Saunia mo le Mauaina o Sauniga o le Malumalu
A o ou laitiiti sa masani ona ma savalivali ma Tamamatua Ahlander i se fanuamaliu lata ane. Sa iu ina ou fiafia i na savalivaliga ma talisapaia ia lagona faapitoa na ou lagonaina iina. Peitai, ou te lei malamalama lelei pe aisea na oo mai ai na lagona e pei ona ou maua.
E lei mamao atu, sa ou savalivali toatasi ai i auvai o le Vaitafe o le Susquehanna i Penisilevania, lea na faaali ane ai Ioane le Papatiso i se taeao matagofie o le tautotogo o le 1829 ia Iosefa Samita ma Oliva Kaotui ma toefuatai mai le Perisitua Arona. A o ou mafaufau loloto i lena mea na tupu, na ou toe lagonaina ai na pei ua ou i ai i eleele paia. I le tele o tausaga sa ou lagonaina ai se sootaga faapena ma le faavavau a o ou asia nofoaga o taua ma isi nofoaga paia i le lalolagi atoa.
I nei nofoaga taitasi, na foliga mai o le veli sa i le va o le olaga lenei ma le faavavau sa matuai manifinifi lava. I nofoaga taitasi sa i ai le faamautinoaga faifaipea e faapea, o le olaga e le amataina i le tagi a se pepe pe muta i le oti o le tino, ae e faaauau pea lava.
O le aso, ua ou toe tulai ai i nofoaga paia i se tasi o malumalu paia a le Atua, ma ua matua toe latalata mai ai foi lagona o le faavavau. Sa ou maua foi lena lava lagona a o ou ulu atu lata mai nei i malumalu i Finelani, Suitiselani, Hong Kong, ma Costa Rica. O ia malumalu taitasi o se sulufaiga paia, o se malutaga mai afa o le lalolagi, o se nofoaga o le filemu lea e mafai ona tatou auai i sauniga paia mo i tatou lava ma isi ma faamalosia patino ai ma saunia e tutu atu mo le upumoni ma le amiotonu.
Ua aoao mai le Perofeta o Iosefa Samita, o le malumalu o se nofoaga lea e mafai e le Atua ona “faaali mai i Lona nuu sauniga o Lona maota ma mamalu o Lona malo, ma aoao ai i tagata le ala o le faaolataga.”1 Na saunoa Peresitene Gordon B. Hinckley (1910–2008), “Ou te uunaia o tatou tagata i soo se mea, ma le malosi atoa ou te agavaa ai, ina ia ola agavaa e umia se pepa faataga o le malumalu, ia puipuia ma faia o se meatotino faapelepele, ma ia faia se taumafaiga sili atu e o i le fale o le Alii ma taumamafa i le agaga ma faamanuiaga e maua ai.”2
O le taimi nei ua i ai ni o tatou malumalu i le lalolagi atoa e faamanuiaina ai le Au Paia. E ui atonu e le o lava lou matua e auai atu ai i sauniga uma o le malumalu, e mafai ona e auai i faamanuiaga o le malumalu e ala i le faia o papatisoga mo e ua maliliu pe a 12 tausaga o lou matua. Ma e tusa pe tatou te tuaoi ma se malumalu pe fia afe maila le mamao, e mafai ona tatou ola agavaa i aso taitasi ia olioli ai i faamanuiaga o le auai atu i le malumalu. Ua fetalai mai le Alii ia i tatou i le Mataupu Faavae ma Feagaiga, “A e tutu pea ou soo i mea paia, ma e le faagaeetia” (45:32). O le uiga o lenei mea e tatau ona tatou ola i ni olaga agavaa ina ia mafai ona tatou ulu atu ma olioli i faamanuiaga o le malumalu. Sei ou fautuaina atu ni nai auala e mafai ona tatou “tutu ai i mea paia” i le taimi nei po o fea lava o tatou i ai:
1 Ia ola e le aunoa i tulaga faatauaina o loo i le tamaitusi Mo Le Malosi o le Autalavou, ma ia aloese mai “mea e le paia.” Ina ia ulufale atu i le malumalu, e tatau ona tatou agavaa. E fesoasoani pe a tatou tutu i mea paia i le taimi nei. O lona uiga o le aloese mai nofoaga ma taimi pe a faaosoosoina i tatou e fai filifiliga sese. Ou te manatua se tala na faamatalaina e Peresitene J. Reuben Clark Jr. (1871–1961), o se fesoasoani i le Au Peresitene Sili, e uiga i lona afafine talavou. Sa sauni o ia e alu atu i se siva, ma sa ia faapea atu, “Ia e maua se taimi fiafia, lau pele. Ia e foi mai i le ta o le sefululua nanei.” Sa tali o ia, “Tama, o le po lenei o le siva tele. Matou te o i le siva ae matou te le foi mai seia oo i le taeao po.” Na tali atu Peresitene Clark, “Ioe, ua ou iloa o le mea lena o le a fai e le toatele. Ae e tatau ona e foi mai i le sefululua nanei.” Ona ia faapea mai lea ma le faanaunau tele, “Tama, e te le talitonuina au!” Na tali atu i ai o ia, “Lau pele, i le nofoaga sese, i le taimi sese, ou te le talitonuina ai foi au lava. Ia e foi mai i le sefululua nanei.”3
Tou te faia foi filifiliga faapenei i mea uma tou te o i ai. Po o fea lava o e i ai, ia fesili ifo ia te oe lava, “Pe o se nofoaga ea lenei e mafai ona mafuta ai le Agaga?” Afai e leai, ia e maua le lototele e aluese mai ai. Afai o lou potu (e aofia ai ata i luga o le puipui) e le o se nofoaga e mafai ona mafuta ai le Agaga, ia sui loa ina ia mafai ona mafuta ai le Agaga. Ia aoao vave e tutu i mea paia, ia faifai mea faatasi ma uo lelei, ina ia faapea ona lagolagoina oe e au taumafaiga i taimi uma ia agavaa e ulu atu i le maota o le Alii.
2Ia e faalatalata ma fesoasoani e faamalosi i lou aiga. O le savali o le malumalu o se savali e faatatau i aiga—aiga e faavavau. O o tatou aiga e mafai ona avea ma nofoaga o le paia ma le malosiaga. Ua aoao mai le tamaitusi o le Mo Le Malosi o le Autalavou:
“O le avea ai ma se vaega o le aiga, o se faamanuiaga sili. E mafai ona e maua i lou aiga se mafutaga mafana ma le fiafia, e fesoasoani ia te oe ia e aoaoina mataupu faavae sao i se siosiomaga alofa, ma e fesoasoani foi ia te oe ia e saunia mo le ola e faavavau. E le tutusa uma aiga, ae taua aiga taitasi i le fuafuaga a le Tama Faalelagi.
“Fai lau vaega ina ia atiinae ai se aiga fiafia. Ia laufofoga fiafia, loto fesoasoani, ma mafaufau i isi… . Taumafai ia avea oe ma se tasi e faatupuina le filemu ae le o le taufaalili, fia fusu, ma le faamisa. Ia manatua o le aiga o le iunite aupito paia lea o le Ekalesia.”4
3Ia fai le suesueina o tusitusiga paia o se vaega o lou olaga—e le gata i le faitauina e le aunoa ae ia faalagolago foi i tusitusiga paia e fesoasoani ia te oe i le faia o filifiliga taua.
A o avea au ma se peresitene o le misiona i Siamani i matu, sa ia te au se faafitauli tuga lava. Sa ou saili ma sa lei faamanuiaina mo se tali mo le tele o vaiaso. I se tasi taeao sa ou faitau ai i le Tusi a Mamona i le vaega lea na poloaiina ai Nifae e fau se vaa: “O au o Nifae, na ou alu soo i le mauga, ma ua ou tatalo soo i le Atua, o lea sa faaalia mai ai ia te au e le Atua o mea tetele” (1 Nifae 18:3). A o ou faitau i lena fuaitau puupuu, na oo mai le lagona ia te au, “O le mea lena e tatau ona ou faia.” Sa ou mafaufau loloto ma tatalo, ma na iu lava ina oo mai le tali, ma na ou iloaina le mea e tatau ona ou faia. Ou te faafetai mo lena faamalama itiiti o musumusuga lea na oo mai—a o ou suesue i tusitusiga paia. Ina ua ou mauaina la’u tali, na ou lagona sa ou “tu i totonu o se nofoaga paia.” Ou te iloa e mafai foi ona e maua aafiaga faapena a o e suesue, mafaufau loloto, ma tatalo e uiga i tusitusiga paia.
4Auai i le seminare pe a ua fetaui lou matua. Ua ou iloa o le auai e le aunoa i le seminare e fesoasoani i le autalavou ia manatua e moni o i latou lava o atalii ma afafine o le Atua, ma e mafai ona latou ole atu ia te Ia i taimi uma mo se fesoasoani i le faiga o filifiliga, ma e tali mai o Ia i a latou tatalo. O se nofoaga foi e mafai ona faamanatu atu ai e le o tuua na o i latou ma e toatele isi tagata i le lalolagi o e o loo taumafai e tutu i nofoaga paia ma ola i ni olaga agavaa.
5Faatumu lou mafaufau i mafaufauga mautinoa, mama, ma faagaeetia. Ua folafola mai i lo’u faamanuiaga faapeteriaka, “Vaai i le malamalama i luga, ma o i latou tou te o faatasi o le a latou iloa o loo e saili mo se mea e maualuga atu.” Ua ou iloa o le auala sili ona lelei e faatumau ai lau vaai i le malamalama i luga o le pulea o ou mafaufauga e ala i le taulotoina o mau, solo, viiga, ma isi mea faagaeetia. Ma a oo ina faaosoosoina i tatou i mafaufauga le mama pe le lelei, e mafai ona tatou suia na mafaufauga i mafaufauga lelei ae tulei ese ia mafaufauga le mama ma lē atoatoa.
6Ia i ai se ata o se malumalu i totonu o lou potu. A o laiti le ma fanau, sa ma fai atu ia i latou e filifili se malumalu na i ai se uiga faapitoa ia i latou. Ona matou faatauina mai lea o ata o malumalu na filifilia mo o latou potu e fesoasoani latou te manatua ai le taua o le malumalu ma le agavaa i taimi uma e ulu atu i le malumalu. O loo i ai se mea mamana i le vaaia o se ata o le malumalu i lea aso ma lea aso ma faaaoga lena ata e toe fai ai a tatou lava tautinoga e tumau le agavaa e alu atu i le malumalu. Atonu foi e te manao e tuu sou lava ata i talaane o le malumalu e faamanatu atu ai ia te oe, o oe o se tasi o le malumalu!
7Faaalu le taimi e atiinae ai au taleni ma ia avea ma tagata ua faamoemoe le Tama Faalelagi e avea ai oe. Ua faamanuiaina i tatou i le i ai o le polokalama a Tamaitai Talavou o le Alualu i Luma o le Tagata Lava Ia, ma le polokalama a le Perisitua Arona o le Tiute i le Atua. O le faamoemoega o ia polokalama taitasi ia fesoasoani ia i tatou ia avea e pei o le Faaola e ala i le faatutuina ma le ausia o sini aoga, atiinae uiga ma tomai o le olaga, faamalolosia o tatou aiga, ma fesoasoani ia i tatou i le atiinae o le faatuatua ia Iesu Keriso.
8A atoa lou 12 tausaga, ia alu i le malumalu e faia papatisoga mo e ua maliliu i soo se taimi e mafai ai. Ua tatou ola i se vaitaimi faamanuiaina ina ua i ai ni malumalu se 124 i le fogaeleele. O le toatele o outou e mafai ona o atu i le malumalu o se vaega o le autalavou ma aiga. Ae e tusa pe leai se malumalu e lata atu ia te oe, e mafai ona e fiafia i faamanuiaga o le malumalu e ala i le aoao atili e uiga i le malumalu ma ia agavaa i taimi uma e umia se pepa faataga o le malumalu. A o avea au ma se peresitene o le misiona, sa leai se malumalu a le matou misiona, o lea sa le mafai ai ona o atu a matou faifeautalai i le malumalu i le taimi o a latou misiona. I le taimi muamua, sa ou le manatu e uunaia i latou ia i ai se pepa faataga o aoga pea o le malumalu. Ae i le faaiuga o le 1994 na fautuaina ai e Peresitene Howard W. Hunter (1907–95) tagata matutua o le Ekalesia ia i ai se pepa faataga o aoga pea o le malumalu—e tusa pe latou te le o nonofo latalata i se malumalu.5 I le isi a matou faatalanoaga na sosoo ai ma a matou faifeautalai, sa ou aoao atu ai lenei mataupu faavae ma faia se faatalanoaga mo pepa malumalu mo a matou faifeautalai taitoatasi. O se matuai faamanuiaga lea mo le matou misiona ma a matou faifeautalai!
Ia faamanuia outou e lo tatou Tama Faaleleagi ina ia faaauau pea ona outou sauniuni, faatasi ai ma filifiliga taitasi tou te faia, ia tutu i mea paia i le taimi nei ina ia outou agavaa i taimi uma e ulu atu i le malumalu paia o le Alii. O outou o se “autalavou tautupu”6 o loo tatou pepese ai. O outou o le “faamoemoe o Isaraelu.”7 E tatau ona outou saunia e ausia galuega maoae o le amiotonu ua auina mai ai outou iinei e le Alii e fai. Ia faamanuia outou e le Atua, au uo talavou pele, ia saunia ma le maelega ia agavaa e ulu atu i le malumalu ma tofo i sauniga paia ua saunia e lo tatou Tama Faalelagi mo i tatou taitoatasi.