O Avanoa Fou e Mafai ai ona Auauna Atu le Toatele o Tagata o le Ekalesia
Sa fiafia Thelma Taylor i lona valaauga i le nofoaga autu o talafaasolopito o aiga i Mesa, Arisona, ISA. E 17 tausaga sa ia fesoasoani ai, taiala, ma lagolagoina alii ma tamaitai ia latou taumafaiga e saili o latou augatuaa. Peitai, o lona siitia atu i Coolidge, Arisona, i le 2005, ua 40 ai maila (64km) e vavamamao ai o ia ma le nofoaga autu o talafaasolopito o aiga, lea sa ia tautua faamaoni ai i tagata e autovaa atu i ai.
O lenei tamaitai matua ua 83 tausaga, toeitiiti po lana vaai ma e le mafai ona avetaavale, sa popole o ia nei avea le le mafai ona ia aveina se taavale e malaga ai i Mesa, ma mea e faamuta ai lana tautua i talafaasolopito o aiga. Ona ofoina atu lea i ai e se taitai magafagafa se auala e foia ai lea faafitauli, i le avea ai o Sister Taylor ma se faifeau faamisiona fesoasoani a le Ekalesia e mafai ona galue mai lona fale. Talu mai le 2006, sa avea o ia ma se faifeau faamisiona i le FamilySearch Support mo le Ekalesia, e faaaoga ai lana komepiuta i lona fale e fesoasoani ai i tagata i le faiga o a latou galuega o talafaasolopito o aiga.
“Ua faamanuiaina ai au e sili atu i lo le mea ou te mafaia, e faitau ai o’u faamanuiaga uma,” o lana tala lea e uiga i lona aafiaga. “Ua matua tele mea ua ou iloa i lena vaega o talafaasolopito o aiga ma lo’u tomai e auauna atu ai.”
O Se Punaoa Fou ua Aumaia ai Manaoga Fou
A o taumafai le Ekalesia e faataitai le Uepi saite fou o le FamilySearch.org i gagana e valu, ua i ai le manaoga tele mo faifeau faamisiona fesoasoani a le Ekalesia e pei o Sister Taylor, e fesoasoani i tagata e autovaa mai e faaaoga meafaigaluega mo talafaasolopito o aiga e saili ai o latou augatuaa.
O le FamilySearch, o le punaoa i tafailagi a le Ekalesia mo mea tau gafa, ua toe fatuina ma ni vaaiga fou i le faaSaina, Igilisi, Farani, Siamani, Iapani, Korea, Potukale, ma le faaSipaniolo. O le saite fou, faatasi ai ma nisi mea, ua faia ina ia fesoasoani ai e puipuia le toe fai faafia o galuega o sauniga. O le tulaga manaomia o le auaunaga a faifeau faamisiona i le Ekalesia mai le lalolagi atoa, aemaise lava i gagana nei ma isi o le a oo mai, o le a faaauau pea ona faatupulaia pe a maua le FamilySearch fou i le salafa o le lalolagi.
“Latou te maua le avanoa e tulei ai i luma le galuega a le Alii i lo latou galulue faatasi ai ma tagata e autovaa mai,” o le saunoaga lea a Art Johnson, o le pule o le eria mo le FamilySearch Support.
Faaaogaina o Tekinolosi Fou e Auauna Atu Ai
O le faaaogaina o le polokalama i le telefoni ua fatu i le Uepi, e tali mai ai faifeau faamisiona, o e e mafai ona i ai i soo se nofoaga i le lalolagi, pau lava le mea ia i ai sa latou Initoneti, i le tele o fesili e oo atu lava i le 10,000 i le masina. E tele autu e aofia i fesili a tagata, e aofia ai sailiiliga o talafaasolopito o aiga, faasino upu, ma le auina atu o igoa i le malumalu.
E ui ina le lelei le vaaiga a Sister Taylor—o le o loo lagolago atu i isi faifeau faamisiona e toaono—ae mafai ona ia faateteleina mataitusi i luga o lana komepiuta e mafai ai ona ia faitauina i-meli a tagata ma tali atu i a latou fesili.
Ua tuuina atu i faifeau faamisiona fesoasoani se aoaoga lautele i le meliuila e mafai ona latou faamaeaina i le fale. E le tau manaomia ona fenanui faifeau faamisiona, ae o le a galulue i a latou lava gagana, faatasi ai ma le aufaigaluega i le lotoifale o le a fesoasoani ia i latou i a latou fesili ma tuuina atu i ai aoaoga ma fesoasoani taitasi. A mae’a loa ia aoaoga, ona latou faaaogaina lea o se utuofaamatalaga pe tusa ma le 4,000 faamatalaga o i ai e mafai ona latou tagatagai i ai mo tali i fesili a tagata.
E lei iloa e Sister Taylor faaaoga se komepiuta vagana ina ua 66 tausaga o lona soifua, ae fai mai a ia, o se tomai aoga, e faamanuiaina ai. “E le afaina lou matua,” o lana tala lea. “E te le o matua tele e aoao pe faapefea ona faaaoga se komepiuta.”
O Ai e Mafai ona Auauna Atu ma Pe Faapefea
O se misiona auauna atu i le Ekalesia i le FamilySearch Support, e le faapea e suia ai le auaunaga faafaifeautalai faamisiona, ae e maua ai se avanoa e auauna atu ai ia i latou e le o mafai ona faia se misiona tala’i.
“O se tulaga lelei tele lenei mo au aua e mafai ona ou aoao pea ma auauna atu,” o le tala lea a Sister Taylor. Fai mai a ia, o lana misiona auauna atu i le Ekalesia ua fesoasoani na te lagonaina ai le ta’uaogaina i se vaitausaga ua utiuti ai ona avanoa.
O faifeau faamisiona fesoasoani a le Ekalesia, e vaetofia ma e latou te faaaogaina pine o igoa, faapei foi ona faia e faifeautalai faamisiona. E tuuina atu ia i latou ni aoaoga auiliili i galuega o le Uepi saite, ma aoao ai auala sili e tali ai fesili a tagata. O faifeau faamisiona o le FamilySearch Support, latou te galulue i le 15 e oo atu i le 30 itula i le vaiaso mo le 6 i le 30 masina, ma e mafai ona faia le misiona atoa mai o latou fale.
O le taimi nei e 700 ni faifeau faamisiona o loo fesoasoani i lenei tomai, ma e ono manaomia le faaluaina o lena aofaiga i le tausaga a sau, pe a maua le FamilySearch fou i le tele o nisi eria. E ao i alii ma tamaitai o loo fia avea ma faifeau faamisiona fesoasoani a le Ekalesia ona faafesootai o latou epikopo po o le peresitene o le paranesi. Mo nisi avanoa i le FamilySearch Support i-meli i le support@familysearch.org pe faaaoga le contact.familysearch.org/en.htm mo numera o telefoni i le lotoifale.
O Se Faamanuiaga i Faifeau Faamisiona ma Tagata
Ua faamanuiaina olaga o le toatele o tagata o le ekalesia, o tagata matutua ma le tupulaga, i le avanoa e avea ai ma faifeau faamisiona fesoasoani, sa ta’ua ai e o latou taitai, ma e toatele agaga o le a lagonaina le aafiaga o la latou galuega.
“O le agaga o le faapaiaga e aumaia e [faifeau faamisiona fesoasoani o le Ekalesia] i o latou valaauga, ua mafai ai e i tatou ona vaaitino i vavega i le faatupulaia ma le faateleina o le galuega,” o le saunoaga lea a Brother Johnson.
Ua faataunuuina le galuega ma ua sosolo. “E papa’i atu le agaga o le galuega ia te oe ma e le toe alu ese ma oe,” o le tala lea a Sister Taylor. “E le afaina po o le a lou matua, e mafai ona avea oe ma se tautua moni o se faifeau faamisiona i le FamilySearch Support.”
Fai mai Brother Johnson, o le lagolago o loo tuuina atu e faifeau faamisiona fesoasoani, e matua taua lava mo le manuia o le FamilySearch fou. O se tali e tuuina atu i se tagata, e mafai ona fesoasoani i se tasi e saili ai ma maua se tuaa ma fai ia uma ona galuega i le malumalu, ma o se galuega taua tele lena, ma le paia.
“O a tatou taumafaiga, e mafai ai e o tatou uso ma tuafafine o i le isi itu o le veli ona maua foi na lava faamanuiaga ma sauniga o le talalelei o loo tatou olioli ai,” o le saunoaga lea a Brother Johnson.