Atong Pahina
Beatriz da S., edad 10, Brazil
Gino A., edad 6, Philippines
Paningkamot og Maayo ug Pangandam
Wala kaayo nako maayong pagkatrabaho ang akong papel sa pinulongan nga Malay atol sa eksamin sa unang semester, ug ang akong grado sa klase miubos gayud og maayo. Naguol kaayo ko, apan nasayud ko nga ako ra usab ang angayang mabasol, tungod kay migahin ko og daghang panahon human sa klase sa pagpakigdula sa akong mga higala imbis maghimo sa akong homework ug magtuon. Ang akong inahan ug ako naghimo og plano aron pagtabang kanako nga molambo. Akong humanon ang akong homework nga walay reklamo ingon nga mao ang iyang gihangyo kada adlaw, ug kaming duha mag-ampo alang kanako nga maayo ang akong mapakita sa eksamin sa ikaduhang semester. Naningkamot ko og maayo sa tibuok nga semester. Usa ka semana sa wala pa ang eksamin, ang akong inahan giaghat sa pagpaandam kanako og piho nga hilisgutan alang sa komposisyon nga porsyon sa eksamin. Ang magtutudlo mao ang maghukom kon unsa ang mahimong hilisgutan, ug gradohan kami kon unsa kami ka maayo mosulat kabahin niana nga hilisgutan.
Sa adlaw sa eksamin, nasurprisa ako sa dihang akong nakita nga ang hilisgutan nga gipili sa magtutudlo mao gayud ang akong giandam! Tungod kay akong gipaningkamutan og maayo ug gipangandaman, bisan og wala ako masayud nga mao kini ang hilisgutan, nindot nako pagkasulat ug nakakuha og grado nga A+! Ang akong magtutudlo nasurprisa nga dako kaayo ang akong paglambo.
Nakabaton ako og pagpamatuod kabahin sa buhat. Nasayud ko nga kon kita mag-ampo ug maningkamot og maayo, makadawat kita og pagdasig aron sa pagtabang kanato nga molampus sa atong buhat.
Ethan D., edad 11, Malaysia
Sa gamay pa ko, dad-on ko sa akong mama aron sa pagtambong og daghang mga bunyag. Apan sa miaging tuig, sa dihang sakto na ang akong edad aron bunyagan, nakuyawan kaayo ko. Nahadlok ko nga dili ko makaapil sa ordinansa sa saktong paagi, sama niadtong akong nakit-an. Labaw sa tanan, nahadlok ko nga motidlum sa tubig. Apan ang Espiritu Santo mitabang kanako. Mora og nakadungog ko sa mga pulong nga, “Ayaw kahadlok! Ayaw kahadlok!” Ang Espiritu Santo mitabang kanako nga mabuntog kini nga mga problema aron mabunyagan ko, nga maoy labing importante ngari kanako. Gipanalanginan gayud ako. Dihang mikawas ko gikan sa tubig, wala na ko mahadlok sa tubig, ug nindot kaayo ang akong gibati.
Bryan K., edad 9, Taiwan
Usahay kon maghigda ko sa akong higdaanan, maghunahuna ko kon unsa kaha ang mahitabo kon ang balay masunog, ug mahadlok kaayo ko. Kon mahitabo kana, mag-ampo ko sa Langitnong Amahan. Dayon akong mabatunan ang malinawon nga pagbati, ug makatulog dayon ko. Nagpasalamat ko nga makaampo ako ngadto sa Langitnong Amahan sa higayon nga ako mahadlok o maguol. Siya nagtabang kanako sa pagbuntog sa tanan.
Lea M., edad 9, Germany
Si Melanie A., edad 3, gikan sa Mexico, gusto nga motabang sa iyang mama pinaagi sa paghipos sa iyang mga dulaan human magdula. Karon nga tres anyos na siya, motabang siya sa simbahan pinaagi sa pagguyod sa mga lingkuranan aron tumpion nila kini human sa mga miting sa Dominggo. Nahigugma si Melanie ni Presidente Monson ug gusto nga makakita kaniya diha sa telebisyon panahon sa komperensya.
Si Edwin M., edad 9, gikan sa Costa Rica, usa ka maayo nga mag-aawit ug gusto nga mokanta sa “A Child’s Prayer.” Malingaw siya nga mag-swimming. Sa eskwelahan kanunay siya nga mopasabut sa ebanghelyo ngadto sa iyang mga higala ug mopahinumdom kanila nga dili mosulti og bati nga mga pulong.
Ubos sa wala: paghulagway © Getty Images