Walay Paglubad nga mga Istorya sa Ebanghelyo
Unsa ang Gidala sa mga Pioneer?
Sa pagsabut sa mga pioneer ug sa ilang mga nahimo, kinahanglan natong eksaminon ang ilang mga motibo. … Sila mianhi alang sa kagawasan ug kalinaw, sama sa nabuhat sa uban. Sila mianhi sa paghimo og mga panimalay alang sa ilang kaugalingon, sama sa nabuhat sa uban. Sila mianhi sa pagsimba sa Dios ug sa pagpraktis sa ilang relihiyon sa katagbawan sa ilang mga konsensya, sama sa nabuhat sa uban; apan aniay usa ka butang nga sila mianhi diin, kutob sa akong nahibaloan, walay kaparehas sa bisan unsang grupo sa pioneer: sila mianhi uban sa siguradong katuyoan sa pag-establisar og usa ka katilingban aron sila makahimo pagbalik sa sibilisasyon diin sila gipapahawa, oo, gani ngadto sa ilang mga tiglutos, sa mga baruganan sa kinabuhi ug pamatasan diin mao ang tinubdan sa ilang kaugalingon nga inspirasyon, pagkahiusa, kalampusan, ug kalipay. …
Unsa diay ang gidala sa mga pioneer? Sila midala og kakugi sa gidak-on nga lisud gayud hitupngan. Sila mitudlo ug mibuhat sa ebanghelyo sa pagtrabaho isip pundasyon sa ilang kalampusan ug kalipay. …
Sila midala sa edukasyon ug gugma alang sa kamamugnaon ug katahum…
Sila midala uban kanila sa taas nga pagkamaunungon ug dakong kapasidad alang sa lig-on nga debosyon sa kawsa nga ilang gituohan. …
Karon moabut ako sa labing nindot nga butang nga gidala sa mga pioneer uban kanila, ug kana akong ihulagway nga mao ang kaalam, kaalam kabahin sa mga importanting mga butang sa kinabuhi. …
Una, ikonsiderar ang lawas sa tawo. … Ang mga pioneer midala og bag-ong konsepto sa lawas nga adunay sagradong kaimportante. Sila mitudlo nga ang lawas mao ang yutan-ong tabernakulo diin ang espiritu sa tawo, ang literal nga anak sa Dios, gipapuyo ug ang lawas dili mahimong mabulingan o mahugawan o sa laing paagi maabusaran pinaagi sa pag-inom og makahilo ug makadaut nga mga butang nga dili makahatag og pagpasipala sa Dios, kansang Espiritu nagpuyo niini. … Sila midala uban kanila sa lagda sa maayong panglawas. …
Ikaduha—kinaiya o personalidad. … [Ang mga pioneer] wala lamang motudlo nga ang tawo usa ka anak sa Dios, sa labing halangdong kaliwat apan siya gitagana usab, kon siya mosunod niini, nga makauban ang iyang Langitnong Amahan sa pagpadayon sa Iyang mahangturong mga buhat sa tanang panahon nga moabut. …
Sunod—ang pamilya. … Unsa ang kaalam nga gidala sa mga pioneer kabahin sa pamilya? Nganong ila kining gigahinan sa labing halangdon ug labing mahimayaon nga mga hiyas nga nag-uban niini sa tibuok kasaysayan sa kalibutan. Sila mitudlo nga kini dili lamang mao ang sukaranan nga yunit alang sa malipayong kinabuhi ug paglambo dinhi sa yuta apan kini naglangkub usab gayud sa pundasyon sa atong paglaum alang sa labing taas nga kahimayaan sa celestial nga gingharian sa atong Dios. Sa pagkatinuod, ang langit nga atong gitinguha labaw og gamay kaysa panglantaw sa atong mga panimalay hangtud sa kahangturan. Unsa ang kalainan niining halangdong mga konsepto sa panimalay ug pamilya mao ang yawan-ong trahedya sa kinabuhi sa pamilya karon—diborsyo, nabungkag nga mga panimalay, napasagdaan, masupilon nga mga anak nga mas gikaloy-an kaysa giabusaran tungod sa panagbulag sa kinabuhi sa pamilya. … O, kon ang kaalam nga gidala niining mapainubsanong mga pioneer gamiton lamang sa mga pamilya sa kalibutan, kini mahimong panalangin ngadto sa kahupayan ug sa kalipay ug sa kalamboan sa katawhan.
Sa katapusan, … ang panag-igsoonay. Sila mitudlo, sa labing tinud-anay nga paagi, sa konsepto sa tanang mga nasud, kaliwatan, pinulongan ug katawhan nga may kalabutan sa pamilya sa Dios. … Sila mituo … nga ang bugtong makahuluganong paglaum alang sa kalinaw sa tibuok kalibutan anaa sa pagpaabut niining doktrina sa panag-igsoonay sa tibuok kalibutan. …
… Kining maalamong kontribusyon nga akong gihisgutan ug daghan pa mao ang mga baruganan sa ebanghelyo ni Ginoong Jesukristo diin napahiuli pinaagi ni Propetang Joseph Smith. … Tungod kini sa bug-os nga pagtuo sa mga pioneer niining makapadasig nga mensahe sa kinabuhi ug kamatuoran nga ilang gitukod ang balay sa Ginoo diha “sa ibabaw sa tumoy sa kabukiran” [Isaias 2:2]. Usa kini ka talagsaong butang ang pagtukod og republika ug paghimo sa usa ka disyerto ngadto sa mga siyudad, mga lungsod, ug mga barangay uban sa mga panimalay, eskwelahan, ug mga pasilidad nga atong natagamtam karon. Usa kini ka malukpanong dakong kalampusan sa pagtukod sa gingharian sa Dios ug sa pagpadala gikan sa Zion kanang positibong mensahe sa paglaum ug hugot nga pagtuo ug pagkabalaan, mahangturong kaalam ngadto sa tanang katawhan. Kini mao ang tinuod nga panulundon sa atong halangdong mga pioneer nga gidala uban kanila ug gibilin ngari kanato ug sa atong mga higala. … Kini mao ang labing taglagsaon nga gasa sa kinabuhi. Dios tabangi kami sa paghatag og bili niini, sa pagsunod niini, ug sa pagpakatap niini.
Paghulagway pinaagi ni Paul Mann
Ang labing talagsaon sa tanang butang nga gidala sa mga pioneer uban kanila [mao ang] kaalam.