Musika Lelei, Mafaufauga Lelei
Sii mai se lauga i le konafesi aoao o Oketopa 1973.
A o ou laitiiti, sa ou nofo i se fale sa siomia i se togalaau o fualaau aina mata. Sa foliga mai e le lava ni vai mo laau. O ‘autu, e eliina i taimi uma o le tautotogo, e le umi ae tumu i vao. I se tasi aso, ina ua oo mai ia te au le faasologa o le faasusuina o le togalaau, sa ou feagai ma se tulaga faaletonu. A o tafe solo le vai na tumu i vao, sa tafe atu i itu uma lava. Sa ou galue i vaivai i le taumafai e fausia se auvai. E uma loa ona puni lea pito, ae pa ane ma le vai o le isi pito. Sa oso mai se tagata matou te tuaoi i le togalaau. Sa matamata mai mo sina taimi, ma sa na o ni nai asuga lava o le suo, sa ia faamamaina ai le ‘autu ma tafe sao atu ai le vai i le alavai sa ia faia. Fai mai a ia, “Afai e te manao e tafe le vai i lona ala, e tatau ona e faia se mea e alu i ai le vai.”
Sa oo ina ou iloa o mafaufauga, e pei o le vai, o le a tumau i le ala pe afai tatou te faia se mea e o i ai. A leai, o le a o atu o tatou mafaufauga i le ala e le malosi lona puipuiga, e oso solo i ala maualalalo. Atonu o le lui pito maoae ma se mea e sili ona faigata e feagai ma outou i le olaga faaletino, o le aoao lea e pulea o outou mafaufauga. Fai mai le Tusi Paia, Aua “e pei ona manatu o ia i lona loto, ua faapea lava o ia” (Faataoto 23:7). O i latou o e mafai ona pulea o latou mafaufauga, ua manumalo ia i latou lava.
O Le Mafaufau e Pei o se Tulaga mo Faafiafiaga
A o outou aoao e pulea o outou mafaufauga, e mafai ona outou faatoilaloina mausa, e oo lava i mausa patino faatoilalo tagata. E mafai ona outou maua le lototele, faatoilalo le fefe, ma maua se olaga fiafia. Ua atu selau pe sili atu ona tau mai ia te au a o ou tuputupu ae, e tatau ona pulea ia mafaufauga, ae leai se tasi na tau mai ia te au pe faapefea ona fai. E tele tausaga sa ou mafaufau ai i lenei mea, ma ua ou maua ai le tonu, o le mafaufau e pei o se tulaga e fai ai faafiafiaga. O taimi uma lava e ala ai le tagata, e toso ai i luga le pupuni. E i ai lava i taimi uma se faatinoga e faia i luga o lena tulaga mo faafiafiaga. Atonu o se mea taufaaata, o se faalavelave, e manaia pe le manaia, lelei pe leaga; ae o taimi uma e tatau lava ona i ai se faatinoga e fai i le tulaga o lou mafaufau.
Pe ua outou iloa ea o mafaufauga iti le mama e oo ifo i o outou manatu ma faatosina ai outou e faia soo se gaoioiga ua tau i ai o outou manatu ae tou te lei mafaufauina? O nei mafaufauga leaga o le a taumafai e faasese tagata uma. Afai tou te faatagaina ia mea e oo mai i o outou mafaufau, o le a tea ese uma mafaufauga lelei mai ia te outou. O le a tuua outou e o outou mafaufauga lelei, aua ua outou fiafia i faatosinaga a o outou mafaufauga leaga le tonu. Afai tou te gauai atu i o outou mafaufauga leaga, o le a latou faagaoioia i o outou manatu soo se mea e oo i ai a outou fuafuaga. E mafai ona latou faatupuina manatu ita, fuā, po o le inoino ia te outou. E mafai ona avea ma uiga le anoano, le mama, ma le faapi’opi’o naua. A mauaa loa i o latou manatu, pe a outou faatagaina ai, ona latou fuafuaina loa lea o se faatosinaga poto naua e faamalieina ai outou. E mafai ona avea ia mea ma mea e sili ona faatosina loto, ma e mafai foi ona latou faaseseina outou e faapea e le afaina aua ua na o ni manatu. O le a se mea tou te faia i lea taimi, ina ua tumu o outou mafaufau i mea le lelei ma amata ai lava i ni nai mea leaga faatauvaa, po o ni manatu ua outou iloa lelei lo latou leaga? Afai e mafai ona outou faatumuina o outou mafaufau i mea lelei uma ma manatu e lelei o latou taunuuga, ona leai lea o se avanoa e mafai ona ofi atu ai mafaufauga leaga i o outou manatu ma o ese ai loa.
E Faapefea Ona Puleaina o Outou Mafaufauga?
Ua ou iloa i ona po nei i le lalolagi, ua masani ona faigata ona outou faatumuina o outou mafaufau i mafaufauga lelei. E ao ina outou matua faaeteete i lea tulaga. E ui lea, o le a mafai ona fai pe a outou faatulagaina se nofoaga malupuipuia e alu i ai o outou mafaufauga. O se ala lenei ua ou iloa e mafai ona tumau ai o outou mafaufauga i le faia o mea lelei. O se ala e fesootai ma musika—o musika lelei. Fai mai se tasi tagata atamai, “O musika o se tasi lea o laaupese e sili ona malosi e pulea le mafaufau.” Pe na te pulea le mafaufau i se ala lelei pe o se ala e le lelei foi, e iloa lena tulaga i mea na te aumaia i lou mafaufau. Afai e mafai ona outou fai atu e musuia faaleagaga se pese pe ua uunaia ai foi oe e vaai ifo ia te oe lava i se vaaiga sili ona tamalii, o lona uiga ua aoga lena musika. Afai ua na ona faafiafiaina outou, pe ua faagaeetia ai o outou agaga, ia ua aoga foi lena musika. Ae afai ua faaosofia ai o outou manaoga faaletino, pe mafaufau ai i faanaunauga le tonu, e tatau la ona e aloese mai lena musika. E le lelei.
O loo i ai pea lava i latou ua latou avea mea matagofie e fai ma mea leaga. Ua tupu lena mea i le natura; ua tupu i tusitusiga, i tala faakonaseti, i faatufugaga; ma ua mautinoa foi le tupu i musika. Ua tele seneturi o aliali mai ai a sese upu e faaaoga i ni musika tausaafia, e mafai ona latou taitai sese tagata. E mafai e le musika lava ia, i le ala e taina ai, ma lona taimi, ma lona malosi, ona faapogisa le uiga malamalama faaleagaga.
O loo tatou ola i se vaitaimi o loo faia ai e le tele o sosaiete suiga faifai malie ae matua malolosi lava. Ua faateteleina le tuufau o musika ua oo i se tulaga ua taliaina na musika i faafiafiaga. Ma o lona taunuuga, o le tele o musika ua usuina e tagata faafiafia lauiloa i ona po nei, ua foliga mai ua faamoemoe e faaoso ai le vevesi ae le o le faamalieina, ma ua faateleina ai le popole ae le o le toafilemu. O nisi tagata musika ua iloatino lava lo latou faatupuina o mafaufauga ma amioga amioletonu.
Le autalavou e, e le tatau ona outou faatumuina o outou mafaufau i musika le lelei o o tatou vaitaimi. E matautia. E mafai ona aumaia ai i o outou mafaufau ni mafaufauga le lelei ma faatuina se fatuga e sisiva ai, lea atonu o le a outou ano atu i ai. Ua outou faatoilalo outou pe a outou auai i mea na e o mai faatasi ma musika le lelei—o foliga faainaelo, o le le faaaloalo, o le ola le mama, ma le avea o se mea ma vaisu. O musika faapena e le lelei mo outou.
Ia filifili lelei musika tou te faalogologo ai ma saunia. O le a avea ma vaega o outou. Na te pulea o outou mafaufauga ma faatosina ai foi olaga o isi. Ou te fautua atu ia outou iloiloina lelei a outou musika ma tiai ese musika na e faatupuina mafaufauga faatoilalo. O musika faapena e le tatau ona i ai ia te outou tupulaga talavou o loo naunau ia alualu i luma faaleagaga.
E le o le uiga o lau tala o musika uma lava i aso nei, ua maua ai ni mafaufauga le lelei. O loo i ai ni musika i aso nei ua atiinae ai le malamalama o tagata; o musika e musuia le lototele; o musika e fafaguina lagona o le faaleagaga, faaaloalo, fiafia ma le mafaufau i mea matagofie.
Ia Filifili Musika Musuia
Na fetalai mai le Alii, “Aua e olioli lou agaga i le pese a le loto; ioe, o le pese a e amiotonu o le tatalo lea ia te au, ma o le a tali i se faamanuiaga i o latou luga” (MFF 25:12). Na saunoa mai le Au Peresitene Sili o le Ekalesia e uiga i faatosinaga a musika i o tatou olaga e faapea: “E ala mai i musika, ona mafai e se tagata ona faaali ona uiga le lelei ma lona malosi e le mafaamatalaina e upu. E mafai ona faaaogaina musika e faaeaina ai ma musuia, pe o le tauave ai foi o savali faatafuna ma faatoilalo. O le mea lea e taua ai, i le avea ma Au Paia o Aso e Gata Ai, ona tatau ia i tatou i nisi taimi ona faaaoga mataupu faavae o le talalelei ma saili le taitaiga a le Agaga i le filifilia o musika na e siomia ai i tatou lava.”1
Ou te faapea atu ia te outou taitai talavou, ia outou mataalia lelei i musika tou te fuafuaina ia outou gaoioiga. Ia talanoa ma a outou fautua i le taimi e filifili ai ni musika. Tou te manaomia la latou faautaga lelei, aua ua matua faigata lava le va o le Ekalesia ma le lalolagi i mea tau musika i aso nei, nai lo mea sa i ai i isi augatupulaga ua mavae.
Sa faamalamalama mai e Peresitene J. Reuben Clark Jr. (1871–1961), o se tasi o o tatou taitai maoae o le Ekalesia e faapea: “Ua le faatagaina i tatou, e tusa ai ma lo tatou tiute, e saunia pe faia ni gaoioiga po o ni faafiafiaga e le lelei, i le manatu e faapea, a tatou le saunia na musika o le a o atu le autalavou i se isi mea e maua ai. E le mafai ona tatou faatuina se laulau poka i le ogatotonu o se fale faafiafia o le Ekalesia, ma sisio faapea, afai tou te le faia lea mea, o le a o atu le autalavou i se fale pele tupe e pele tupe ai. E matua le mafai lava ona tatou taofiofia faapena a tatou autalavou.”
E le tatau foi ona saunia ituaiga musika ma se siosiomaga e tosina atu ai le autalavou i le lalolagi. E tatau ona outou tutu mausali ma aua le fetuunaia mea tou te iloa e sao ma lelei; e tatau ona outou maua le lototele e faamutele ai moli ma ki ai i lalo musika pe afai e le tusa ai ma le agaga lena e maua ai mafaufauga lelei; ma e tatau ona outou faamamafa atu i tagata e faia faafiafiaga ma i latou e auai atu i ai, e tatau ona faia lavalava talafeagai e tusa ma tulaga faatonuina maualuluga o le faiga o lavalava ma faafiafiaga.
Ou te fautuaina outou e atiinae a outou taleni, ma afai e i ai ni a outou taleni i mea tau musika, ia mafaufau i le mea lenei: E tele naua musika e tatau ona fatuina, ma musika e tatau ona ta pe usuina. E mafai ona avea a outou musika ma musika faagaeetia lena e faasalalauina atu le talalelei, faaootia ai loto, maua ai le faamafanafanaga ma le malosi o mafaufau ua fesouaiina.
E tele naua faataitaiga, i ona po anamua faapea ma ona po nei, o ni tagata ua liua o latou olaga ona o faatosinaga a musika amiotonu. Sa mou ese atu le atuatuvale ae faatumuina mafaufau i le filemu a o tuuina atu e upu “O Mai, O Mai, Outou le Au Paia” i paionia le lototele e faafeagai ai ma o latou tofotofoga. Ua avea lava lenei pese e tasi ma musumusuga i tagata e toatele i le gasologa mai tausaga. I se tasi taimi sa ou talanoa ai i se pailate ave vaalele faatoa foi mai lava mai se malaga faigata matautia. Sa ma talanoa e uiga i le lotoele faapea foi ma le fefe, ma sa ou fesili atu ia te ia pe sa faapefea ona ia gafatia ia tulaga uma e pei ona sa ia onosaia. Na ia fai mai, “E i ai se viiga e sili ona ou fiafia i ai, ma a ou lotovaivai, pe a itiiti se faamoemoe o lo matou toe foi mai, ona ou mafaufau pea lava lea i lena pese ma e pei e foliga mai e toe lagi mai e le afi o le vaalele ia te au lena pese.”
Mai lenei pese sa ia pipiimau ai i le faatuatua, o se mea lea e taua i le lototele.
Sa saunia le Alii lava Ia mo Lona tofotofoga sili e ala i uunaiga a musika, aua ua tusi faamaumauina i tusitusiga paia, “Ua uma ona faia o a latou pese, ona latou o atu lea i le mauga o Olive” (Mareko 14:26).
Ia Filifili se Viiga e Sili Ona Fiafia i Ai
Ia manatua, tupulaga talavou e, ou te manao ia manatua e outou taitoatasi o la outou Ekalesia lenei, ma o Ia o lo outou Alii ma lo outou Faaola o Le o loo tu i le ao o lenei Ekalesia. Ua faaavanoaina mo outou lana taitaiga tumau ma le musuia pe a outou faatumuina o outou mafaufau ia taumasuasua i mea lelei, matagofie, ma le musuia. Ma o se tasi lenei o ala e faia ai. Ia filifili se viiga po o se pese e te fiafia i ai, e pei ona sa faia e la’u uo pailate, o se pese e i ai ni ona upu faagaeetia ma ni musika faaaloalo, o se pese e te lagona ai ni musumusuga. E tele naua ni pese matagofie e filifili mai ai. Ia saili le taitaiga a le Agaga i le faiga o a outou filifiliga. Ia e mafaufau lelei ma le faaeteete i lena pese. Ia e taulotoina. E tusa lava pe e lei aoaoina oe i mea tau musika, e mafai lava ona e mafaufau lelei i se pese faigofie. Ia faaaoga lenei pese e fai ma ala e mulimuli ai ou mafaufauga. Ia avea ma au alaleo faatopetope.
Soo se taimi lava e oo ane ai i lou mafaufau manatu faaletonu ma faalelelei, ia ta loa lenei CD pese, e pei ona sa i ai. O le a suia atoa ai ou lagona.
Ona e faagaeetia ma mama lena musika, o le a sola malie ese atu ai manatu leaga. Aua e pei ona le mafai ona nofo pea manatu leaga i le mea ua oo atu i ai manatu lelei ma le mama, e le fiafia foi le leaga i le pupula o le malamalama. I le taimi e tatau ai o le a outou iloa ai lo outou hamuina i o outou loto o ni musika, ma e toetoe lava o le taimi lava lena, e aveese ai manatu leaga ma lē lelei. A o faia e outou o tagata talavou mea tonu ma lelei, ia faatumuina o outou mafaufau i mafaufauga lelei, aua e pei ona manatu ai o le tagata i lona loto, ua faapena foi o ia, ma o le a outou maua le malosi e faataunuu ai mea na e aumaia le lagona faamalieina i o outou olaga.
O oe o se atalii po o se afafine o le Atua Silisili Ese. Ou te molimau atu o le Atua o lo tatou Tama, ma o i tatou o Ana fanau, ma e alofa o Ia ia i tatou ma ua Ia saunia ni mea matagofie ma mamalu mo i tatou i lenei olaga. Ua ou iloa lenei mea, ma ou te faafetai ia te Ia mo uunaiga faagaeetia a musika lelei, lea ua ia tosina ai ou mafaufauga ma faagaeetiaina lou agaga.