Ang Sekswal nga Kaputli Mopanalangin sa Atong Kinabuhi

Ang kaputli nagpasabut nga limpyo sa moral nga paagi sa atong mga panghunahuna, pulong, ug lihok. Kining sekswal nga kaputli “makapahimuot ngadto sa Dios.”¹ Ang atong Langitnong Amahan naghatag kanato sa sagrado nga mga gahum sa paglalang alang sa katuyoan sa pagpadala og mga anak ug sa pagpakita og gugma sulod sa kaminyoon tali sa usa ka lalaki ug usa ka babaye. Siya usab mihatag kanato sa balaod sa kaputli sa pagprotekta kanato gikan sa kadaut nga naggikan sa pagpakigbahin sa pisikal nga kasuod gawas sa kaminyoon.

Ang Langitnong Amahan naghan-ay og klarong mga utlanan alang sa kaputli. Siya nagsugo kanato nga dili magbuhat og bisan unsang sekswal nga relasyon sa wala pa ang kaminyoon. Human sa kaminyoon, kita gimandoan nga magmatinud-anon gayud ngadto sa atong asawa.² Kon kita mosupak sa balaod sa kaputli, kita nakahimo og bug-at nga sala.³ Si propetang Alma nagtudlo nga ang sekswal nga mga sala mas seryoso kaysa ubang mga sala gawas sa pagpatay ug pagsalikway sa Espiritu Santo.⁴

Si Satanas nagbiay-biay sa kaputli ug sa pagkabalaan sa kaminyoon kon siya nagtintal kanato sa pagtuo nga ang sekswal nga pagkasuod gawas sa kaminyoon mahimo ra basta ang usa ka lalaki ug usa ka babaye naghinigugmaay. Kini dili tinuod. Kini usa ka seryoso nga sala nga momansa sa gahum sa Dios nga gihatag kanato sa paglalang og kinabuhi.⁵

Ang atong Langitnong Amahan nagsugo kanatong tanan sa pagsunod sa balaod sa kaputli. Ang mga panalangin sa pagsunod niining sugo ug ang mga sangputanan sa pagsupak niini pareha alang kanatong tanan, bisan pa sa atong mga pagkahinayak, mga tinguha, o sekswal nga mga tintasyon.

Kon kita nakabuhat og sekswal nga mga sala, ang Ginoo mopasaylo kanato kon kita tinuoray nga maghinulsol.⁶ Ang pagkawalay paglaum sa sala mahimong mapulihan sa katam-is sa kalinaw sa pagpasaylo.⁷

Samtang kita magpadayon nga putli sa sekswal nga paagi sa atong kaugalingon, kita mahimong mas sensitibo sa giya sa Espiritu Santo ug sa pagdawat og kalig-on, kahupay, ug proteksyon.⁸

Kamo makahukom karon nga magpakaputli ug dili gayud magpaling-paling. Ang pipila mahimong mobati nga sila makahimo og sekswal nga mga sala uban sa ideya nga sila yanong makahinulsol unya. Kini nga kinaiya nagpakita og pagkawalay balaang pagtahud sa mga sugo sa Ginoo ug sa kakulang sa pagsabut sa paghinulsol ug pagkamatarung.⁹
Pinaagi sa kaligdong sa pagsinina ug paghulagway, mapakita ninyo sa Dios nga kamo nasayud nga ang inyong lawas sagrado ug gilalang gikan Kaniya. Ang kaligdong nagpasiugda sa kaputli.¹⁰
Ang pornograpiya makaadik ug makadaot. Kini mohikaw kaninyo sa inyong pagtahud sa kaugalingon ug pagkontrol sa kaugalingon ug sa kanunay mosangpot ngadto sa mas seryoso nga sekswal nga mga sala.¹¹
Kon makita ninyo ang inyong kaugalingon nga nakigbisog uban sa sekswal nga mga tintasyon, lakip ang mga pagbati sa pagkadani sa sama nga pagkatawo, kamo makapili sa pagbuntog niadtong mga pagtintal. Ang Ginoo “magatagana og lutsanan sa paglikay” aron kamo “makahimo sa pag-antus niini.”¹²
Kon kamo nakahimo og sekswal nga kalapasan, pakig-istorya uban sa inyong bishop o branch president. Siya motabang kaninyo sa proseso sa paghinulsol.¹³
Kon kamo nahimong biktima sa pagpanlugos, panghilawas sa kabanay, abuso, o uban pang sekswal nga mga krimen, kamo walay sala. Ang inyong bishop o presidente sa branch makagiya kaninyo sa proseso sa emosyonal nga pagkaayo.¹⁴
Kon single ug nakipag-date, tahura ang inyong ka-date, pagplano og mabungahong mga kalihokan, ug paglikay sa mga pagsultihanay ug mga kalihokan nga makapapukaw og sekswal nga mga pagbati.
Kon minyo, magmatinud-anon sa inyong kapikas sa hunahuna, pulong ug lihok.¹⁵ Ang pag-ibid-ibid sa uban dili angay. Palayo sa mga sitwasyon diin ang tintasyon mahimong mahitabo.¹⁶

“Wala ba kamo masayud nga ang inyong lawas templo sa Espiritu Santo nga nagapuyo sa sulod ninyo, ug nga kini inyong nabatonan gikan sa Dios, ug kamo dili na inyo sa inyong kaugalingon?

“Kay gipalit na kamo sa usa ka bili: busa himayaa ninyo ang Dios diha sa inyong lawas, ug sa inyong espiritu, nga ang tag-iya ang Dios” (1 Mga Taga-Corinto 6:19–20).

Mga paghulagway sa litrato pinaagi ni Welden C. Andersen; Lana Leishman; Robert Casey; Jan Friis, © Henrik Als; Matthew Reier; ug John Luke