Na Tosina atu e le Malumalu i Toga le 40,000 o Tagata Asiasi A o Loma le Faapaiaga

Sa faapaiaina le Malumalu o Toga lea na toe faafou, i le aso 4 o Novema, 2007, e Elder Russell M. Nelson o le Korama a Aposetolo e Toasefululua. Sa faia le faapaiaga ina ua mavae se masina atoa o maimoaga, lea na auai atu i ai le 40,000 o tagata asiasi.

“O le malaga asiasi atu i le malumalu o se tasi o mea na tutupu e le galo i lo’u olaga,” o le tala lea a Moimoi Hola, o se tagatanuu o Toga sa asiasi atu i ai.

O le aofaiga o tagata na asiasi atu i ai e tusa o le 40 pasene o le faitau aofai o le atunuu, e ui ina sa aofia ai ma tagata na asiasi atu mai isi motu. O malo faaaloalogia sa aofia ai Lana Afioga Mamalu o Purinisese Pilolevu ma Mrs. Ainise Sevele, le faletua o le Palemia o Toga o Feleti Sevele.

“O la’u asiasiga i le malumalu o se malaga patino i le lalolagi o mea uma e paia, o le filemu, toamalie, faamoemoe, fiafia, ma le olioli,” sa faamatala ai e Mrs. Sevele.

Sa faaopoopo mai se isi malo, o Finau Nisa, “Sa ou lagona e pei lava ua ou i ai i le lagi ina ua ou i ai i totonu o le malumalu.”

Na muai faapaiaina le Malumalu o Toga Nuku‘alofa i le 1983. I le 2006, sa tapunia ai mo se sosooga tele, lea sa toe faaopoopo i ai le silia ma le 5,000 sikuea futu (465 sikuea mita) i le fausaga.

Faatasi ai ma le 50,000 tagata o le ekalesia i le silia ma le 160 faapotopotoga, o le faitau aofai o tagata o le Ekalesia i lenei atunuu e 110,000 ona tagata, ua tulai mai ai e aupito maualuga lona faapaseneina (pe tusa ma le 46 pasene) i lo se isi lava atunuu i le lalolagi.