FAAMANUIAGA FAALEAIGA E MAUA MAI AFIAFI FAALEAIGA

Mieko Takahashi, Tokyo, Iapani

“O le ono tausaga ua tuanai, na ou siitia atu ai i Tokyo o se tamaitai talavou nofofua o le Au Paia o Aso e Gata Ai. O afiafi faaleaiga sa fesoasoani ia te au ou te lagonaina ai se vaega o lou aiga i le talalelei. O le taimi muamua, sa matou faia ai ni afiafi faaleaiga ma ni tamaitai se toalua sa matou potu faatasi. Ae, ina ua amata ona ou nofo na o au, sa fai au afiafi faaleaiga na o au i Aso Gafua uma lava. Ou te faitauina tusitusiga paia, saunia au lesona o le Aso Sa, pe matamata i se vitio a le Ekalesia.

“O le taimi nei ua faia ai e le matou uarota se afiafi faaleaiga faalemasina mo le vaega o le au nofofua pe a tuua a matou sauniga i Aso Sa, ma ou te sagisagi lava i ai. Ua mafai ona ou faaaluina lou taimi e talanoa ai i tuagane ma uso o e, ana leai o latou valaauga i le Ekalesia, semanu ou te le maua le avanoa e masani ai ia i latou.

“O le matou siteki, e faia ai e se isi uarota se afiafi faaleaiga i vaiaso taitasi mo se faalapotopotoga o tagata nofofua. E lei leva ona amata ona ou auai atu i ai. O nisi taimi e auai atu i ai faifeautalai ma a latou tagata sailiili. E saunia lelei lava ia lesona i vaiaso taitasi, e faaleagaga, ma e tele mea ou te aoaoina ai. E masani lava ona ou mafaufau i se mea na ou aoaoina ma faapea ifo, ‘Ua lelei! O le a ou faataitaia!’ A o tufaina mai se taumafataga mama, e malie le talatalanoa atu i tagata uma lava.

“O le faaaluina o le taimi ma ni uo o e fefaasoaai i le faatuatuaga e tasi e taua lea ia te au. E pei lava ona taua mai i le Mose 7:18, ‘Ma sa taua e le Alii lona nuu o Siona, aua sa tasi o latou loto ma lo latou manatu, ma sa latou ola i le amiotonu, ma sa leai foi se tasi o i latou sa mativa.’ A tasi o tatou loto ma mafaufau, e tele faamanuiaga e liligi mai i o tatou luga. Ma o lena mea, e faamalolosia ai faatuatua ma molimau a tagata taitoatasi e auai.

“Ou te iloa e alofa le Alii ia i tatou. Ou te faafetai mo o tatou perofeta ma faaaliga faifai pea. Ou te faafetai ona o le tuuina mai e le Alii ia i tatou o afiafi faaleaiga e ala i Ana perofeta. O aafiaga ua ou oo i ai ma mea ua ou aoaoina e ala i afiafi faaleaiga i le avea ai o se tagata nofofua o le Au Paia o Aso e Gata Ai, o le a avea foi ma se faamanuiaga ia te au pe a fai so’u lava aiga.”