Elder Quentin L. Cook
O Se Loto ma se Mafaufau Naunautai
I se aso sa faia ai se faataitaiga o se mu i le aoga maualalo a Logan, Iuta, ma o le taitai o le faataitaiga o kapeteni Joe Cook, o se taitai o tamaiti aoga e i le vasega ono, sa fuafua e faamauina se taimi lelei lava. Sa fiafia o ia, ina ua tatagi le logo, sa amata loa ona faataalise le o ese o tamaiti aoga. “O le a faatu nei se matatia o le taimi,” o mafaufauga na o le talavou o Joe. “O le a lauiloa foi i matou.” Ae ina ua foliga mai ua i ona lima le tulaga lauiloa, ae faalogoina loa e Joe le faasilasilaga: “O loo i ai pea se tasi i totonu o le fale. E le’i uma ese tagata mai le fale.”
Ina ua mou ese atu se matatia na fuafuaina, sa iloa atu e Joe Cook se tamaitiiti aoga o le vasega muamua o aluese mai le faleaoga. O lona uso laitiiti o Quentin! Ua le maua e Joe lona avanoa e tusia ai lona igoa i le talafaasolopito o Cache Valley ona o lona lava tino ma lona toto!
Na e’e atu Joe ma le le fiafia, “O le a lau mea sa fai?”
Sa uu i luga e Quentin se pea seevae tuai ma faapea atu, “Joe, e te iloa foi [ma ta’u atu le igoa o sana uo] o nisi taimi na te seeina ai ni seevae sa faaaoga e se isi ma e fai si lapopoa mo ia. Ina ua tatagi le logo o le faataitaiga, sa tamoe ese mai o ia ae mamulu ai seevae nei. E le’i manao o ia e faaleaga le faataitaiga, o lea na ia tuua ai ae tamoe i fafo e leai ni seevae. Sa ou toe foi i totonu e aumai ona seevae ona ou te le manao e maluluina ona vae i le kiona.”
O se tala faamomoiloto faapea e faaalia ai le tautinoga sa ia Elder Quentin La Mar Cook mai lava i lona talavou seia oo ina matua i mea e taua i le loto ma mataupu faavae sa aoaoina e le Faaola. “Sa ou iloaina Quentin i lo’u olaga atoa,” o le tala lea a sana uo a o laiti ma sana soa faifeautalai i le lumanai o Lee Burke, “ma na te le’i faia lava se mea e faalumaina ai o ia, o lona aiga, po o lana Ekalesia.” Sa silafia e le Alii le taunuuga o lenei alii talavou ma sa matuai manino lava i lona tina pele o Bernice, ina ua faailoa atu i lona faamanuiaga faapeteriaka e faapea o lana fanau tama o le a “aumaia le mamalu” i le aiga ma “o le a malolosi i le tuleiina i luma o le galuega a le Alii.” Sa faia lava e na atalii, ma o le a faaauau pea ona faia e Elder Quentin L. Cook i lona valaauga o se Aposetolo a le Alii o Iesu Keriso.
Aoao mai Isi
Na soifua mai i le aso 8 o Setema, 1940, i Logan, Iuta, ia J. Vernon ma Bernice Kimball Cook, sa aoaoina e Quentin mai lona tama a o laitiiti ia le taua o le faatutuina o sini ma galue agai i ai.
“E tolu lava tulafono a lo’u tama,” na saunoa ai Elder Cook. “Muamua, e ao ona i ai ni a matou sini e aoga. Lua, e mafai ona matou suia a matou sini i soo se taimi. Ae o le lona tolu, po o le a lava se sini ua matou filifilia, e ao ona matou galulue ma le maelega agai i ai.”
O ana talanoaga faifaipea ma lona tama sa aoaoina ai o ia ina ia mataituina i latou o loo siomia o ia ma faaaogaina mea silisili na te aoaoina mai ai ia te ia lava. “E tele naua mea e ofoina mai e tagata ia i tatou pe afai tatou te naunau e aoao mai ia i latou,” na saunoa ai Elder Cook. “O le mafuaaga lena e taua ai le siomia o lou tagata e ni tagata lelei.”
Sa ia maua lena avanoa i le ola ae ai i Logan. Mo se faataitaiga, na te toe manatuaina lona faalogologo ma le toto’a a o saunoa i le sauniga faamanatuga ia Elder L. Tom Perry, lea ua avea nei ma se tasi o le Korama a Aposetolo e Toasefululua, a o avea lena ma se alii talavou faatoa taliu mai le Taua Lona II o le Lalolagi, e uiga i ona aafiaga. O lena taimi na sili ona faagaeetia ai o loo tumau pea ona avea ma se tasi o mea sili ona malosi na te manatuaina mai lona laitiiti.
A o talavou o ia, sa fiafia tele ia Elder Cook i taaloga, sa fesoasoani i ‘au a lana aoga e manumalo i le pasiketipolo ma le lakapi faaAmerika i le setete atoa. O le isi foi mea e fiafia i ai e aofia ai felafolafoaiga faafinau ma polokiki. I le avea ai ma se alii e 16 tausaga le matua, sa avea o ia o se tasi o alii talavou e toalua na filifilia e fai ma sui o le setete i se fuafuaga faaleatunuu. O iina na ia maua ai le avanoa e feiloai ai i peresitene o le Iunaite Setete i lena taimi ma le lumanai, o Dwight D. Eisenhower, John F. Kennedy, Lyndon B. Johnson, Richard M. Nixon, ma Gerald R. Ford. O le vaaia o i latou o galulue i le faiga o tulafono, na matuai ootia ai o ia ma na fesoasoani e uunaia ai lana filifiliga e suesue i le tulafono.
A o lei alu i le misiona, sa aoga Elder Cook i le Iunivesite o le Setete a Iuta, lea na filifilia ai o ia i le ofisa o le au taitai o tamaiti aoga faatasi ma lana uo o W. Rolfe Kerr, o le na valaauina mulimuli ane i le Korama Muamua a Fitugafulu ma o loo tautua nei o se Komesina o le Ofisa o Aoga a le Ekalesia.
Mai le 1960 i le 1962 sa auauna atu ai Elder Cook i le Misiona a Peretania, o le misiona lava lea e tasi o le a valaauina i ai a’u. Sa matou maua ni aafiaga loloto mai lo matou peresitene o le misiona o Elder Marion D. Hanks, a o avea lena ma Fesoasoani Muamua o le Au Fitugafulu. I ana faifeautalai uma lava, sa ia faamamafaina ai le avea ma se soo naunautai. Sa ia aoaoina i matou ia alolofa i le Faaola, ia teufatuina le Tusi a Mamona, ia faamaoni i le Ekalesia ma le talalelei i aso o totoe o o matou olaga. O lenei, ua silia ma le 45 tausaga mulimuli ane, o se mea e seasea ona tupu le i ai o ni faifeautalai se toalua sa soa e auauna faatasi i le Korama a le Au Aposetolo e Toasefululua.
E faaauau pea le lisi o alii ma tamaitai lelei sa ia maua le avanoa e aoao mai ai, ae na taua e Elder Cook o le toatele o i latou i lena taimi latou te lei umia ni tulaga maualuluga. O i latou lava o ni tagata lelei.
Na saunoa Elder Cook, “E mafai ona tatou aoao mai aoaoga faavae, e mafai ona tatou aoao mai faataitaiga lelei. Ae a e maua ni tagata latou te tuufaatasia le lua lena, o o latou olaga e ogatasi ma mea ua latou aoaoina i le talalelei a Iesu Keriso, o se tuufaatasiga matagofie tele lena. Ma o nei tagata e le faapea e tatau ona avea ma ni Au Pulega Aoao pe i ai ni galuega maualuluga. Soo se ituaiga vaega lava e maua ai na ituaiga o tagata.”
O Le Uunaiga a le Aiga
E ui ina ua faamanuiaina Elder Cook e maua ni fegalegaleaiga lelei i lona olaga atoa, ae o i latou ua i ai ni uunaiga aupito maoae, o tagata ia o lona lava aiga.
Na te faafetaia se tama alofa ma le aafia i soo se mea, ma se tina na “alofa i le Faaola. Sa laua faia mea uma na mafai e tausi ai i latou i le ala sao.” Na te talisapaia le alofa ma le lagolago a lona uso o Joe, ma lona tuafafine o Susan.
O se tasi o uunaiga aupito taua o lona olaga na tupu ina ua 15 ona tausaga. Sa manao lona uso o Joe, e alu i se misiona, ae o lona tama—o se alii lelei o le sa le toe fiafia i gaoioiga a le Ekalesia—na manatu e sili atu ia Joe ona a’oga faafomai. Sa faaaloalo tele Joe ma Quentin i lo laua tama, o lea sa la tuumuli ese ai na o i laua e mafaufau i lana fautuaga.
Na leva le po o la talanoa, ma vaavaai i itu lelei ma itu faalelelei o filifiliga taitasi. O le iuga lava, o le mea na la filifili o lenei: Afai o le Ekalesia ua na o se isi lava faalapotopotoga lelei, o le a sili atu le lelei ona fesoasoani o Joe i tagata i le alu lea i le a’oga faafomai. Ae peitai, afai o loo soifua moni lava le Faaola, afai o Iosefa Samita o se perofeta moni, afai o le Ekalesia sa ia faatulagaina i lalo o le faatonuga a le Atua o le Ekalesia moni lea a Iesu Keriso, afai e moni le Tusi a Mamona, o lona uiga ua manino lava le tiute o Joe. O le taeao na sosoo ai na alu atu ai Joe i lona tama ma lena manatu ma tuuina atu lana molimau. E le’i umi, ae malaga loa o ia i lana misiona, faatasi ai ma le lagolago a lona tama ma faamanuiaga fiafia a lona tina.
O lena talanoaga sa matua o’oo’o le aafia ai o le taulealea o Quentin. O taimi uma lava sa i ai sana lava molimau e uiga i le Faaola. Ae, o Iosefa Samita, o le Ekalesia, o le Tusi a Mamona—o se tasi lea mataupu i le taulealea e 15 tausaga le matua. Sa talitonu o ia, ae na te le’i maua i le taimi lena se molimau faaleagaga e faamautuina ai lo latou moni.
Ina ua la faamavae ma Joe i lena po, sa alu Quentin i lona potu, ma tootuli ai i le tatalo, ma ole atu mo lena lava molimau e tasi na maua e lona uso, o se molimau sa ia manao i ai ma lona loto atoa. Ma sa oo mai i se auala sa matuai mamana ma sa faapea ona tafiesea ai e faavavau soo se masalosaloga sa ia te ia.
Faamemelo ia Mary
O se tasi o uunaiga maoae i lona olaga o lona faletua lea o Mary. “O le a matuai faigata ona sue se tagata i le lalolagi atoa e pei lona lelei ma lona amiotonu ma le fiafia e pei o ia,” o le saunoaga lea a lana tane. “O loo ia te ia se sane matagofie o le aga malie.”
E faamaonia foi lena iloiloga e le afafine o Cook o Kathryn Cook Knight. “O Papa o se tama atoatoa,” o lana tala lea. “Ou te fiafia i mea uma lava e uiga ia te ia. Ae o lo’u tina o se agelu.”
O Sister Cook e talenia tele i le musika, sa faiaoga i le musika ma faatumulia lona fale i musika. O le mea moni, o le mea muamua sa masani ai Elder Cook ia Mary o se faatasiga o faaaliga taleni a le vasega fitu. Na te manatuaina, “le alu i luga o lenei teineitiiti lauulu samasama vaivai ma usu le pese ‘I le Itu Lagilelei o le Auala.’ E tusa lava pe o le aoga maualuga faaleogalua, ae sa maoae le manaia o lona leo faatagata matua. Sa matuai ou ofo ai lava. Ma e mafai ona avea lena pese ma autu mo aso uma e totoe o lona olaga. O ona uiga e tausaafia ma fiafia.”
A o la aooga, sa tele ni avanoa a le toalua lenei e galulue faatasi ai. I le aoga maualuga faaleogalua, sa filifilia le alii o se peresitene o le pulega a tamaiti aoga, ae filifilia [Mary] o le sui peresitene. Sa la i ai faatasi i felafolafoaiga faafinau. Ma i le avea ai ma peresitene o le vasega faauu i le aoga maualuga, sa la galulue faatasi ai ma [Mary] o ni taitai i le au pulega a tamaiti aoga.
“Ua leva ona avea i maua ma se uo a o lei taitai lava tutupu isi mea,” o le tala lea a Elder Cook. “Sa ou faamemelo ia te ia a’o le’i oo ina ou alofa ia te ia, ma o le faaipoipo atu ia te ia o le filifiliga aupito sili lena ua ou faia.”
Sa faaipoipo Elder ma Sister Cook i le Malumalu o Logan Iuta i le aso 30 o Novema, 1962.
Alofa i Tagata mai Itu Uma o le Olaga
Ina ua uma ona faauu o ia mai le Iunivesite o le Setete o Iuta i le 1963 ma se tikeri i le saienisi i tulaga faapolokiki, sa siitia atu loa Quentin ma Mary i Kalefonia, lea na maua ai lona tikeri o le Fomai o le Tulafono mai le Iunivesite o Stanford i le 1966. Ona auai atu lea o Elder Cook i le ofisa loia i le Eria o San Francisco Bay o Carr, McClellan, Ingersoll, Thompson ma Horn.
O iina sa ia filifili ai e faapea “e tatau lava ona iloa mea ou te talitonu i ai ma pe o ai foi au.” I lana galuega i le tulafono o pisinisi ma le tausiga o le soifua maloloina, sa fegalegaleai ai Elder Cook ma le au faitofa ma tagata maumea. E manatua e le atalii o le au Cook o Larry lona ootia ona o le matuai faaaloalogia o lona tama e tagata faipisinisi ma tagata lautele. “Sa ou auai i le taumafataga mo tagata litaea na faamamaluina ai Papa ina ua ia tuua lona ofisa loia ma mulimuli ane foi ina ua faamavae mai le tulaga faaletaitai o se polokalama o le soifua maloloina.” Na taua ai e Larry, “sa ou maofa ona sa auauai mai lea paaga ma lea paaga, e le o latou o ni tagata o le Ekalesia, e saunoa—o le tele lava sa faia ma loimata—i le uiga o Papa ia i latou, i lona taialaina ma le fafagaina o i latou, i lona faalauteleina ma le le manatu faapito o a latou galuega e aunoa ma se lagona e faapea na aveesea ai ona lava taimi ma lona malosi.”
I le taimi lava lena, o lana tautua i le Ekalesia na oo atu ai i ni fegalegaleaiga faapelepele ma tagata o le ekalesia e ese a latou aganuu ma o o latou tulaga faaletamaoaiga sa matuai va i sini le eseese. E ala i aafiaga faalegaluega ma le Ekalesia, na ia atiina ae ai le gafatia ona malamalama ma fesootai atu i tagata mai soo se itu o le olaga, ma na tuputupu ae lona alofa mo tagata uma.
Na valaauina o ia e auauna atu o se epikopo, sosoo ai ma se fesoasoani i le au peresitene o le siteki (i lona uso matua faapelepele o Joe!), ma mulimuli ane o se peresitene o le siteki. I lena taimi sa galue o ia e le gata i uarota e fenanui [Igilisi], ae faapea foi aulotu na tautatala i le gagana Sipaniolo, Toga, Samoa, Takaloka, Meniterini, ma le Kenitonisia.
O nisi o tagata o le ekalesia sa itiiti lava le aoaoga ma utiuti ni seleni. Ae sa tele naua mea na latou tuuina atu. Na te manatuaina ma le alofa “se tasi o alii maoae na ou iloaina” o le sa faigaluega i le tilivaina o falaoa ma sa valaauina i se au epikopo. Sa vaai le alii i taitai o le uarota latou te aveina atu ni atotaitai i a latou fonotaga, o lea na tonu ai e ave foi sa na ato. Ae talu ai ona e le’i i ai se mea e tuu i totonu o lana ato taitai, o lea sa ia faatumuina ai i papa falaoa e tufatufa atu. O le naunautai o lenei alii lotomaulalo e auauna atu sa sili atu ona o lona lava alofa i isi.
Na saunoa Elder Cook, “o galuega faapitoa po o le maualuga o aoaoga e le o mea na o loo ou fai atu ai pe a ou fai atu ia aoao mai i tagata lelei. E mafai ona e maua tagata lelei i soo se mea ma aoao mai ia i latou uma lava.”
O Le Saunia i le Aiga
O le tausiga o le la fanau e toatolu i le eria i San Francisco faatasi ma lona faletua, sa taumafai ai ma le totoa ia Elder Cook ia atiina ae se mafutaga vavalalata ma lana fanau taitoatasi e ui lava i le pisi o le galuega ma valaauga o le Ekalesia.
Fai mai a ia, “E taua, aemaise lava ia i latou e i ai ni tofiga faaleautaitai i le Ekalesia, ona i ai se sootaga ma a latou fanau lea e mafai ai e tamaiti ona iloa o latou uiga o loo i ai, ia faatatau i se siosiomaga e matuai ese mai nai lo le lotu—pe o le galue i le lotoa po o le taaalo i taaloga po o le fai faatasi o se mea i fafo.”
O le manatuaina o se faataitaiga o le faaalia o le alofa, ae le o le aoao atu, e manatua ai e le atalii lona lua o le au Cook o Joe, le le nofonofo lelei o lona tama e uiga i le foi atu o Joe i le taavale i San Francisco ina ua uma ana suega o le kuata muamua i le Iunivesite o Polika Iaga. O le faaiuga o Tesema, atonu o le a poloka le auala i le kiona, ma o le a lelava o ia. I le faaiuga o le kuata, sa tali atu ai Joe i le tuitui mai o lona faitotoa o lona potu i le nofotumau, ma vaaia ai lona tama o tu mai ai, na lele atu i le vaalele mai Bay Area ina ia la malaga toalua atu ma lona atalii i lana malaga i le fale. Fai mai Joe o lena mea, e le gata o se faaalia tele o le alofa o lona tama mo ia, ae o le taimi foi na talanoa ai i le malaga atu i le fale—na faatumulia i talanoaga i mataupu eseese o le talalelei ma molimau faifaipea e uiga i le Faaola—na avea o se tasi o taimi na sili ona faatosina i le vaaiga a le talavou o Joe i le mea sa ia manao i ai i molimau ma lona lava lumanai faaletama.
E pei ona faia e lona tama, sa aoaoina e Elder Cook lana fanau ina ia faatutu ni sini ma ia iloilo le aafiaga o amioga ma gaoioiga i le ausiaina o na sini. E faatutu foi e le au Cook ni sini o se aiga sa faapea ona taulai muamua atu i le talalelei. E talitonu Elder Cook e faapea, afai e usitaia e se aiga ia masani talafeagai faalelotu, e pei o tatalo faaleaiga, suesuega faaleaiga i tusitusiga paia, ma afiafi faaleaiga e le aunoa, e mafai ona tausia i soo se mea ia fanau i le amiotonu.
O le ki lava, na saunoa Elder Cook, o le usitai patino, ma faaletagata lava ia i talitonuga faalelotu. “O le savali atu i faitotoa o [potu] o lau fanau ma vaaia i latou o suesue i tusitusiga paia pe o tootutuli foi e tatalo, o le mea lea e tasi e sili ona taua ia te au o se tama,” o lana saunoaga lea.
Ae o le usitaia e tagata taitoatasi o tulaga faalelotu atonu e sili atu ona atiinae “pe afai o le usitaia e lou aiga o tulaga faalelotu o loo manino i lau fanau o isi sini o le olaga, e pei o le galuega ma aoaoga, e mulimuli mai i le mauaina o se molimau i le Faaola ma le ola amiotonu.”
Saunia e Auauna Atu
I le tolusefulu tausaga o i ai i Kalefonia, na siitia ai Elder Cook mai lea tulaga aloaia i le isi, i lana galuega ma le Ekalesia. Sa siitia mai le tulaga faaofisa amata ma avea ma paaga soofaatasi i le kamupani, ma oo atu ai lava ina avea ma paaga faapulega i lana ofisa loia, ma na sosoo ai ma le faafaigaluegaina e avea o se peresitene ma le Faatonu Sili [CEO] o le Tausiga Faasoifua Maloloina a Kalefonia, lea na faapea ona tuufaatasia ma le Ofisa Soifua Maloloina o Sutter, lea na avea ai o ia ma sui taitaifono.
I lena taimi sa auauna atu o ia o se sui risone ma Pule Eria a o lei valaauina o ia o se sui o le Korama Lona Lua a Fitugafulu i le 1996. Sa tofia o ia i le Korama Muamua i le 1998.
I le avea ai o se Pulega Aoao, sa auauna atu Elder Cook i le Au Peresitene o le Eria a Filipaina/Maikolenisia ma sa Peresitene i Eria a Atumotu o le Pasefika, ma Amerika Matu i Matusisifo a le Ekalesia. O lona alofa i le Au Paia faamaoni i le lalolagi atoa o loo faaauau pea ona tuputupu ae.
I le avea ai ma Faatonu Sili i le Matagaluega o Faifeautalai a le Ekalesia, sa ia faia se sao taua i le atiinae o le taiala fou a faifeautalai, Talai La’u Talalelei. Ae le taliaina e Elder Cook se faaviivii atu ona o ia tulaga. “Sa i ai lava le aao o le Alii mai le aso muamua,” na ia saunoa ai. “E tele se fesoasoani a sui taitoatasi uma o le Au Peresitene Sili ma le Toasefululua.”
Nofo Sauni ma le Naunautai
Ua saunia lelei Elder Cook e auauna atu i le Korama a Aposetolo e Toasefululua. O lona naunau e aoao mai i isi ma lona soifua auauna lē manatu faapito i le olaga atoa ua mafai ai ona ia ofoina atu i le Alii lona loto ma lona mafaufau naunautai.
“Sa ou faaaloalo, lagolagoina, ma faamamaluina i latou uma na avea ma Aposetolo,” na ia saunoa ai. “O a latou uunaiga ia te au ua matuai maoae lava. Ou te le iloa pe o le a so’u sao o le a i ai, ae ua ou iloa o Iesu Keriso o le Faaola, o le Atua o lo tatou Tama oi le Lagi, o Iosefa Samita o le perofeta o le tisipenisione lenei, ma o loo i ai so tatou perofeta i aso nei. O lena malamalama o le totonugalemu lea o lou olaga.”
E mafai ona tatou mautinoa o lena malamalama o le a faaauau pea ona avea ma totonugalemu o le galuega faaaposetolo a Elder Quentin L. Cook.