Paglig-on sa mga Pamilya ug sa mga Panimalay

Tun-i kini nga materyal, ug kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.

Gikan sa mga Kasulatan: Genesis 18:19; Mosiah 4:15; D&P 93:40; Moises 6:55–58

Paglig-on sa Matag Oportunidad

“Ang matag usa kanato anaa sa lain-laing sitwasyon sa pamilya. Ang uban nga mga pamilya adunay inahan ug amahan nga may mga anak nga anaa sa panimalay. Pipila sa mga magtiayon wala nay mga anak diha sa panimalay. Daghang miyembro sa Simbahan dili minyo, ug ang uban dili minyo nga mga ginikanan. Ang uban mga biyudo o mga biyuda nga nagpuyong nag-inusara.

“Dili igsapayan unsay hitsura sa atong pamilya, matag usa kanato makabuhat sa paglig-on sa atong kaugalingong mga pamilya o makatabang sa paglig-on sa uban.

“[Kausa] ako mipabilin sa balay sa akong pag-umangkong babaye ug sa iyang pamilya. Nianang gabhiona sa wala pa matulog ang mga bata, kami dihay mubo nga family home evening ug naghisgut og usa ka istorya sa kasulatan. Ang ilang amahan miistorya mahitungod sa pamilya ni Lehi ug giunsa niya pagtudlo ang iyang mga anak nga sila kinahanglan gayud mogunit sa puthaw nga gunitanan, nga mao ang pulong sa Dios. Ang hugot nga paggunit sa gunitanang puthaw moluwas kanila ug mogiya kanila ngadto sa kalipay. Kon ilang buhian ang gunitanang puthaw, adunay peligro nga malumos sa hugaw nga tubig sa suba.

“Sa pagpakita niini ngadto sa mga bata, ang ilang inahan nahimo nga ‘gunitanan nga puthaw’ nga ilang kinahanglan nga gunitan, ug ang ilang amahan nagdala sa papel sa yawa, naninguha sa pagbitad sa mga bata palayo sa dili peligro ug kalipay. Ang mga bata nakagusto sa istorya ug nakakat-on unsa kaimportante ang paggunit og hugot sa gunitanang puthaw. Human sa istorya sa kasulatan panahon na usab sa pag-ampo sa pamilya. …

“Ang mga kasulatan, family home evening, ug pag-ampo sa pamilya molig-on sa mga pamilya. Kita kinahanglan nga mopahimulos sa tanang oportunidad sa paglig-on sa mga pamilya ug pagsuporta sa usag usa aron magpabilin sa husto nga dalan.¹

Si Barbara Thompson, ikaduha nga magtatambag sa kinatibuk-ang kapangulohan sa Relief Society.

Unsa ang Atong Mabuhat?

Unsa nga mga ideya alang sa paglig-on sa mga pamilya ug mga panimalay ang inyong ipakigbahin uban sa inyong mga sister? Samtang kamo namalandong sa ilang indibidwal nga mga sirkumstansya, ang Espiritu makahatag og mga ideya diha sa inyong hunahuna.
Unsa nga mga prayoridad ang inyong mahimong usbon niining bulana aron mas malig-on ang inyong pamilya ug panimalay?

Gikan sa Atong Kasaysayan

Gikan sa sinugdanan ang Relief Society ang gisangungan sa paglig-on sa mga pamilya ug mga panimalay. Si Propeta Joseph Smith mitudlo sa mga sister sa una nga miting sa Relief Society, “Kon kamo mopauli, ayaw gayud paglitok og makapasuko o ngil-ad nga mga pulong sa inyong mga bana, apan himoa nga ang pagkamabination, kalooy ug gugma mopurong-purong sa inyong mga buhat sukad karon.”²

Niadtong 1914 si Presidente Joseph F. Smith miingon sa mga sister sa Relief Society, “Bisan asa nga walay kasayuran o bisan lamang sa kakulang sa panabut kabahin sa pamilya, … anaa kini nga organisasyon diha o anaa ra sa duol, ug pinaagi sa tinuod nga mga pagtuga ug pagdasig nga gipanag-iya sa organisasyon sila andam sa paghatag og panudlo kalabut niadtong mahinungdanon nga mga buluhaton.”³

Paghulagway sa litrato pinaagi ni Robert Casey