Unsa man ang mahinungdanon sa Adlaw sa Pioneer? Gisaulog ba kini sa tibuok Simbahan?
Ang Adlaw sa Pioneer naghandum sa pag-abut sa unang grupo sa mga Mormon pioneer ngadto sa Walog sa Salt Lake, niadtong Hulyo 24, 1847. Didto sa Utah kini usa ka opisyal nga state holiday, ug ang uban nga pagsaulog, lakip na ang usa ka parada, gipasabut isip ang Mga Adlaw sa ’47. Mao kini ang panahon sa pag-ila sa tanang mga tawo kinsa nakatampo sa pagtukod sa estado, walay pagtagad sa relihiyon o kahimtang.
Agig dugang, ang mga Santos sa Ulahing mga Adlaw sa nagkalain-laing mga dapit sa tibuok kalibutan mahimong moapil sa pag-ila sa panulundon sa pioneer nga gisaw-an natong tanan. Ang uban nga mga komunidad magpasiugda og mga pageant, mga parada, mga konsyerto, ug mga biyahe nga nagkariton isip kabahin sa paghandum. Sa laing dapit, ang paghinumdom mahimong usa ka yano sama sa usa ka pagsuroy-suroy sa pamilya o usa ka personal nga panahon sa paghinuklog. Bisan asa pa man nagpuyo ang mga miyembro sa Simbahan, bisan man kon adunay usa ka pormal nga pagsaulog o usa lamang ka minuto nga paghunahuna, kini mao ang tukma nga panahon sa paghinumdom sa unsay gihimo sa unang mga Santos sa Ulahing mga Adlaw alang kanatong tanan, lakip na sa mga pioneer sa atong dapit kinsa milig-on sa Simbahan diin kamo nagpuyo.
Si Presidente Dieter F. Uchtdorf, Ikaduhang Magtatambag sa Unang Kapangulohan, miingon: “Unsa ka dakong kalipay ug kahigayunan nga mahimong kabahin niining tibuok kalibutan nga Simbahan ug matudloan ug mabayaw pinaagi sa mga propeta, mga manalagna, ug mga tigpadayag! … Samtang ang mensahe sa gipahiuli nga ebanghelyo ni Jesukristo karon gihangop na sa tibuok kalibutan, kita mao ang mga pioneer sa atong kaugalingon nga dapit ug kahimtang.”1
Bisan asa pa man kamo nagpuyo, ang Hulyo 24 mao ang usa ka maayo nga higayon sa paghinumdom sa unsay gihimo sa unang mga Santos sa Ulahing mga Adlaw alang kanatong tanan.