Usa ka Pamilya sa Kahangturan
Unsa sa sinugdanan nga ingon usa ka trahedya sa katapusan midala sa pamilya Uanci ngadto sa templo.
Sa dihang una nakong nahimamat si Uanci Kivalu, dako kaayo ang iyang pahiyum. Apan sa dihang milingkod siya ug nahimong seryoso ang iyang tuno, naghunahuna ko kon unsa ang ipaambit niining mahigalaon nga 16 anyos. “Ang akong istorya mao ang kabahin sa templo,” miingon siya.
Si Uanci gikan sa Tonga, usa ka isla nga nasud nga puno sa tag-as kaayo nga mga lubi, nindot kaayo nga mga saging, ug dagko nga mga tanum nga gabi. Kadaghanan sa kabatan-onan nga nakita nako sa isla ingon og kontento sa kinabuhi, nga adunay mga pahiyum nga ingon ka dako sama sa nakita kang Uanci pipila lang ka gutlo dili pa lang gayud dugay. Ang kabatan-onan sa Tonga nga kaedad niya ganahan nga mosayaw, mokanta, modula og netball, ug mogahin og panahon uban sa ilang mga pamilya. Sa kinatibuk-an malipayon sila nga grupo. Apan ang kaseryoso ni Uanci nasagulan og mas lawom nga emosyon nga dili nako maila, ug nakapatingala kini kanako.
“Ganahan kong maghisgut kabahin sa templo,” iyang gibalik.
“Sa akong pagdako,” sugod ni Uanci, “ang akong mga igsoong lalaki ug mga igsoong babaye ug ako mga miyembro sa Simbahan. Magsimbahan kami kada Dominggo uban sa akong mama. Gusto ko sa templo, ug gusto ko nga moadto uban sa mga batan-on aron sa pagbuhat og mga bunyag alang sa mga patay. Mobati ko sa Espiritu kon moadto kami didto. Apan ang akong papa dili moadto sa simbahan.”
Ang tingog ni Uanci nagsugod sa pagkurog. Mipasiplat ko gikan sa akong papel ug nakita ang iyang mga luha diha sa iyang mga mata.
“Usa ka adlaw ang akong manghud nga lalaki si ’Alekisio adunay samad sa iyang hawak nga nagkaimpeksyon,” siya mipadayon. “Naayo siya og kadiyot. Ug ang akong papa mibalik sa simbahan. Apan ang akong papa nawala na pud og balik.”
Ang mga luha nagdagayday na sa aping ni Uanci, ug ang tissue nga akong gihatag kaniya daling natumog, ingon man ang iyang buktonan, samtang naningkamot siya apan napakyas sa pagpahunong og agas sa mga luha.
“Migrabe ang akong manghud nga lalaki, ug dayon namatay siya. 12 anyos pa lang siya.”
Mihunong og kadali si Uanci, wala kapugong sa iyang mga pagbati, ug nakasabut na ko kon ngano nga hilabihan siya ka seryoso. Kining batan-on nga babaye nakasinati na og grabe nga trahedya sa iyang kinabuhi. Apan adunay kislap usab sa paglaum nga makita sa iyang mga mata.
“Dayon,” misugod na usab siya, “ang akong papa sa katapusan mihukom sa pagbalik sa simbahan. Sa sinugdanan, lisud kadto alang kaniya. Ang among bishop, mga lider, mga paryente, ug pamilya midasig kaniya nga ang bugtong paagi nga ang among pamilya mahimong magkauban og usab—nga makita og usab ang akong igsoong lalaki—mao ang pagka-sealed didto sa templo.
“Nanglimbasug kami human sa kamatayon sa akong igsoon,” mipadayon si Uanci. “Apan ang akong mga ginikanan naningkamot og maayo ug nadawat ang ilang mga ordinansa. Sa katapusan, na-sealed kami didto sa templo isip usa ka pamilya niadtong Oktubre 10, 2008, saktong usa ka tuig human sa kamatayon ni ’Alekisio. Ang akong bishop mao ang mibarug sa dapit sa akong manghud nga lalaki. Kadto ang hilabihan nga dili mahulagway nga pagbati nga akong gibati sukad.”
Ang mga luha ni Uanci dili mga luha sa kaguol kondili sa kalipay. Siya ug ang iyang pamilya nakaadto na sa balay sa Ginoo ug na-sealed sa templo, ug nahibalo siya kon unsa ang buot ipasabut niana. Kon ang iyang pamilya magpuyo nga takus sa ilang mga pakigsaad, mag-uban sila sa kahangturan.
Samtang naghunahuna ako mahitungod ni Uanci, naghunahuna ko kaniya nga naglakaw tabok sa Liahona campus, ang hayskul nga gipanag-iya sa Simbahan didto sa Tonga nga anaa nahimutang duol sa templo. Samtang naglakaw siya, si Uanci mitan-aw ibabaw sa spire ni anghel Moroni, nga ang bulawanon nga porma niini naggilaw-gilaw nga nabantang sa adlaw. May luha na usab sa iyang mga mata, apan nagpahiyum usab siya, kay nasayud siya nga iyang makita si ’Alekisio pag-usab.
Mga litrato sa pamilya pinaagi ni Joshua J. Perkey; litrato sa Nuku‘alofa Tonga Temple pinaagi ni Welden C. Andersen