Hilabihan ba Ako ka Busy sa Pagserbisyo?

Ngozi Francisca Okoro, Nigeria

Niadtong 1997 ang among presidente sa branch mipahibalo nga ang branch mohimo og proyekto sa pagserbisyo sa kasilinganan palibut sa among balay tigumanan. Naghimo kamo niini nga kalihokan aron sa pag-apil sa mga miyembro sa Simbahan sa tibuok kalibutan sa pagsaulog sa ika-150 nga anibersaryo sa pag-abut sa mga pioneer nga mga Santos sa Ulahing mga Adlaw diha sa Walog sa Salt Lake.

Ang kalihokan naglakip sa paglimpyo sa mga kalsada ug pagtapak sa mga libaong. Ang presidente sa branch miingon nga kami magkahugaw apan ang kalihokan maghatag kanamo og oportunidad sa pag-istorya sa uban kabahin sa Simbahan.

Wala ako maghunahuna nga moadto tungod kay ang akong propesor nag-iskedyul og dugang nga mga lecture sa samang panahon sa kalihokan. Mibati ko nga ang tanan makasabut, apan sa dihang nakabasa sa usa ka pamphlet nga giulohan og Faith in Every Footstep [Hugot nga Pagtuo sa Matag Lakang]. Sa dihang akong nabasa ang mga kinutlo kabahin sa mga kabudlay sa mga Santos sa ilang paglalin padulong sa kasadpang Estados Unidos, ako nakahilak. Pipila sa mga Santos mibiya sa ilang komportableng panimalay aron sa pag-adto sa disyerto, walay kasiguroan unsa ang ilang makita. Ang uban mipadayon bisan pa sa kamatayon sa matag sakop sa pamilya sa ilang giagian. Diha sa tunga-tunga sa kasakit, kagutom, ug kaalaut, sila adunay hugot nga pagtuo nga kon sila molalin padulong sa Kasadpan, sila maluwas gikan sa pagpanglupig.

Mibati ako og kalooy nga ang mga nag-unang mga Santos kinahanglang mohimo og dako nga mga sakripisyo, bisan ang ilang kaugalingon nga kinabuhi sa pipila ka hitabo, sa pagsiguro nga ang Simbahan magpadayon sa unahan. Tungod sa ilang sakripisyo ug hugot nga pagtuo, karon ako nagtagamtam sa mga panalangin sa ebanghelyo.

Dayon ako nakaamgo unsa ka gamay ang sakripisyo nga akong pagabuhaton pinaagi sa pagtandi. Gihangyo ako sa paghatag og duha lamang ka oras sa pagserbisyo ug sa pagpakigbahin sa ebanghelyo uban sa pipila ka mga tawo, ug ako naghimo og mga pasangil nga dili moapil.

Gikalimtan nako ang kabahin sa lecture ug miapil sa kalihokan. Nagkahugaw ko, apan ang mga tawo miabut ug nangutana kabahin sa Simbahan. Mibati ko og kalipay nga nakaapil, ug taud-taud na sukad nga nakagradwar ko sa unibersidad—bisan wala makatambong og pipila ka mga lecture.