Usa ka BENTILADOR, usa ka Vacuum, ug usa ka Plato sa mga Cooky
Rindi Haws Jacobsen, Utah, USA
Usa ka ting-init ang among bag-ong pamilya mibiyahe og 2,000 ka milya (3,200 km) tabok sa pikas nasud para sa bag-ong trabaho sa akong bana. Kami naghinam-hinam alang sa bag-ong pagpanimpalad, apan kami mibati nga layo kaayo sa among panimalay, among mga pamilya, ug sa tanang butang nga akong nasayran. Kami mibalhin ngadto sa among bag-ong balay panahon sa kusog nga ulan, ug tungod sa pagsulay sa pagprotekta sa bag-ong gibutang nga karpet, among gipakanaog ang mga butang sa trak nga nagpayong ug ang mga tiil hinapinan. Kami nasayud nga ang kusog nga pag-ulan makapabaha sa silong, ug kami nakuyawan nga nagbantay sa among mga butang human ang tanan napakanaog.
Ingon og maayo ra ang tanan nianang gabhiona, ug uban sa among tulo ka mga anak nga nangatulog na, si Greg ug ako daling nakaandam sa among higdaanan. Kami pareho nga gipangkapoy, ug nakatulog pag-ayo. Tungod sa pipila ka rason, hinoon, si Greg mibati nga kinahanglan niyang ablihan ang lain nga kahon.
“Palihug,” miingon ko, “mangatulog na lamang ta. Kita mahimong mangabli sa buntag.”
Siya milingo-lingo sa iyang ulo ug mipaingon sa silong. Human sa pipila ka gutlo, ako nakadungog kaniya nga misinggit. Nagdali-dali, midagan ako sa silong nga gisugat og sama sa usa ka flash flood. Kami tapad gyud nga nagbarug samtang ang bugnaw nga tubig sa ulan misugod sa pag-alirong sa among mga buol-buol. Diha-diha dayon kami dali-dali nga milihok ug misugod sa pagbitad sa mga kahon pasaka ngadto sa tip-tip nga hagdanan. Mibati ko nga hingpit nga nawala ug nawad-an sa paglaum, ang akong luha nagsagol sa tubig-baha diha sa salog.
Mitawag ko sa bugtong miyembro sa Simbahan nga akong nailhan sa among bag-o nga ward, si Brother Lindsay Sewell, sa pagpangutana sa intruksyon unsaon sa pagpaandar sa among bomba para sa baha aron sa pagpahubas sa tubig. Si Brother Sewell mihatag og dali-dali nga tambag, ug dayon ako mibalik sa pagtrabaho naningkamot sa pagluwas sa among mga butang. Sa tunga-tungang gabii, ang bell sa pultahan mibagting. Miabli sa pultahan, gisugat ko ni Brother Sewell, ang iyang bukton adunay usa ka bentilador, usa ka vacuum para sa basa, ug usa ka plato sa chocolate-chip nga mga cooky.
“Ingon og kamo nagkinahanglan og tabang,” siya miingon uban sa dakong pahiyum. Sa kalit lamang, wala ko mibati nga layo kaayo sa panimalay.
Sa tibuok gabii, si Brother Sewell miuban kanamo, naningkamot sa pagpahunong sa baha. Sa diha nga ang lebel sa tubig sa silong misaka ngadto sa labaw sa usa ka pye (30 cm) ang gilawmon, siya misugyot nga kami motawag sa bombero [fire department]; sila midala og dagkong mga bomba nga nakasulbad sa problema sa katapusan.
Pagkasunod buntag si Sister Sewell ug uban pang mga miyembro sa among bag-o nga ward miabut nga may dalang pagkaon, mga extension cord, ug daghang vacuum. Kami natandog sa ilang pagkamaayo. Sa katapusan among naluwas ang tanan namong mga butang.
Ako mapasalamaton kaayo nga ako usa ka miyembro sa Ang Simbahan ni Jesukristo sa mga Santos sa Ulahing mga Adlaw. Bisan asa ako paingon, ako adunay mga kaigsoonan nga nagpaabut uban sa bukhad nga bukton sa pag-abi-abi sa akong pamilya ug sa pagtabang panahon sa kalisud.