Pagsaulog sa mga Pioneer

Matag Hulyo daghang mga miyembro sa Simbahan sa tibuok kalibutan mohunong og kadali aron sa pagpasidungog sa mga pioneer kinsa misulod sa Walog sa Salt Lake niadtong Hulyo 24, 1847. Ania ang usa ka kasinatian nga gipakigbahin sa usa ka batan-ong babaye kanamo:

“Usahay ang among ward adunay pioneer nga mga kalihokan,” nag-ingon si Analee B. sa Burke, Virginia, USA. “Ang mga tawo magsul-ob og pioneer nga mga sinina, ug kasagaran maghimo kami og morag ‘pagbaktas’—maglakaw gayud. Maghisgut usab kami mahitungod sa mga pioneer, ug magdula kami sa dulaon sa mga pioneer. Sa Virginia init gyud kaayo ug alimuot panahon sa ting-init, ug kami magsaulog kanunay niini sa gawas mao nga uban sa init nga panahon bation gayud namo nga sama sa mga pioneer.

“Alang kanako hapit kanunay ko nga nagbasa og usa ka basahon mahitungod sa kasaysayan sa Simbahan. Ang pagbasa niadto nga mga basahon mas nakapadayeg nako sa mga pioneer ug nakatabang kanako nga mas makasabut unsay ilang naagian.”

Giunsa man, sa inyong dapit, pagsaulog ang kaniadto ug karon nga mga pioneer sa Simbahan? Hinumdumi, ang mga pioneer mahimong maglakip ni bisan kinsa nga nag-andam sa dalan alang sa uban aron pagasundon.

Ang Akong Paborito nga Kasulatan

2 Nephi 32:5 nahimo na nakong paborito sukad sa Primary pa ko tungod kay nagsulti kini kaninyo kon unsa ang buhaton kon kamo hatagan sa gasa sa Espiritu Santo. Kinahanglan ninyong dawaton kini ug magpakatakus niini, ug dayon ang Espiritu Santo mogiya kaninyo sa matarung nga dalan.

Peaches C., 16 anyos, Trinidad, West Indies

Unsaon Pagbaton og usa ka Pagpamatuod

Ang pagpamatuod usa ka mahinungdanon kaayo nga bahin sa atong mga kinabuhi isip mga miyembro sa Simbahan. Aron makabaton og usa ka pagpamatuod, buhata ang unsay gidapit ni Moroni kanato nga atong buhaton: palandonga sa inyong kasingkasing ang mensahe o ang baruganan nga gusto ninyong mahibaloan nga tinuod; dayon mangutana sa Dios sa ngalan ni Jesukristo kon kini tinuod ba. Kadtong kinsa mopadayon niini nga dalan ug mangutana diha sa hugot nga pagtuo makabaton og usa ka pagpamatuod sa kamatuoran pinaagi sa gahum sa Espiritu Santo (tan-awa sa Moroni 10:3–5). Makapamatuod ako kaninyo nga kon mag-ampo kamo sa tibuok nga hugot nga pagtuo sa inyong kasingkasing, ang atong Langitnong Amahan motubag sa inyong pag-ampo.

Sa dihang usa pa ako ka investigator, midesisyon ko nga mag-ampo ug mangutana sa Langitnong Amahan kon ang tanan nga akong nasayran tinuod ba. Wala gayud sukad sa akong kinabuhi nga akong nakaplagan ang mga pulong aron mahulagway ang pagbati nga akong gibati, apan nasayud ako nga mao kadto ang tubag sa akong Langitnong Amahan tungod kay nakadawat ako og daghan nga mga panalangin gumikan niini.

Jordi R., 20 anyos, Santo Domingo, Dominican Republic

“Oo, ang tanan nga mga butang nga gikan sa yuta, sa panahon niana, gihimo alang sa kaayohan ug sa paggamit sa tawo, aron sa pagpahimuot sa mata ug sa pagmaya sa kasingkasing” (D&P 59:18).

Sa tuo: paglitrato sa pagdrama sa pioneer pinaagi ni Welden C. Andersen; mga paglitrato sa kinaiyahan pinaagi ni Deanna Van Kampen