Siya Miingon Kanako, “Dili Mahimo”
“Tungod kay bisan kinsa nga tawo nga moinom og bino o isug nga ilimnon taliwala kaninyo, tan-awa kini dili maayo, ni angay sa panan-aw sa inyong Amahan” (D&P 89:5).
Kanunay ko nga maghunahuna nga ang akong labing suod nga higala, si Chase, mobuhat sa bisan unsa nga butang. Sa dihang gisulayan nako siya sa pagpaambak sa kinatumyan sa akong beranda, wala lamang siya mohimo niini, apan gihimo niya kini nga nagdagan!
Sa dihang gisulayan nako siya sa pagpasakay sa nagtuwad nga roller coaster, wala lamang siya mosakay niini, apan misakay gayud siya sa atubangan nga lingkuranan!
Ug sa dihang giingnan ko siya nga dili siya makahimo sa pagsulti og hi ni Julia—ang kinagwapahan nga babaye sa tibuok eskwelahan—wala lamang siya moingon og hi, apan milingkod siya ug nakig-istorya kaniya sulod sa lima ka minuto!
Naghunahuna ko nga si Chase mobuhat sa bisan unsa nga butang. Hangtud karon, ingon niana gihapon.
Si Chase moadto sa akong balay hapit kada adlaw. Nagpuyo kami nga duol ra gayud kaayo sa usag usa. Adunay usa lamang ka balay nga nakauwang sa among mga balay. Apan si Chase dili moadto kon Dominggo o Lunes. Ma-Dominggo moadto siya sa simbahan. Ma-Lunes siya adunay mora og usa ka gabii alang sa pamilya. Gidapit ko niya mga duha na ka higayon. Nangaon kami og brownies ug nagduladula. Makalingaw kadto.
Kasagaran si Chase moadto sa akong balay human sa klase. Nindot kaayo nga anaa siya tungod kay ang akong mama ug papa anaa pa sa trabahoan. Ang pagpakigdula uban ni Chase makalingaw. Ganahan kaayo kami nga magkomedyahanay. Si Chase higala sa tanan. Wala gayud ako makadungog kaniya nga magsulti og bati mahitungod sa laing mga tawo—bisan kon ang tanan nagbuhat sa ingon.
Karong adlawa si Chase ug ako nagdula og basketball. Init kaayo, mao nga nangutana ako ni Chase kon gusto ba siya og mainom.
“Sige,” miingon si Chase, samtang iyang gipaligid ang bola ngadto sa sagbutan ug midagan paingon ngadto sa akong atubangan nga beranda.
Misulod kami ug miadto sa kusina. Samtang akong giablihan ang refrigerator, ang kabugnaw sa hangin mipabarug sa mga balhibo sa among mga bukton. Sa una nakong pagpasiplat sa sulod sa refrigerator, nakakita lamang ako og juice ug gatas. Dayon, usa ka abli nga lata didto sa suok akong nakit-an.
Gibiyaan sa akong papa ang abli nga lata sa beer. Dili gayud niya mahibaloan kon moinom kami og duha lang ka tungab. Akong gikuha pagawas ang lata.
“Gusto ka ba nga mosulay?” Nangutana ko.
“Unsa man na? Nangutana si Chase.
“Beer ni,” miingon ko. “Ang akong papa pirme moinom niini. Dili siya makahibalo kon motungab lang kita og kausa.”
Si Chase mitan-aw kanako. Giisa niya ang iyang kilay ug nanighawak. Dayon misulti siya og butang nga wala nako damha nga akong madungog nga iyang isulti.
“Dili mahimo!” Miingon si Chase.
“Miingon ka ba nga dili?” Nangutana ko.
“Ang beer dili makaayo nimo,” miingon siya. “Dili kita angay nga moinom niini. Makapahimo kini kanimo sa pagbuhat og dili maayo nga mga butang.”
“Dili man kon motungab lang ka og gamay,” miingon ko. “Tan-awa, pakit-on ko ikaw.”
Akong giisa ang lata sa akong ba-ba, mitungab og gamay, ug mipahiyum. Kini walay lami, apan dili ko gusto nga bating tan-awon.
“Tan-awa? Nalain na ba ko tan-awon para nimo?” Nangutana ko.
“Mouli na lang tingali ko sa balay,” miingon si Chase. “Ayaw na og inom niana. Dili kini maayo nga ideya.”
Samtang nagtan-aw ko ni Chase nga naglakaw pagawas sa pultahan ug nagdagan paingon sa daplin sa karsada balik ngadto sa iyang balay, dili nako mapugngan nga maghunahuna kon ngano nga siya mobuhat sa bisan unsa nga butang apan dili motungab og bisan gamay lang nga beer.
Miusab ko og tungab human makabiya si Chase. “Pastilan! Pagkawala gayuy lami niining butanga,” naghunahuna ko samtang akong gibutang og balik ang lata didto sa suok sa refrigerator.
Tingali sakto si Chase.
Paghulagway pinaagi ni John Zamudio; Si Jesukristo, ni Harry Anderson, sa maayong kabubut-on sa Church History Museum