Pilia ang Templo
Kana mao ang tambag gikan sa nagtubo nga gidaghanon sa mga Santos sa Ulahing mga Adlaw sa India, kinsa nasayud niana nga mga panalangin moabut tungod sa pag-adto sa balay sa Ginoo.
Inyo kining mabantayan pag-ayo kon kamo motan-aw sa ilang mga mata. Adunay hingpit nga kalipay didto, paglaum ug pagtuo, usa ka positibong panglantaw nga makapahiyum kon kamo mosulti, “Sultii ko unsa ang inyong gibati kabahin sa templo.”
Alang sa mga Santos sa Ulahing mga Adlaw sa India, ang kaminyoon sa templo naghatag og lawom nga panabut, usa ka balatian sa katumanan, ug pasalig sa pagsunod sa pakigsaad hangtud sa kahangturan samtang sila mohangop sa mga saad sa kahangturan. Bisan og ang labing duol nga templo liboan ka milya didto sa Hong Kong, nagkadaghan ang nakakita sa ilang dalan padulong sa balay sa Ginoo. Gigiyahan sa pag-ampo, hugot nga pagtuo, ug sa Espiritu, sila nagpili nga ma-sealed sa templo. Ania ang pipila sa ilang mga hunahuna ug mga istorya.
Pagpangita og Kalig-on
Si William Prabhudas sa Bangalore Second Branch nagtrabaho sa usa ka balay hukmanan. Siya nasayud kon unsa kasubo nga makita ang mga kaminyoon nga mabungkag. Mao kana ang usa sa mga rason nga siya ug ang iyang asawa naghinam-hinam sa pagpangita og kalig-on diha sa templo.
“Sama sa kadaghanang managtiayon, usahay kami adunay gamay nga dili pagsinabtanay nga sulbaron,” siya miingon. “Apan ang pagsulbad niini mas sayon kon kaming duha adunay mahangturong panglantaw.”
Ang iyang asawa, si Sheela, miingon nga ang pag-adto sa templo wala lamang makatabang kaniya ug sa iyang bana, apan kini nakatabang usab sa ilang mga anak: sila si Celesta, nag-edad og 13, ug Doris, 7. “Kami gi-sealed isip usa ka pamilya,” miingon si Sheela. “Nindot kadto nga pagbati. Among nakalimtan ang kalibutan sa gawas, ug kini sama sa usa ka langit para kanamo. Kami maghisgot niini kanunay.”
“Dako nga panalangin ang ma-sealed sa akong asawa,” miingon si Brother Prabhudas. “Ug dayon ilang gipasulod ang among mga anak nga babaye, nagsul-ob og puti, aron sa pag-apil kanamo. Kini nagpahinumdom kanamo sa pagkalimpyo—pagkalimpyo sa atong mga kinabuhi ug sa atong mga panimalay. Ang pagkalimpyo ug ang templo mag-uban. Kon kita limpyo, ang Ginoo nagsaad—diha sa Iyang panimalay sa mga saad—sa pagpanalangin kanato.”
Si Celesta nakahinumdom nga ang iyang pamilya mitrabaho, miplano, mitigum sulod sa duha ka tuig aron makabiyahe padulong sa templo. Apan labaw sa tanan, siya nakahinumdom nga misulod sa templo uban ang iyang mga ginikanan ug sa iyang tiya ug tiyo ug mga ig-agaw anaa usab didto aron motan-aw sa iyang pamilya nga gi-sealed. “Pagkataud-taud, kaming tanan nagginunitay sa among mga kamot. Kami mitan-aw sa mga samin ug mihunahuna kabahin sa kahangturan,” siya mihinumdom. “Kini nindot kaayo. Nasayud ako nga gusto nakong makauban ang akong pamilya hangtud sa kahangturan.”
Ang Duha ka Managsoong Lalaki ug ang Ilang mga Asawa
Daghang mga tuig ang milabay ang managsoong Thomas sa Hyderabad Fourth Branch nakabuhat og daghan sa pagpakita og maayong ehemplo sa usag usa. Isip mga batan-on, sila dungan nga namiyembro sa Simbahan. Sila nagtinabangay sa pag-awhag sa ilang inahan hangtud nga siya namiyembro usab sa Simbahan. Silang duha ka managsoon mialagad sa India Bangalore Mission. Silang duha mitabang sa paghupay sa ilang inahan sa dihang namatay ang ilang amahan. Ug silang duha bag-ohay lang naminyo.
Karon si Rejjie ug ang iyang asawa, si Metilda, na-sealed sa templo, ug si Rennie ug ang iyang asawa, si Keerthi, nagsunod sa ilang maayong ehemplo, sa dili madugay mosunod usab.
“Sugod sa akong pagkamiyembro sa Simbahan, kini nahimong usa ka proseso sa pag-usab ug paglambo, ang pagkat-on sa kaluwasan ug ang pagsunod niini,” miingon si Rejjie. “Apan ang tinud-anay nga tumong mao ang pagbalik ug pagpuyo uban sa Langitnong Amahan, ang atong mahigugmaong Amahan, kinsa gusto kaayo nga kita mobalik Kaniya nga Siya mihatag kanato og Manluluwas, ang Iyang Anak, nga si Jesukristo, sa pagluwas kanato gikan sa sala ug sa mahangturong kamatayon. Mapasalamaton ko nga ang ebanghelyo ni Jesukristo nakapausab kanako ug sa akong pamilya, ug ang pag-adto sa templo mao ang kasangkoan niining tanan.”
Si Rejjie mipasabut nga ang usa sa mga hagit nga giatubang niya ug ni Metilda sa pagkuha og pagtugot sa ilang mga ginikanan alang sa kaminyoon mao nga sila gikan sa lainlain nga rehiyon ug nagsulti og lainlaing mga pinulongan. “Apan sa templo walay panaglahi,” siya miiingon, “ug kadto mao ang dakong pahinumdom alang kanamo.” Siya mibati nga ang kaugmaon sa India anaa sa kabatan-onan. “Kita mao ang mohimo og kalainan,” siya miingon, nga nagtan-aw kang Metilda. “Kana mao ang matang sa panan-awon nga anaa kanamong duha. Kami kinahanglang maghimo og mga family home evening, magtuon sa kasulatan uban sa pamilya ug mag-ampo uban sa pamilya, ug magpabiling nakapokus sa templo. Kana mao ang among kaugmaon.”
Miuyon si Metilda: “Sa dihang gipangutana nako siya kon giunsa niya nga mahimong masinabtanon ug mahigugmaon, siya miingon tungod kini sa ebanghelyo nga nakahimo niyang mas maayo. Sa iyang misyon iyang nakita ang ehemplo sa presidente sa misyon nga gitratar niya ang iyang asawa uban sa pagtahud ug paghigugma. Ug sa templo makita nato ang susama nga sumbanan. Samtang magpakita kita anang sama nga sumbanan sa atong kinabuhi ug sa umaabot sa atong mga anak, kana nga impluwensya molig-on sa Simbahan sa India.”
Si Rennie naghisgut kabahin sa paagi nga iyang nakita ang iyang pangasaw-unon samtang nagtambong sa seminary sa dihang siya investigator pa sa Simbahan. “Gusto unta nakong magdula og cricket, apan ang magtutudlo sa seminary miingon, ‘Kinahanglan nimong unahon ang Dios,’ busa akong gibuhat. Bisan tuod ako maulawon, ako misulod ug milingkod sa laray sa luyo.” Sa laray sa atubangan siya nakakita ni Keerthi, kinsa anang higayona unom pa lamang ka bulan nga miyembro. Bisan og sila nahimong mga higala, wala sila magsugod og date hangtud miuli si Rennie gikan sa iyang misyon. Si Keerthi nakahinumdom kon giunsa nila, sa dihang sila mihukom gayud nga magminyo, sa pag-adto ang ilang mga ginikanan sa pagkombinser kanila nga ang pagpili husto.
“Kami nakat-on sa seminary nga kinahanglan natong tahuron ang atong mga ginikanan, ug kami nahinumdom niana,” siya miingon.
Si Rennie midugang, “Sila mitambag kanamo nga kinahanglan namong humanon ang among pag-eskwela ug kinahanglan kong magpaabut nga maminyo og una ang akong igsoong lalaki. Busa kami nagtrabaho ug nakadayeg gayud labing maayo nga bahin mao kini, sa amo gyud nga paghuman og eskwela, ang akong igsoong lalaki naminyo, ug ang amahan ni Keerthi nahimuot pag-ayo sa ilang kasal. Sa dihang iyang nakita ang ilang maayo nga ehemplo, siya mitugot sa among kaminyoon, ug sa niana nga paagi among gitahud ang among mga ginikanan ug usab ang among kaminyoon tarung nga pagkahan-ay.
Si Reenie miingon nga ang iyang kasinatian uban ni Keerthi usa ka maayong ehemplo kon sa unsa nga paagi nga ang pagsabut sa kaminyoon sa Simbahan mas mikatap. “Sa bag-o pa kong nagpamiyembro sa Simbahan, usa ka dakong butang kon ang usa ka miyembro maminyo og usa ka miyembro,” siya miingon. “Ug kon sila moadto sa templo, kana mas dako. Ug karon kami nakasabut kon unsaon ang pagminyo sulod sa Simbahan. Among gisiguro nga kami andam alang sa templo. Ang templo mao ang yawe.”
Ang Ehemplo sa Presidente
Sulod sa apartment nila ni Venkat ug Lynda Dunna sa Hyderabad Fourth Branch, ug adunay daghang timailhan nga kining bag-ong kasal naghinigugmaay sa usag usa. Usa ka hinimo sa kamot nga bandera para sa adlawng natawhan gikan sa lalaki ngadto sa babaye gipapilit sa bong-bong. Usa ka album sa ilang mga litrato sa kasal anaa sa lamesa duol sa sofa. Samtang sila mag-istorya, agbayan sa lalaki ang babaye, ug ang babaye mopahiyum kanunay nga kini daw makatakud.
Sila mihulagway giunsa nila pagkita pinaagi sa mga kalihokan nga gipasiugdahan sa Simbahan ug unsa ka malipayon ang mama ni Lynda sa dihang sila kaslunon na tungod kay nakaila siya ni Venkat gikan sa simbahan. Apan adunay problema. Si Venkat adunay magulang nga lalaki kinsa dili pa minyo, ug sa India ang pipila nagsunod gihapon sa tradisyon nga ang mga magulang kinahanglang maminyo og una sa dili pa ang ilang mga igsoon. Ang iyang mga ginikanan, kinsa mahigalaon sa Simbahan apan dili mga miyembro, nagtukod usab og balay ug dili mosugot sa kasal hangtud nga dili mahuman ang balay. “Ang akong mga ginikanan dili ganahan nga mosulti og dili, apan gusto nila nga kami magpaabut og daghang mga bulan, siguro usa ka tuig,” mihinumdom si Venkat.
“Ang nakatabang namo mao ang Espiritu,” siya mipadayon. “Ako mibati og pagdasig sa pagsulti sa tanan nga si Lynda ug ako pareho nga nagtrabaho, busa kami na ang bahala sa tanang butang apan importante usab nga maminyo sa labing dali nga panahon ug kana importante nga sugdan pinaagi sa pag-adto sa templo. Kami padayon lang nga naghunahuna, ‘Ang Ginoo motabang kanato,’ ug Iya kining gibuhat.”
Usa ka bag-ong chapel sa Santos sa Ulahing mga Adlaw ang naabli sakto lamang gyud nga sila magminyo ug ang salo-salo didto, ug mibiya diha-diha dayon aron ma-sealed sa Templo sa Hong Kong China. “Pito kami nga nagdungan og biyahe padulong sa templo,” miingon si Lynda. “Sa samang adlaw nga si Venkat ug ako na-sealed, ang akong inahan, ang akong igsoong babaye, ug ako na-sealed ngadto sa akong patay nga amahan. Kini usa ka talagsaong adlaw sa tanang hitabo.”
Si Venkat, kinsa nagserbisyo karon isip presidente sa branch, miingon nga ang usa sa iyang dakong tinguha mao nga makakita og templo sa India sa umaabot nga adlaw. “Kana usa ka dako nga panalangin,” siya miingon. “Kini makatabang kanato sa pagtukod sa Zion kon asa man kita.”
Usa ka Giniyahan nga Kaminyoon
Ang istorya nila ni Barat ug Ishla Powell sa Chennai Second Branch sa tinud-anay nagsugod uban sa ginikanan ni Barat, nga sila si Sathiadhas Powell ug Suriya Kumari, kinsa naminyo niadtong 1981 ug nagpamiyembro sa Simbahan niadtong 1991. Niadtong 1993 si Sathiadhas gitawag isip presidente sa branch. Human sa daghang mga tuig sa pagtigum ug pagpangandam ug sa wala pa ipahinungod ang Templo sa Hong Kong, sila mibiyahe ngadto sa Templo sa Manila Philippines aron ma-sealed.
Samtang ang ilang pamilya mitubo ug mihingkod sa ebanghelyo, sila mitudlo sa ilang duha ka anak nga mga lalaki kabahin sa kaimportante sa pag-adto sa templo. (Ang ilang kinamanghuran nga lalaki sa karon nag-alagad og misyon.) Ang mga Powell naghinam-hinam sa dihang ang ilang kinamagulangan nga anak nga lalaki, si Barat, kaslunon, ang kaminyoon sa templo diha-diha dayon nahimong kabahin sa plano. Si Ishla, ang iyang pangasaw-unon, usa ka bag-o nga miyembro sa Simbahan. “Sukad sa unang adlaw nga akong nakaila ang mga misyonaryo, ako nasayud nga ang ebanghelyo tinuod, ug nakagusto kaayo ako niini,” siya miingon. Siya nasuod sa pamilya sa presidente sa branch karon, ang mga Isaac, kinsa gipaila-ila ngadto sa Simbahan pinaagi sa mga Powell.
Sa panahon sa iyang bunyag, si Barat adunay upat na lang ka bulan nga nahibilin sa iyang misyon. “Ang mga Isaac kanunay nga mosulti nga siya mao ang sakto nga paris alang kanako, apan gusto nako nga dili una magminyo ug moalagad ko og misyon,” miingon si Ishla. Bisan tuod ang mga presidente sa branch ug misyon mitugot sa iyang pag-apply og misyon, si Ishla mipasabut, “Sa kalit lamang ug wala damha ang akong hunahuna nausab sa hingpit. Gusto nakong mag-ampo kabahin sa kaminyoon.”
Sa dihang siya miuli gikan sa iyang misyon, si Barat natingala sa dihang pipila ka mga tawo ang miingon kaniya nga si Ishla mao ang angay para kaniya. Sa wala madugay sila nagkita sa kasal sa anak nga babaye ni Presidente Isaac apan wala kaayo magkaistoryahanay. Ang katilingban sa India pormal kabahin sa mga lalaki ug mga babaye nga gustong mag-ila-ila, ug sila si Barat ug Ishla gusto nga magtinarong.
Tulo ka semana ang milabay si Ishla nag-ampo ug naghunahuna unsa ang buhaton, ug mao usab si Barat. “Ang Ginoo mipakita kanako pinaagi sa daghang mga paagi nga si Barat mao ang hustong lalaki,” miingon si Ishla. “Apan ako hilabihan ka maulawon. Nag-ampo ko, ‘Ginoo, kon kini mao ang dalan, nan ipakita kanako unsaon nako sa pag-istorya kaniya.’”
Si Barat miingon, “Ako nakig-istorya og pipila ka mga tawo kabahin niya, ug sila walay laing masulti kon dili tanan mga maayo. Sa kalit lang ako mihunahuna, ‘Kinahanglan ko nga makig-istorya kaniya karon,’ apan dili ko kahibalo kon unsaon. Gitawag nako ang igsoong babaye ni Presidente Isaac ug nangutana kon sa iyang hunahuna maayo ra ba nga motawag.
Si Ishla mipadayon, “Samtang ako nag-ampo, ang igsoong babaye sa president sa branch mitawag sa telepono ug miingon, ‘si Barat gusto nga makig-istorya nimo. Mahimo ba nga akong ihatag kaniya ang imong numero?’” Tunga sa oras pagkataud-taud sila nag-istoryahanay. Si Barat miingon, “Ingon og nagkaila na kami sa usag usa sulod sa daghang tuig.”
Si Ishla nakakat-on kabahin sa kaminyoon sa templo sa institute ug nasayud nga dili siya mosugot sa labing minus nga butang. Mao usab ang gibati ni Barat. Apan kinahanglan nilang magtigum og kwarta sa pagbiyahe paingon sa templo, ug kana nagpasabut og daghang mga higala ug mga miyembro sa pamilya, apil sa inahan ug amahan ni Barat, nga walay igong kwarta sa pagbiyahe uban kanila.
“Kini layo kaayo, ug ang pagbiyahe mahal kaayo, ug kaming tanan nagkauyon nga sila kinahanglang moadto,” nahinumdom si Sathiadhas. “Kami miingon kanila nga kami magsaulog uban kanila sa legal nga seremonya sa dili pa sila molarga, ug kami mihangyo kanila sa pagkuha og daghang litrato human sila ma-sealed. Dayon kami magsaulog pag-usab sa ilang pag-abut.
“Kami nagtudlo sa mas batan-ong henerasyon sa kaimportante sa templo,” mipasabut si Sathiadhas. “Kami nag-awhag sa tanang katawhan sa pag-adto sa templo, ug among gusto nga ang among mga anak moadto usab didto.” Siya miingon nga siya pihong nahimuot sa paagi nga sila si Barat ug Ishla mitahud sa ilang mga ginikanan, sa kustombre sa ilang mga tawo, ug sa ilang kaugalingong kabubut-on.
“Sa India ang katawhan modangup sa ‘gikasabutan na nga kaminyoon’ ug ‘kaminyoon tungod sa gugma,’” miingon si Barat. “Kami mibati nga anaa kanamo ang duha.” Sa pagkatinuod, sila si Barat ug Ishla mas gusto nga tawagon ang ilang kasal og usa ka “giniyahan nga kaminyoon.” “Kami gihiusa sa among mga pamilya ug mga higala ug usab pinaagi sa Espiritu,” siya miingon. “Kami naglaum nga ang Espiritu mogiya kanunay sa among kaminyoon.”
Mga litrato pinaagi ni Richard M. Romney, gawas kon gipahibalo; litrato sa Templo sa Hong Kong China Temple pinaagi ni Craig Dimond
Ibabaw: Ang pamilyang Prabhudas mibiyahe padulong sa Templo sa Hong Kong China (sa wala) aron ma-sealed. Kini mao ang labing duol nga templo sa India.
Sa ibabaw, gikan sa wala: Rejjie, Metilda, Keerthi, ug Rennie Thomas. Ubos: Sila si Rennie ug Keerthi nalingaw sa Sunday School matag semana.
Ibabaw: Sila si Venkat ug Lynda Dunna nahinumdom nga nagbiyahe padulong sa templo nga pito ka buok sa usa ka grupo. Sa samang adlaw nga sila na-sealed, si Lynda na-sealed usab ngadto sa iyang patay nga amahan.
Sa tuo: Ang istorya ni Barat ug Ishla sa tinuoray nagsugod uban sa mga ginikanan ni Barat (sa sunod pahina). “Kami nagtudlo sa mas batan-ong henerasyon sa kaimportante sa templo,” miingon ang amahan ni Barat, si Sathiadhas.