Pese a Lona Tina
“Ia vivii atu i le Alii i pesega” (MFF 136:28).
Na ala ae Susana ma le te’i. O le a le la pao? Sa faalogologo o ia ma le totoa. Na uu atu le agi a le matagi i laau iukalipa [eucalyptus] ma toulu ai atigi fatulaau i luga o le taualuga o lona potumoe. O le pao o le toulu o atigi fatulaau, na pei lava o le pao o timuga malolosi, ma o le mea lena na ala ai o ia.
Sa mapuea Susana. Na faatoa se’e atu lo latou aiga i le fale lenei, ma sa le masani o ia i nei mau leo fou. Sa le’i fesoasoani foi le moe toatasi o Susana i le taimi lenei. I le latou fale tuai, sa la potu faatasi ai ma lona uso matua.
Sa toso ae ona palanikeke i lalo o lona auvae ao toulu ifo le isi solo o atigi fatulaau i le taualuga. Sa fefe ma sa lagona lona tuua toatasi, ma iloa ai lona misia o lona tama. O le tama o Susana o se alii ofisa i le militeli. Sa alu o ia i aoaoga [a le militeli]. E ui lava ina sa le’i i ai o ia i tulaga matautia, ae sa fefe lava Susana. Ae faapefea pe afai e i ai se aso e auina atu ai lona tama i le taua ma fasiotia ai? Sa le’i manao o ia e ola ae e aunoa ma se tama. Sa ia manaomia o ia.
Na loimata ona mata, ma sa iloa e Susana na te manaomia se fesoasoani e faatoa filemu lona popole ua oso a’e. Sa le latalata atu foi lona uso, ae sa ia iloaina sa latalata atu i taimi uma ia Iesu ma le Tama Faalelagi.
Faatasi ai ma lona lototele, na seesee ese mai ai Susana mai lalo o ona palanikeke ma tootuli i talaane o lona moega. Sa tatalo o ia i le Tama Faalelagi e fesoasoani ia te ia, ina ia aveese lona fefe.
Ona faalogoina lea e Susana se mea. Sa malu atu nai lo le pao i luga o le taualuga. O le leo o lona tina, ma sa pesepese o ia. A o savali solo lona tina i le fale, i le faamaeaina o ana feau ma sauni e moe, sa pese o ia.
O le tina o Susana e ese le manaia o lona leo ma sa masani ona pese o ia, ae o le pese aupito matagofie lenei ua faalogo Susana o ia usuina. E ui ina sa le iloa e Susana le fati, ae o upu na faatatau ia Iesu. O le pese na faatumulia ai o ia i le toafilemu.
Sa faafetai atu Susana i le Tama Faalelagi, ona toe oso lea i luga o le moega, ma faalogologo i le pese a lona tina. Na toe loimata ona mata, ae o le taimi lenei o loimata o le agaga faafetai ma le matuu atu o se popolega. Sa ia lagonaina sa lelei mea uma. Sa ia iloaina na i ai sona aiga agaalofa. Sa ia iloaina e popole lona Tama Faalelagi mo ia. Sa talitonu o ia, po o le a lava le mea e tupu, o le a i ai i taimi uma se mafuaaga mo le faamoemoe. Na iloa e Susana soo se taimi lava e tau faamatau atu ai le fefe ina ia faatoilalo o ia, e mafai ona ia maua le filemu i le manatuaina o le po na malosi atu ai le pese a lona tina nai lo le fefe.