max, na la maua le olioli i la laua malaga fai o le olaga.
Aua Nei Tolopoina
O le faaupuga tuai “Aua lava e te tuua mo taeao le mea e mafai ona fai i le aso” e matua taua tele, pe a oo ina faaali lo tatou alolofa ma le faanaunauga—i upu ma faatinoga—i tagata o o tatou aiga ma uo. Fai mai le tusitala o Harriet Beecher Stowe, “O loimata e aupito oona e maligi i luga o tuugamau, o upu ia e lei mafai ona fai atu ma galuega e lei faatinoina.”6
Sa tusia e se fatusolo se solo e faatatau i le faanoanoa ona o avanoa e le toe maua. Ou te faitauina na o se vaega:
E i ai sau uo e le mamao atu,
I lenei aai tele e leai sona iuga;
Ae e mavae atu aso, o vaiaso foi ua mou atu,
Ma e tei lava, ua uma foi le tausaga.
Ae ou te lei vaai lava i foliga o lau uo,
Aua o le olaga o se tuuga saosaoa ma le faigata… .
Ae e oo mai taeao—ma toe mou atu,
E tupu pea foi lo maua vavamamao i ona talaatu.
E latalata mai!—ae va i maila… .
“Le feau faauaealesi lea, alii… .”
“Na maliu Simi i le asō.”
Ma o le mea lena tatou te maua i le iuga:
E latalata mai, a ua mou atu se uo.7
Ina ia ogatasi ma le agaga o le savali i lena fuaiupu, sa ou manao ai i ni tausaga ua mavae, o le a ou le toe faatali lava i sa’u asiasiga i se uo pele ua tele tausaga ou te le i toe vaai i ai. Sa ou manao ou te asiasi i ai i Kalefonia ae le i faia lava.
Sa ma feiloai ma Bob Biggers a o ma i ai i le Vaega e vaaia le faafaigaluegaina o tagata o le Nofoaga Autu e Aoao ai le Fuavaa a le Iunaite Setete i San Diego, Kalefonia, i le taulalata i le iuga o le Taua Lona Lua a le Lalolagi. Sa ma uo lelei lava mai le amataga. Sa asiasi mai o ia i Sate Leki a o lei faaipoipo, ona faatumauina ai lava lea o le ma faigauo i fetusiaiga mai le taimi sa faamalolo ai au mai le Neivi i le 1946. Ma te auina atu ma lou toalua o Frances, ia Bob ma lona toalua o Grace ni faamanuiaga o Kerisimasi i tausaga taitasi.
Mulimuli ane, i le amataga o Ianuari i le 2002, sa faatulagaina ai sau asiasiga i le konafesi faalesiteki, i Whittier, Kalefonia, i le mea e nofo ai le au Biggers. Sa ou telefoni i lau uo o Bob, ua 80 nei ona tausaga, ma sa fuafua ai ma te asiasi atu ma Frances ia i laua ma Grace, ina ia mafai ona matou toe talanoa ma mafaufau i aso ua mavae.
Sa matagofie le matou talanoaga. Sa ou aveina ni ata na pue i le taimi na ma faatasi ai i le Neivi i le 55 tausaga talu ai. Sa ma faasinosino i tagata sa ma iloaina ma taufai faamatala mea o i ai pe ua oo foi i ai, i le mea sili na ma iloa. E ui lava e le o ia o se tagata o la tatou Ekalesia, ae sa manatua e Bob le taimi na ma o ai i le sauniga faamanatuga i na tausaga uumi ua mavae, ina ua tuu i maua i San Diego.
Ina ua ma faatofa atu ma Frances ia Bob ma Grace, sa ou maua se lagona lofituina o le filemu ma le olioli ina ua mafai ona faataunuu se taumafaiga e toe vaai tasi i se uo sa ou alofa i ai i le tele o tausaga.
E i ai se aso, o le a taitasi ai i tatou ma le toe i ai se taeao. Aua nei o tatou toe tolopoina le mea e aupito sili ona taua.
Ola i le taimi nei.
O lea ua mae’a nei lau faafanua mo le oa: Aoao mai i mea ua tuanai. Sauniuni mo le lumanai. Ola i le taimi nei.
Ou te toe faaiu atu i le mea na ou amata ai. Ua fetalai mai lo tatou Alii ma le Faaola:
“Aua tou te toloai oa mo outou i le lalolagi, o i ai le mogamoga ma le ele e faaumatia ai, o i ai foi tagata gaoi e eli atu, ma gaoi ai:
“A ia outou toloai oa mo outou i le lagi, e le o i ai se mogamoga, po o se ele e faaumatia ai, e le o i ai foi tagata gaoi e eli atu, ma gaoi ai:
“Aua o le mea ua i ai lo outou oa, e i ai atoa foi ma o outou loto.”8