Savali a Faiaoga Asiasi

O Le faaipoipoga i le va o se Alii ma se Tamaitai Ua Faauuina e le Atua

Ia aoao atu mau ma faamatalaga e fetaui ma manaoga o uso o loo e asia. Ia molimau atu e uiga i le aoaoga faavae. Ia valaaulia i latou o loo e aoaoina e faasoa mai mea ua latou lagonaina ma aoaoina.

Aisea ua Faauuina ai e le Atua le Faaipoipoga i le va o se Alii ma se Tamaitai?

MFF 49:16–17: “Ia avea i laua ma tino e tasi, ina ia faataunuuina ai e le lalolagi i nei mea uma le iuga o lona foafoaga.”

Julie B. Beck, peresitene aoao o le Aualofa: “Tatou te talitonu i le faatulagaina o aiga e faavavau. O lona uiga, ua tatou talitonu e tatau ona faaipoipo… . Ua tatou iloa i le taua tele i le muai olaga, sa tatou ‘au ai ma lo tatou Faaola, o Iesu Keriso, e puipui lo tatou tulaga gafatia e avea o ni aiga e faavavau” (“O Le Mea Sili e Faia e Tamaitai o le Au Paia o Aso e Gata Ai: Tutu Malosi ma le Mausali,” Liahona, Nov. 2007, 110).

Elder David A. Bednar o le Korama a Aposetolo e Toasefululua: “E lua ni mafuaaga faavae malolosi e fesoasoani ai ia tatou malamalama i le mafuaaga ua taua ai le faaipoipoga faavavau i le fuafuaga a le Tama.

“Mafuaaga 1: O natura o le agaga tane ma le fafine e atoa ai ma faaatoatoaina e le tasi le isi, ma o le mea foi lea ua faamoemoe ai i alii ma tamaitai ina ia agai faatasi atu i luma i le faaeaga… .

“Mafuaaga 2: O le mamanu paia, e manaomia ai se tane ma se fafine e aumaia fanau i le lalolagi ma saunia se nofoaga sili mo le tausiaina ma le faafaileleina o le fanau… .

“I le avea ai o ni alii ma tamaitai, o tane ma ava, ma taitai o le Ekalesia, o se tasi o o tatou tiutetauave e aupito sili ona taua, o le fesoasoani lea i alii ma tamaitai talavou ia latou aoao ma sauniuni mo se faaipoipoga amiotonu e ala i a tatou faataitaiga patino. A o matauina e alii ma tamaitai talavou le agavaa, faamaoni, ositaulaga, ma le faamamaluina o feagaiga i a tatou faaipoipoga, ona saili foi lea o na talavou e faataitai i na lava mataupu faavae… . A o tatou mafaufau i le taua o la tatou faataitaiga patino, pe o tatou vaaitino ea i ni itu e manaomia lo tatou faaleleia?” (“E Taua le Faaipoipoga i Lana Fuafuaga e Faavavau,” Liahona, Iuni 2006, 51–52, 54).

O Le A La’u Matafaioi Ona Ua Ou Iloa o le Faaipoipoga Ua Faauuina e le Atua?

Elder Russell M. Nelson o le Korama a Aposetolo e Toasefululua: “Sei o tatou mafaufau … o faatinoga patino e faamalosia ai se faaipoipoga… .

“Ia talisapaia… . Vaavaai atu mo le lelei o le tasi ma le isi ma tuuina atu le faamalo faamaoni o le tasi i le isi… .

“Fautuaga numera lua—ia fesootai… . E manaomia e ulugalii se taimi patino e matau ai, e talanoa ai, ma matuai faalogo atu le tasi i le isi. E manaomia lo la galulue faatasi—fesoasoani le tasi i le isi o se paaga tutusa… .

“O lau fautuaga lona tolu o le, ia manatunatu loloto… . O le alu soo e auauna atu i le malumalu, ma suesue e le aunoa le aiga i tusitusiga paia, e faafailele ai se faaipoipoga ma faamalosia ai le faatuatua i totonu o se aiga” (“Faafaileleina o Faaipoipoga,” Liahona, Me 2006, 37–38).

Elder Richard G. Scott o le Korama a Aposetolo e Toasefululua: “O lou usiusitai ma lou faatuatua pea ia Iesu Keriso ma lou malamalama i le fuafuaga atoa o le fiafia, tusa lava pe lei faataunuuina vaega taua i lou olaga i le taimi nei, o le a avea mou i le taimi e finagalo ai le Alii. Ou te folafola atu foi ia te oe e mafai ona i ai nei sou tulaga tuputupu ae taua ma le fiafia. O le avea ma se afafine po o se atalii o le Atua, pe o le a lava le vaega o le fuafuaga e te mafaia, ia e ola ai, i le mea sili e te mafaia” (“O Le Olioli i le Ola Ai i le Fuafuaga Sili o le Fiafia,” Liahona, Ian. 1997, 90).