Unsaon Nako sa Pagkahibalo
Pagtubo ngadto sa Pagkahibalo
Sa akong pagkat-on sa mga doktrina sa ebanghelyo, ang akong lisud nga mga kahimtang wala mausab, apan gibati nako nga mas malipayon.
Sa nag-edad pa ko og 14, pipila ka mga misyonaryo nga mga Santos sa Ulahing mga Adlaw ang miadto sa among panimalay ug mitudlo sa akong inahan ug kanako. Wala madugay sila midapit kanamo nga magpabunyag. Ang akong inahan mibalibad, apan ako miingon og oo. Kon lingion og balik, wala ko makahibalo nga ako nakabig. Sa akong hunahuna nga, sama sa daghang mga tin-edyer, gusto lang ko nga mobuhat og usa ka butang nga lahi kay sa naandan.
Nianang sunod nga tuig miadto ko sa simbahan nga nag-inusara. Wala gayud nako mabati nga ako nahiangay, ug wala ko makasabut kaayo sa unsay gitudlo. Apan aktibo ko. Pagka sunod tuig mipuyo ko layo sa panimalay ug mieskwela og usa ka eskwelahan sa hayskul nga gipanag-iya sa Simbahan didto sa Siyudad sa Mexico. Bisan og ganahan na ko sa hayskul atol sa akong unang pagbisita ug naningkamot og maayo nga dawaton sa eskwelahan (ug sa pagkumbinsir sa akong mga ginikanan nga tugotan ko nga moeskwela), kalit nakong namatikdan nga ang pagpuyo nga ako lang dili sayon. Wala pa gihapon koy pagpamatuod. Wala gyud ako makasabut kon kinsa si Joseph Smith o kon unsay gitudlo sa Basahon ni Mormon. Labaw sa tanan akong gibati nga wala ko nahiangay.
Siyempre, wala nako sultihi ang akong mga ginikanan. Migahin ko og daghang panahon sa pagkumbinsir nila nga tugotan ko nga moadto niining eskwelahana. Unsaon man nako sa pag-angkon nga dili diay tingali kini mao ang dapit alang kanako? Tungod sa akong garbo, hilum lang ko nga nanglimbasug.
Ang lisud nakong sitwasyon misamot sa dihang nakadawat ko og balita nga ang akong mga ginikanan magdiborsyo. Gibati nako nga daw ang tibuok kalibutan nahugno.
Mao kadtong puntoha nga ang akong bishop mipatawag kanako ug nangutana kon kumusta na ko. Gisultihan ko siya sa tanan nakong mga kapakyasan ug mga kagul-anan. “Akong gibati nga mora og ako wala na gyuy lain pang nahibaloan,” ako miingon.
Kadtong buotan nga bishop misugod sa pagtudlo kanako mahitungod sa ebanghelyo. Nagsugod kami kon unsaon ang tinuoray nga pagpakigsulti sa Langitnong Amahan. Dugay namong gihisgutan ang mahitungod sa Pag-ula. Gitudloan ko niya og mga kamatuoran sa ebanghelyo, ug sa unang higayon, akong gibati nga ako adunay usa ka pagpamatuod. Nalipay ko nga ako adunay mahuptan nianang walay kasigurohan nga panahon. Bisan og gibati nako nga walay gahum sa pagtabang sa akong pamilya, nakahimo ako nga mobati og kalipay nga maduol sa Langitnong Amahan. Nasayud ako nga Siya nakaila kanako, ug kana ang nakapausab sa tanan.
Tingali komon sa bag-o nga mga miyembro sa Simbahan nga mobati sama sa akong gibati mahitungod sa pagkawala mahiangay. Unsay akong nakat-unan mao nga dili igsapayan kon wala ninyo masabti ang tanan sa ebanghelyo diha-diha dayon. Unsay mahinungdanon mao nga kamo nakasabut sa inyong relasyon ngadto sa Langitnong Amahan ug nga Siya adunay katuyoan ug plano alang sa inyong kinabuhi. Kini mahinungdanon nga kamo nakasabut nga ang Manluluwas nag-ula alang sa inyong mga sala ug nga Siya hingpit nga nakasabut kaninyo, bisan kon walay lain nga nakasabut kaninyo. Sa dihang nahibaloan ko kini nga mga doktrina, ang uban nga mga butang nahan-ay ra.
Salamat sa gugma ug pailub nga pagtudlo sa akong bishop, ang hayskul nahimong positibo nga panahon sa akong kinabuhi. Ang pag-eskwela sa hayskul nga gipanag-iya sa Simbahan miusab sa akong panglantaw mahitungod kon si kinsa ako kaniadto ug unsa ang mahimong mahitabo sa akong kinabuhi. Sa dihang migradwar ako, mipuyo ko sa Siyudad sa Mexico. Ang unang butang nga akong gihimo sa dihang nakakita ko og dapit nga kapuy-an mao ang pagpangita sa ward didto aron makapadayon ko nga adunay usa ka dapit nga kadangpan, usa ka dapit diin mahimo ko nga motubo diha sa ebanghelyo.
Wala madugay human niana, miserbisyo ko og misyon sa Temple Square didto sa Siyudad sa Salt Lake. Akong nakaplagan ang dakong kalipay diha sa pagpakigbahin sa uban sa kamatuoran nga naghatag kanako og lig-on nga pundasyon diha sa samok nga panahon sa kinabuhi.
Mapasalamaton ko nga nahimong usa ka miyembro sa Simbahan. Nasayud ko nga ang Langitnong Amahan nagtan-aw sa matag usa kanato ug nga Siya adunay plano alang sa atong mga kinabuhi. Usa gayud kini ka dakong panalangin nga magtan-aw Kaniya nga nagbuklad sa Iyang plano alang kanako.
Litrato sa maayong kabubut-on ni Sonia Padilla-Romero; detalye gikan sa Ang Ikaduhang Pag-anhi, ni Grant Romney Clawson