E Ala i ni Vaaiga Fou
“Ua mataga ou foliga,” o la’u tala lea, ma faataupupula atu i le faata ma le le talitonu.
Na toe faataupupula mai ia te au le mata taumatau lava lenei e pei ona masani ai. Ae peitai, o le ufiina o lou mata agavale o le mata uliuli aupito leaga lea na ou vaai i ai.
“Ae, e le o leaga tele,” o le tala faaletalitonu lea a lau uo o Emelia.
Na faasesepa atu i ai lou mata lelei ma toe tuu le pepa aisa i lou mata.
Na o le lima minute ua te’a talu ona tau faafuasei le ogalima o lau uo o Iana i lou mata agavale. Sa vave lava ona tuu ou lima i ou foliga, ma ou taumafai ia aua nei ou pau. Sa faatoese mai Iana. Sa ou faalogo ane ua siosio au e au uo e fia iloa pe o ou lavea.
E ui ina sa tiga, ae ou te lei iloa le mea tonu na tupu pe ana le aveesea ou lima ma faalogo atu i le tau momole o tagata uma sa i totonu o le potu.
“O le a?” na ou fesili ai. E leai se isi na tali mai.
Sa ou tamoe loa i le faata. Na o ni nai sekone na tupu ai, ae ua fufula atoa lou mata pei ua faafaina lona tele masani. Sa mumu totototo le vaega na totolia.
“O le a faafefea nei ona ou faasaga atu i tagata?” O lau tala lea, ma toso mai le pepa aisa mai le lima o Iana. Sa u lona laugutu ma faatoese mai pe a ma le faaselau ai lea. Sa ou tuuina le pepa aisa i lou mata, ma le faamoemoe e oo atu i le taeao e sosoo ai ua aluese le totolia.
O le mea e faanoanoa ai, e ui ina sa maui isi itu sa fula ma ua le mumu foi i le taeao na sosoo ai, ae na fufula le mea sa totolia ma sui ai le lanu i se lanu paauli malosi. Na auleaga ou foliga, ma ua auleaga atili ai la’u faalogona.
Sa ou taumafai e vali o’u mata e ufiufi ai, ae na atili ai le malosi o le lanu efuefu. Ma sa leai se mea na fesoasoani i le fufula. Na iu lava ina fai lou pulou ina ia faigata ai ona iloa.
O lena aso i le aoga, na ou lagonaina e pei na faataupupula mai uma tagata ia te au. Na ou musu ou te tilotilo sao i se tagata. Sa le mafai ona ou mafaufau i se isi mea mo ni aso, e ui lava i taumafaiga a au uo e faafiafia au.
I le Aso Sa sa ou le fiafia ona sa le mafai ona fai lou pulou i le lotu. Ae, na suia ia mea uma i le taimi o le lesona a le Aoga Sa.
“Tatalo ina ia e vaai ia te oe lava e pei ona silasila o Ia ia te oe,” o le tala lea a le faiaoga, sa talanoa mai e uiga i le Togiola ma le taua o le tagata lava ia.
Sa ou tagotago atu i ou manua, ma mafaufau ia te au lava, “Na te vaaia au o se teine ma se mata uliuli mataga.” Ma, ina ua tuu lou faanoanoa mo au lava, na suia lau vaaiga, ma ou manatunatu ai, “O le a se vaaiga a le Tama Faalelagi ia te au?”
Sa ou tagi a o ou tomanatu i Lona alofa e le gata i isi faapea foi au. Sa ou iloaina, “Na te silasila mai ia te au o Lona afafine, o le na tatau ai mo le soifua o Lona Alo.”
Sa ou lagonaina le molimau mai o le Agaga i le taua tele o lou tagata i le avea ai o se afafine o le Atua. Sa ou manatuaina se mau sa ou aoaoina i le seminare. Sa ou susueina au tusitusiga paia ma maua ai i le 1 Samuelu 16:7: “Aua e te vaai i lona tino, po o le maualuga o lona tino; … aua e le vaai Ieova pei o le vaai o tagata; aua e vaai tagata i le tino, ae vaai Ieova i le loto.” O ou foliga i fafo sa le pei le taua o lou tagata i totonu.
Sa toe sui lou mafaufau ina ua ou vaavaai atu faataamilo i le potu ma lagonaina ai se alofa tele mo tagata na ou vaaia o siomia au. Na faatumulia au i le mafanafana o le alofa o le Tama Faalelagi, ma mo sina taimi, ou te manatu sa ou vaai ai i tamaiti o lau vasega, i se itu itiiti, e pei ona vaai ai le Tama Faalelagi ia i latou—o Ana fanau.
Sa ou lagona le filemu ma le mafanafana i taimi uma na totoe o le aso Sapati, ua ou le toe popole nei i manatu o isi tagata. Sa ou alofa ia i latou, ma tilotilo sa’o atu ia i latou uma—i ou mata e lua.