Manatu Faaopoopo mo Taimi o Fetufaaiga, Aperila 2008

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaiga o loo lomia i le Liahona o Aperila 2008. Mo le lesona, faatonuga, ma le gaoioiga e o faatasi ma nei manatu, tagai i le “Faalogo i Perofeta—Mulimuli i Mea o Loo Latou Fai Mai Ai” i itulau U4 ma le U5 o le vaega a tamaiti o le lomiga lenei.

1. Faaali le Ata 102 o le Pusa Ata o le Talalelei (Fauina o le Vaa) ma le 520 (Gordon B. Hinckley). Faatusatusa le perofeta o Noa ma Peresitene Gordon B. Hinckley (1910–2008). Fesoasoani i tamaiti ia iloa, e ui lava ina sa na o le aiga o Noa na faalogo i ana upu, ae toatele tagata o le Ekalesia sa faalogo i le apoapoaiga a Peresitene Hinckley e faitau le Tusi a Mamona. A faamaonia mai e le epikopo po o le peresitene o le paranesi, valaaulia se aiga e faasoa mai lo latou aafiaga ina ua mulimuli i le perofeta e faitau le Tusi a Mamona.

Fesoasoani i tamaiti e su’e le 2 Nifae 32:9. Tauloto le fasifuaitau “Ou te fai atu ia te outou e ao ina outou tatalo e le aunoa.” Aoao se pese po o se viiga e faatatau i le tatalo. Tuu atu se molimau e uiga i le Tusi a Mamona ma le mana o le tatalo.

2. Fai se ala lavelave e ta’u o le “Mulimuli i le Perofeta” i le faaaogaina lea o le lesona 8 o le Peraimeri 3. Faatetele ata taitasi o i luga o le ala lavelave, ma tuu i luga o se isi pepa. Tuu le ata o le tamaitiiti i le pito i luga tauagavale o le laupapa, ma le ata o le Faaola i le pito i lalo taumatau o le laupapa. Tuu isi ata ia faataamilo i le potu. I luga o nisi fasipepa, tusi ai fasifuaitau e o faatasi ma ata taitasi. E faaaoga mea na e fai ma taufaaataataga.

Usu le fuaiupu e 9 o le “Mulimuli i le Perofeta” (Tusipese a Tamaiti, 58), ma fai i tamaiti e faalogologo po o a mea e mafai ona tatou maua pe a tatou mulimuli i le perofeta. Aoao atu ia i latou e tuuina mai e lo tatou perofeta ia faatonuga i le ala tatou te ui ai. Afai tatou te mulimuli ia te ia, e mafai ona tatou toe foi atu e mau faatasi ma le Tama Faalelagi ma Iesu Keriso.

Tofi se tamaitiiti e filifili se taufaaataataga. Fai i lana vasega ma le faiaoga e faatino mai le taufaaataataga ina ia mate mai e isi tamaiti. A sa’o le tali a se tamaitiiti, ona fai lea i ai na te sueina le ata o i totonu o le potu e fetaui i ai. Tuu le ata i luga o le laupapa, e taitai mai ai i le ata o le tamaitiiti agai i le ata o le Faaola. Usu le tali o le “Mulimuli i le Perofeta” pe a uma ona tuu ata taitasi i luga o le laupapa. Faaauau pea le faatinoina o taufaaataataga ma faapipii ata i luga o le laupapa seia oo ina mate’ia uma. Tuu atu lau molimau i faamanuiaga e maua mai i le mulimuli i le perofeta.

Mo tamaiti matutua: Filifili mau e o faatasi ma taufaaataataga, ma tusi ia tusi o mau i luga o le taufaaataataga. Fai i tamaiti e su’e le mau ma faitau mai a o lei faatinoina le taufaaataataga.

3. Faatinoina o le pese: “Ia Viia Oe le Atua, mo se Perofeta” (Viiga, nu. 10). Hamu pe ta le laina muamua. Fai i tamaiti e sii mai o latou lima pe afai na faalogo muamua i le viiga lenei. Ta’u i ai upu muamua e lima: “Ia viia oe, le Atua,” ma faamatala i ai o lenei viiga o loo faamatala ai faamanuiaga ua tatou maua mai le Tama Faalelagi, ma a oo ina tatou usuina le viiga, o se avanoa lea tatou te avatu ai le faafetai mo Ana faamanuiaga. Valaaulia tamaiti e faasoa mai mea ua latou iloa ma lagonaina e uiga i lenei viiga.

Uu i luga le tusi o viiga, ma faaali i ai le mea o loo maua ai le viiga. Faasino i ai o le upu mataala ua faaaoga, e faamatala ai le ala e tatau ona usu ai. Fesoasoani i tamaiti ia lagonaina le solo fetaui e ala i le patipatia o le saosaoa e 4/4 a o taina e le tapiano le laina muamua. Ona pati lea e tamaiti le solo fetaui o le laina muamua. Vaelua le potu. Pati e le tasi itu le solo fetaui ae pati e le isi le saosaoa o le laina. Fesuia’i itu ma toe fai.

A o e aoao atu upu o le viiga, fai i tamaiti e faalogologo mo faamanuiaga ua tuuina mai e le Tama Faalelagi ia i latou, ma pe faapefea ona fesoasoani nei faamanuiaga ia i tatou (mo se faataitaiga: o le talalelei, o se perofeta e taialaina i tatou, ma isi). Fesoasoani ia iloa e tamaiti fasifuaitau o loo faamatala mai ai mea e ao ona latou faia aua ua faamanuiaina i latou (mo se faataitaiga: “ua naunau ai pea le loto” ma le “matou te auauna ia oe”).

Faasoa atu le Mosaea 2:41. Molimau atu e faamanuiaina i tatou ma fiafia pe a tatou faia mea ua poloaiina ai i tatou e perofeta.