Faia o ni Uo
Tu Maualuga
O TAMAITI I LE LALOLAGI ATOA E TATALO, USUINA PESE A LE PERAIMERI, MA AOAO E UIGA I LE TALALELEI—E PEI LAVA O OE! O LE MASINA LENEI SEI O TATOU FEILOAI ATU IA JUDY MA CHRISTOPHER SERENI O CALCI, ITALIA.
I Italia o loo i ai se falelogo e pi’o. Sa masani ona faapea tagata, na fuafua lava e le tusiata o le seneturi lona 12 ina ia pi’o le falelogo, ae peitai, na maua e saienitisi sa fuafua lava e tatau ona tu sa’o. O le eleele i lalo ifo o le Falelogo Pi’o i Pisa e le iloa e se tasi lona fegasoloai, ma o le vai e faaputuputu ai i lalo ifo o le faavae, e siisii ma pau foi i lalo e faalagolago lava i le vaitau. Mo le 200 tausaga na taumafai ai tagata faufale e taofi le pi’o o le falelogo, ae e tasi le mea moni na faigata ai: o le faavae o le falelogo e femeia’i solo pe a minoi le eleele lē mautu.
I Calci, o se taulaga e i tua mai lava o Pisa, e le o tutu ai Judy ma Christopher Sereni o le Paranesi a Pisa i ni eleele maluelue. Ua la fausia se faavae malosi e faavae i luga o le talalelei, o lo laua alolofa o le tasi i le isi, ma lo laua alolofa mo lo laua aiga.
Mea e Fiafia i Ai
Judy, 11 tausaga le matua
Meaai: vine
Mataupu faaleaoaoga: talafaasolopito
Gaoioiga faaleaiga: taaalo faatasi i taaloga
Taaloga: volipolo
Manao e asiasi: i le malumalu
Christopher, 8 tausaga le matua
Meaai: gelato (aisakulimi Italia)
Mataupu faaleaoaoga: tala, tusi, solo ma fatuga.
Gaoioiga faaleaiga: taaalo i taaloga vitio ma Tama
Taaloga: soka
Nofoaga e asiasi i ai: o le sami
Pe a Matutua i Laua
E manao Judy e avea ma se teine e faatinoina ata po o se teine pese.
E manao Christopher e tietie i se pasika ma taalo soka.
O Le Malosi o le Auauna Atu
O le mea e tasi o loo faatumauina ai le tutu malosi o le aiga o Sereni i le talalelei o a latou feagaiga o le papatisoga. E le’i leva atu ona papatiso ma faamauina Christopher, ma o le mea na atili ai le faapitoa ona o le “pepese faatasi o lo’u tama ma sana uo,” o lana tala lea.
O le taimi nei o loo galulue ia Christopher ma Judy i le tausiga o a laua feagaiga o le papatisoga i taimi uma ma le faia o mea e finagalo Iesu Keriso la te faia. “A i ai ni au uo e pagatia, ou te taumafai e fesoasoani i ai,” o le tala lea a Christopher. E fiafia foi Judy e auauna atu: “Ou te fesoasoani i le fale. Ou te fesoasoani ia Christopher i ana meaaoga, ma ou te auauna atu foi i au uo.”
Na faaopoopo mai Tama, “A faatonuina i laua e seti le laulau pe fufulu ipu pe a uma ona aai, e naunau lava i laua [e fai]. O lo laua lava lotomalie, la te fesoasoani mai ai.”
O Se Faataitaiga Mausali
E le toatele ni tagata o le Ekalesia i Calci, ae e le o se faafitauli lena mea ia Judy. E tumau pea le le maluelue o lona faavae o le talalelei. “E toalua ni au uo na fesili mai e uiga i le Ekalesia,” na ia fai mai ai. “Na ou aumaia se uo i le lotu, ma sa fiafia i ai. O nisi taimi e taufaalili mai ai ni uo ia te au, pe faalogo foi se tasi o le vasega e ese le lotu ou te alu i ai. Ae o le tele lava, e malamalama lava au uo, ma latou te fai mai ai ni fesili.”
Manatu o Tama
“O Judy e pei lava o se tina ma e ese le agaga fesoasoani ma taumafai ia mautinoa ua tausia lelei tagata uma. O Christopher e lotoalofa ma agalelei. E ese lo laua fiafia. E moni lava e i ai nai feupuaiga laiti i le aiga e tutupu i le va o le tuagane ma le tuafafine, ae e fiafia lava i laua, o le mea taua lena.”
Faavae Faaleagaga
O le faavae faaleagaga o tamaiti e faamalosia e ala i le auai i le Peraimeri. E fiafia Judy e faitau se mau pe a tu i le pulelaa, ma e fiafia uma i laua e pepese. O le pese e fiafia lava i ai Christopher o le “O Au o se Atalii o le Atua.”1 O lagona lelei la te maua i le lotu e faaauau atu lava i lo latou fale. “Ou te lagona le Agaga i le taimi o tatalo faaleaiga,” o le tala lea a Christopher, ma e ‘au foi i ai Judy.
O aso nei o loo galulue saienitisi ina ia faamautu atili le Falelogo Pi’o. Fai mai i latou, o le a lelei mo se isi 300 tausaga pe a. O le mea e laki ai, ua fausia e Judy ma Christopher o laua olaga i luga o se faavae mautu, o le faavae lea o le a lagolagoina i laua e oo i le faavavau.