Hangtud Magkita Kita Pag-usab
Mosukol, Mopalayo, o Modawat sa mga Sumbag?
Kon kita mag-atubang og pagpanggukod, unsa ang atong mga opsyon isip mga disipulo ni Kristo?
Dili ko sigurado kon unsay angayang buhaton nianang hapuna sa akong ika-14 ka tuig. Gitukmod ko ngadto sa gawas nga bong-bong sa akong eskwelahan, ug usa ka bagis ang misumbag kanako. Kay nalibutan man ko og tunga sa dosena sa iyang mga higala, nakahukom ko nga dawaton ang mga sumbag.
Iya kong gisumbag, dayon gipatiran ko. Sa makadaghan.
Sa katapusan siya ug ang iyang mga higala mibiya. Miabut ang akong bus, ug misakay ko. Wala ko mohangad hangtud nga mihunong ang bus sa akong hununganan. Bisan 50 ka tuig na ang milabay, naghunahuna gihapon ko kon ang akong lihok tungod ba sa katalawan o Kristohanong pagpugong sa kaugalingon.
Kini nga kasinatian mihatag og gibug-aton sa pipila ka makapalibug nga mga pangutana nga atong giatubang isip mga Santos sa Ulahing mga Adlaw. Kon ang atong mga gituohan atakihon, kita ba mosukol, mopalayo, o modawat sa mga sumbag?
Ang mga pulong sa Manluluwas daw klaro: “Kon may mosagpa kanimo sa tuo mong aping, itahan mo kaniya ang pikas usab” (Mateo 5:39). Kasagaran naghunahuna ko, Si Jesus ba migamit lamang sa usa ka sambingay aron sa pagtudlo sa Iyang mga sumusunod nga dili motubag sa mga insulto gamit ang maduguon nga panimalus, ingon nga mao ang naandang gibuhat? Siguro.
Ug sa gihapon, hunahunaa ang tambag diha sa Doktrina ug mga Pakigsaad.
Niadtong 1833 ang Simbahan nag-atubang og hilabihan kagrabe nga pagpanggukod, ilabi na sa Missouri. Agig pagdepensa sa ilang kinabuhi, nagdala ang mga miyembro sa Simbahan og mga armas. Nianang puntoha, ang Ginoo mipadayag sa seksyon 98. Diha niini, Siya mitudlo kanila sa pagpugong sa kaugalingon—kutob sa mahimo. Sila adunay katungod sa pagdepensa sa ilang kaugalingon, apan kon sila mopugong, Siya moganti kanila. Kon ang mga nakasala mangayo og pasaylo, ang mga Santos kinahanglan nga mopasaylo og “hangtud sa kapitoan ka mga higayon pilo-piloon og kapito” (bersikulo 40). Kalabut sa pagpakiggubat, kinahanglan una sila nga magtinguha alang sa kalinaw ug makigsangka lamang kon ang Ginoo momando niini.
Ang panahon nausab na sukad niadtong makalilisang nga mga adlaw, apan sa pipila ka mga paagi ang Simbahan nagpabilin nga giataki. Ang atong doktrina sa kasagaran wala masabti. Walay katinoan nga mga pangagpas, wala sa katarungan nga mga pasangil, ug hingpit nga mga bakak gipasa-pasa ingon nga kamatuoran.
Unsa may atong buhaton? Isip mga disipulo kinsa naningkamot nga “mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9), kita kinahanglan adunay buhaton. Dili kita makadagan. Busa mosukol ba kita o modawat na lang sa mga sumbag?
Sa ingon nianang mga butanga, mahimo kitang motan-aw sa mga propeta. Sa bag-ohay lang nga kinatibuk-ang mga komperensya, nakabantay ko og pipila ka mga pakigpulong nga nagpasabut sa baruganan sa Simbahan kabahin sa kontrobersyal nga mga isyu. Ang mga mamumulong wala mokastigo, apan wala usab sila monunut. Sa kasagaran nangita sila og komon nga gituohan uban niadtong kinsa wala mouyon kanato. Matinahuron sila. Naningkamot sila nga mosabut ug masabtan.1
Adunay mga panahon nga ang bugtong kapilian mao lamang ang pagsukol, pagpalayo, o pagdawat sa mga sumbag. Apan sa kasagaran kita adunay mas maayo nga opsyon. Makahimo kita sa pagduol kanila pinaagi sa gugma, sama sa gibuhat ni Jesus ug sa Iyang mga Apostoles.
Paghulagway sa litrato pinaagi ni David Stoker