Pagpakigbahin sa Ebanghelyo uban ang Pagsalig

Ni Elder M. Russell Ballard

Sa Korum sa Napulog Duha ka mga Apostoles

Gikan sa pakigpulong nga gihatag sa gradwesyon sa Brigham Young University niadtong Agosto 13, 2009. Alang sa kompletong teksto sa Iningles, bisitaha ang www.newsroom.lds.org (i-klik ang “News Releases & Stories”).

Kita dili kinahanglan nga manalipud o mangatarungan sa bisan unsang butang kon atong ibase ang atong posisyon sa mga pagtulun-an sa Anak sa Dios ug mobuhat sa atong labing maayo sa pagsunod sa Iyang mga sugo.

Kitang tanan anaa sa dako kaayong panglimbasog. Gikan pa sa sinugdanan sa kasaysayan sa katawhan, kini kanunay na gayud. Ang maayo ug dautan kanunay nagauban kanato ug mao usab ang katungod sa pagpili tali kanila. Gusto akong mopakigbahin og pipila ka mga panghunahuna kabahin sa pagbarug nga lig-on alang sa kamatuoran.

Bag-ohay lang ako nakakita og pipila ka pagsiksik kabahin kon unsa ang pagtan-aw sa ubang mga tawo sa mga miyembro sa Ang Simbahan ni Jesukristo sa mga Santos sa Ulahing mga Adlaw. Dugay na akong interesado niining hilisgutan tungod kay ako adunay dakong kalabutan sa misyonaryo nga buhat sa akong mga buluhaton sa Simbahan. Ang pagkahibalo kon unsa ang pagtan-aw sa mga tawo ngari kanato usa ka importanting bahin sa pagsabut kon unsaon sa pagpasabut og maayo sa atong kaugalingon. Kining piho nga piraso sa pagsiksik nakahimo og usa ka makapaikag nga obserbasyon. Kini nagsugyot nga ang mga miyembro sa Simbahan usahay makitang mapanalipdanon kaayo ngadto niadtong dili mga miyembro sa Simbahan. Usa sa tigtubag mipadayon sa pagsulti nga kon ang mga Mormon nagpasabut sa ilang mga pagtuo, ilang ipahayag ang ilang pinulongan sa paagi nga kini nagsugyot nga sila nagpaabut og mga pagsaway.

Dili kini mao ang unang higayon nga ako nakadungog niadtong sama nga obserbasyon. Apan sa akong paghunahuna og maayo niini, mas nasabtan nako kon unsa ka sayon, kon kita dili magbantay, sa pagpaabut og balatian sa pagkamapanalipdanon sa atong pagpakigsulti ngadto sa uban.

Sa akong hunahuna ako nakasabut og usa ka butang diha sa mga rason. Gikan sa panahon nga si Joseph Smith migawas gikan sa Sagradong Kakahoyan sa tingpamulak niadtong 1820, adunay daghan nga adunay negatibong reaksyon, gani uban sa pagsupak, sa atong mensahe. Si Joseph misulti kanato sa iyang kaugalingong mga pulong nga sa unang higayon nga siya misulay sa pagpakigbahin sa unsay iyang nakita uban sa dili sakop sa pamilya, kini usa ka dili maayo nga kasinatian. Ang ministro sa Protestante kang kinsa siya mipakigbahin sa iyang mensahe miingon kaniya nga kining “tanan gikan sa yawa” ug “wala na kuno kanang mga butang sama sa mga panan-awon o mga pagpadayag” (Joseph Smith—Kasaysayan 1:21).

Kon si Joseph naghunahuna nga kadto dili maayo, kana tungod kay wala pa siya makaamgo sa walay kalooy nga gahum sa kaaway. Mas mitubo ang Simbahan, mas daghan ang pagsupak niini. Ang gamayng grupo sa matinud-anong mga Santos gipapahawa gikan sa usa ka lugar ngadto sa lain. Siguradong naghunahuna si Joseph nga wala nay mas grabe pa kaysa gobernador sa Missouri nga naghatag og sugo nga pamatyon ang mga miyembro sa Simbahan, gisundan sa hilabihang kasakit sa Propeta ug sa uban didto sa Bilanggoan sa Liberty. Siyempre, kini migrabe, ug sila si Joseph ug Hyrum ang mibayad sa ilang mga buhat, mga pagpamatuod, ug hugot nga pagtuo sa ilang kinabuhi. Kana mao ang katapusang nahitabo nga misugod sa talagsaong paglalin padulong sa kasadpan, gidumala ni Brigham Young, tabok sa kamingawan sa Amerika ngadto sa dapit nga kadangpan diha sa Rocky Mountains sa Estados Unidos.

Ang mga istorya sa mga Santos sa Ulahing mga Adlaw sa kalisud ug sakripisyo usa ka dili mapapas nga bahin sa kasaysayan karon. Gani ang mga kinabig sa Simbahan kinsa walay mga katigulangan nga naluwas niadtong mga higayona midawat sa katawhan ug mga panghitabo sa atong nag-una nga kasaysayan kabahin sa ilang kaugalingong panulundon. Ang mga istorya makapadasig ug makapaawhag kanato, nga kini angayan gayud, ug naglaum ug nag-ampo ko nga sumala sa atong pagkahayahay dili nato hikalimtan kadtong lig-on ug matinud-anong mga Santos sa Ulahing mga Adlaw ug ang mga leksyon nga atong makat-unan gikan kanila.

Apan karon dili na 1830, ug dili na kita unom na lamang. Apil ba sa pagkamapanalipdanon nga usahay nakita sa uban ngari kanato nagsugyot nga kita nagtuo gihapon nga itratar sama sa sinalikway nga minoriya, pugson sa paglalin ngadto sa Kasadpan? Sa atong inter-aksyon sa uban, nagtuo ba kita nga kinahanglang manalipod kanunay sa atong kaugalingon? Kon mao, sa akong hunahuna kinahanglan nato nga maghimo og pamaagi sa pagkorihir. Ang kanunay nga paghunahuna sa mga pagsaway o pagsupak mosangpot ngadto sa dili maayong pagmatngon sa kaugalingon ug usa ka mapanalipdanong batasan nga dili maayo ngadto sa uban. Kini wala mahisubay kon asa na kita karon isip usa ka simbahan ug usa ka dakong grupo nga mga sumusunod ni Jesukristo.

Tan-awa ang Ehemplo sa Manluluwas

Sa tanang mga butang, kita mahimong motan-aw sa Manluluwas isip atong ehemplo. Siya nag-atubang og hilabihang pagsupak gikan sa sinugdanan sa Iyang pangalagad. Sa Iyang unang pagsangyaw sa sinagoga didto sa Nazaret, adunay pipila nga gustong mohagbong Kaniya sa pang-pang (tan-awa sa Lucas 4:28–29). Apan wala Niya tuguti ang Iyang kaugalingon nga mahadlok. Siya nasayud nga sa labing dakong bahin Siya masaypan. Apan Siya nagmaisugon sa pagdeklarar sa Iyang ebanghelyo, naggamit sama niining mga hugpong sa mga pulong “Kamo nakadungog na niini nga gikasulti … , apan sultihan ko kamo …” (Mateo 5:21–22). Siya nasayud unsa ang Iyang gustong isulti, ug Siya misulti niini nga wala mangayo og pasaylo. Sama sa mabasa sa kasulatan, “Kay kanila nagpanudlo man Siya ingon nga may kagahum ug dili sama sa ilang mga escriba” (Mateo 7:29).

Kon gusto kita nga tahuron karon kon si kinsa kita, nan kita kinahanglan nga molihok nga may pagsalig—sigurado sa kahibalo kon si kinsa kita ug unsa ang atong gibarugan ug dili nga ingon og kita mangayo og pasaylo alang sa atong mga pagtuo. Kana wala nagpasabut nga kita kinahanglang mag-arogante o magpalabi-labi. Ang pagtahud sa panghunahuna sa uban mao gayud ang nag-unang baruganan alang kanato—kini kabahin sa Mga Artikulo sa Hugot nga Pagtuo (tan-awa sa Mga Artikulo sa Hugot nga Pagtuo 1:11). Apan kon kita molihok nga ingon og sama sa usa ka ginalutos nga minoriya o kon kita naglaum nga dili masabtan o sawayon, ang mga tawo mobati niini ug motubag sumala niana.

Modapit ako sa mga returned missionary nga magmahimong sensitibo kabahin niini. Kamo migahin og duha ka tuig nga nagtuktok sa mga pultahan ug nakig-atubang sa matag mahunahunaan nga pangutana ug pagsupak. Sayon sa inyong pag-istoryahanay sa paghunahuna nga kamo nanuktok gihapon sa mga pultahan. Wala na. Kon kamo anaa sa posisyon sa pagpakigbahin unsa ang inyong gituhoan, dili na kinahanglan nga molakaw nga magbinantayon kaayo nga ingon og kamo naglikay o nagpaabut og pagsaway. Si Apostol Pablo miingon, “Kay wala ko igakaulaw ang Maayong Balita” (Mga Taga-Roma 1:16), ug dili gayud usab nato kini ikaulaw. Malaumon ug mapasalamaton ako kaayo sa matag oportunidad nga ania kanako sa pagpakigbahin sa akong pagpamatuod sa kahibulongang mensahe sa Pagpahiuli. Ug wala gyud ako nakahinumdom nga nakapasakit ni bisan kinsa sa proseso.

Usa sa mga rason nga kining hilisgutan importante karon tungod kay ang Simbahan nagkaanam og kalig-on. Sa Estados Unidos, kita karon ang ikaupat nga labing dako nga simbahan. Ang mga Santos sa Ulahing mga Adlaw anaa bisan asa—sa mga komunidad gikan sa usa ka baybayon ngadto sa laing baybayon ug gikan sa amihanan ngadto sa habagatan. Samtang ang atong gidaghanon anaa nakasentro sa Kasadpan, kini nahimong mas komon sa mga tawo sa nasud nga makaila og usa ka Santos sa Ulahing mga Adlaw sa personal nga paagi. Dugang pa, daghang mga miyembro sa Simbahan ang nakakab-ot og kabantog sa komunidad. Bag-ohay lamang sa Time magasin may artikulo kabahin sa Simbahan misulat niini nga kamatuoran ug mipakita og pipila ka mga litrato sa bantugang mga Santos sa Ulahing mga Adlaw.¹

Kining pagkabantugan nagsiguro nga ang Simbahan pagaistoryahan pa pag-ayo ug ang mga Santos sa Ulahing mga Adlaw mabutang sa mas daghang panaghisgutan sa ebanghelyo. Kita kinahanglan nga magmatinuoron, dayag, diretso manulti, makapainteres, matinahuron sa mga panglantaw sa uban, ug hingpit nga dili mapanalipdanon kabahin sa atong kaugalingon.

Ania ang duha ka mga sugyot kon unsaon nga moapil sa mga pagsultianay nga dili mapanalipdanon.

1. Ayaw itugot nga ang walay labut nga mga isyu mopuli sa mas importanting mga hilisgutan.

Ang atong mga miyembro sa Simbahan kanunay mitugot sa uban nga mao ang magbuot sa tumong sa pag-istoryahanay. Ang usa ka ehemplo mao ang dinaghan nga kaminyoon. Kini gihunong sa Simbahan isip opisyal nga praktis niadtong 1890 pa. Karon 2010 na. Nganong naghisgut pa man gihapon kita niini? Kini usa ka praktis. Kini natapos na. Kita magpadayon. Kon ang mga tawo mangutana kaninyo kabahin sa daghan og asawa, dawata nga kini praktis kaniadto apan dili na karon ug ang mga tawo kinahanglan nga dili maglibog ni bisan kinsang tawo nga adunay daghan og asawa nga kini may kalabutan sa atong simbahan. Sa ordinaryo nga pag-istoryahanay, ayaw pag-usik-usik sa oras og mangatarungan sa praktis sa daghan og asawa sa panahon sa Daang Tugon o magduhaduha nganong kini gipraktis sulod sa mubong panahon sa ika-19 nga siglo. Kadto mahimong balido nga mga hilisgutan alang sa mga tigsulat sa kasaysayan ug mga eskolar, apan sa akong hunahuna kita yanong milig-on sa naandan nilang gihunahuna kanato kon ato kining himoon nga nag-unang hilisgutan sa pag-istoryahanay kabahin sa Simbahan.

Ako nakaamgo nga usahay kini nga mga pag-istoryahanay gipasiugdahan pinaagi sa mga istorya nga makita diha sa media. Kana dili makapausab sa bisan unsa nga butang. Niadtong 2009 usa ka salida sa cable TV kabahin sa mga daghan og asawa mipakita sa sagradong seremonya sa templo. Kanang paghulagway nakahimo og dakong kabalaka sa mga miyembro sa Simbahan, nga masabtan gayud. Kitang tanan nalain gyud niadto.

Apan ako kamong i-refer sa usa ka artikulo agi og tubag sa paghulagway nga gibutang pinaagi sa Public Affairs Department sa Simbahan sa newsroom Web site niini. Samtang ako kining kutloon, bantayi ang tuno. Walay pagpanalipud kabahin niini, apan kini nagtubag sa dili saktong paghulagway sa usa sa atong labing sagrado nga relihiyosong seremonya:

“Sama sa ubang dagkong grupo sa relihiyon, Ang Simbahan ni Jesukristo sa mga Santos sa Ulahing mga Adlaw usahay mabutang nga mao ang hatagan og pagtagad sa Hollywood o Broadway, mga serye sa telebisyon o libro, ug mga balita sa media. Usahay ang paghulagway sa Simbahan ug sa mga tawo niini mora og tukma gyud. Usahay ang mga imahe sayop o mohulagway sa mga naandan. Usahay, sila makahahadlok nga bati kaayo.

“Samtang ang mga Katoliko, Judeo ug Muslim nailhan na sa daghang mga siglo, ang ingon niana nga atensyon dili kapugngan kon ang usa ka institusyon o grupo sa relihiyon moabut sa gidak-on o pagkailado nga igong makakuha og atensyon.”

Ang artikulo dayon nagpadayon sa pagpawala sa ideya sa usa ka gihan-ay nga pag-boycott ngadto sa network o sa kaubang negosyo, diin aktibong gipasiugdahan sa pipila sa atong mga miyembro.

“Ang Simbahan ni Jesukristo sa mga Santos sa Ulahing mga Adlaw isip usa ka institusyon dili mopasiugda og mga boycott. Ang ingon nga lakang yanong mohimo sa klase sa kontrobersiya nga gusto sa media ug sa katapusan mopadaghan og mga mananan-aw alang sa mga serye. … Ang mga Santos sa Ulahing mga Adlaw kinahanglan modala sa ilang mga kaugalingon nga may dignidad ug pagkamanggihunahunaon.

“Dili lamang nga kini mao ang modelo nga gitudlo ug gipakita ni Jesukristo sa Iyang kaugalingong kinabuhi, apan kini usab nagpakita sa katinuod sa kalig-on ug kahingkod sa mga miyembro sa Simbahan karon. …

“Kon ang Simbahan motugot sa mga tigsaway ug kontra sa pagpili sa mga hilisgutan nga pagalalisan, kini risgo nga mahimong mawala gikan sa pokus ug misyon nga malampusong gipaningkamutan og dul-an na sa 180 ka mga tuig. Hinoon, ang Simbahan sa iyang kaugalingon motino sa iyang kaugalingong dalan samtang kini magpadayon sa pagsangyaw sa gipahiuli nga ebanghelyo ni Jesukristo sa tibuok kalibutan.”²

Ania pay lain nga ehemplo. Niadtong 2007 usa ka independent film producer mipagawas og salida kabahin sa Mountain Meadows Massacre. Ang paghulagway niini nga usa ka bati kaayo nga salida matugtanon. Sa walay paglipud-lipud, kini usa ka makahahadlok gayud—gani ang mga kritiko sa Hollywood misaway niini. Ang mga tigpasiugda mibuhat sa tanan aron ilang mapasuko ang Simbahan pinaagi sa paghimo niini nga usa ka dakong hilisgutan sa pag-istoryahanay. Sa pagkatinuod, wala gyud nato kini panumbalinga. Kita wala motugot kanila sa paghimo og mahisgutan. Ang resulta mao ang dakong pagkapakyas sa mga sinehan ug hilabihan ang utang sa account sa bangko sa tigpasiugda. Samtang, kita nagpadayon sa pagtubag ug pagduol sa maayo ug intelihenteng mga pamaagi sa mga kaliwatan niadtong naapil sa makalilisang nga mga panghitabo sa Mountain Meadows.

Bag-ohay lamang ang Oxford University Press mimantala og usa ka maayong gisiksik nga libro nga giulohan og Massacre at Mountain Meadows nga nagdokumento sa mga kamatuoran nga nagpalibut niini nga trahedya.

2. Ipasabut nga ang mga Santos sa Ulahing mga Adlaw nagtudlo ug nagpuyo unsa ang gitudlo ni Jesukristo ug nga kita naningkamot sa pagsunod Kaniya.

Kon ang tanan nasulti ug nahuman na, ang labing importanting butang kabahin nato ug sa atong pagpamatuod mao nga kita nagbase sa atong mga pagtuo sa unsay gitudlo ni Jesukristo ug kita naningkamot sa pagsunod Kaniya pinaagi sa pagpuyo sa atong kinabuhi sa paagi nga Iyang madawat ug sa atong Langitnong Amahan.

Kini mao ang atong pundasyon. Kini mao ang pundasyon ni Joseph Smith. Siya miingon, “Ang sukaranan nga mga baruganan sa atong relihiyon mao ang pagpamatuod sa mga Apostoles ug mga Propeta, mahitungod ni Jesukristo, nga Siya namatay, gilubong, ug nabanhaw sa ikatulong adlaw, ug mikayab ngadto sa langit; ug ang ubang mga butang nga may kalabutan sa atong relihiyon mga sumpay lamang niini.”³

Bisan unsa nga atong istoryahan kabahin sa Simbahan, kita kinahanglang maningkamot sa paghimo niini nga punto. Kita nagsunod kang Jesukristo. Kita naningkamot sa pagsunod sama sa Iyang gitudlo. Kana mao ang basihan sa atong hugot nga pagtuo ug sa atong mga kinabuhi, ug kana mao ang labing lig-on nga dili mapanalipdanon nga posisyon nga atong mabuhat. Kita dili kinahanglan nga manalipod o mangatarungan sa bisan unsang butang kon atong basihan ang atong posisyon sa mga pagtulun-an sa Anak sa Dios ug mobuhat sa atong labing maayo sa pagsunod sa Iyang mga sugo.

Kini usa ka dako nga panalangin nga maangkon ang doktrina ni Jesukristo, nga klaro niadtong nagtuon sa mga kasulatan ug mihangup sa Iyang mga pagtulun-an. Samtang kita magsunod sa Iyang doktrina, atong masayran nga kitang tanan mga anak sa Dios ug Siya nahigugma kanato. Pinaagi sa pagsunod ni Kristo, kita nasayud asa kita gikan sa wala pa kita matawo, kita nasayud sa atong katuyoan nga ania dinhi sa yuta, ug kita nasayud asa kita paingon kon kita mobiya niining kinabuhi sa yuta. Ang plano sa kaluwasan klaro; kini mao ang plano sa Dios alang sa mahangturong kalipay sa Iyang mga anak.

Adunay mga sugo nga gihatag sa Dios kanato nga sundon. Kini Iyang mga sugo, ug walay bisan kinsa ang may katungod sa pag-usab niini gawas kon kini pinaagi sa direktang pagpadayag sa pinili nga propeta sa Dios.

Ang katawhan sa tibuok kalibutan nagkaanam og kalayo gikan sa mga pagtulun-an sa Ginoo paingon sa sekular nga katilingban nga gihulagway ni Apostol Pablo:

“Kay nagasingabut ang panahon nga ang mga tawo magadumili sa pagpaminaw sa matarung nga pagtulun-an; hinonoa aron sa pagtagbaw sa ilang kaugalingong pangibog sila magapaalirong og mga magtutudlo, nga magahapohap kanila sa ilang nanagkatol nga mga dalunggan;

“Ug ang ilang mga dalunggan ilang ilingiw gikan sa kamatuoran” (2 Timoteo 4:3–4).

Karon mao ang panahon nga nakita ni Pablo. Adunay nagpadayon og tubo nga gidaghanon sa mga tawo kinsa nagtuo nga walay Dios, walay Kristo, walay plano sa pagtubos, walay Pag-ula, walay paghinulsol, walay kapasayloan, walay kinabuhi human sa kamatayon, walay pagkabanhaw, walay kinabuhing dayon, ug walay mahangturong pamilya nga ma-sealed hangtud sa kahangturan.

Pagkahaw-ang sa kinabuhi nga walay mga panalangin sa kahingpitan sa gipahiuli nga ebanghelyo ni Jesukristo. Isip mga Santos sa Ulahing mga Adlaw, kita nagsunod kang Jesukristo. Kita nasayud sa plano sa kalipay, ang talagsaong plano sa pagtubos pinaagi ni Ginoong Jesukristo. Kita nasayud sa mga doktrina ni Jesukristo. Kita kinahanglang maningkamot karon ug sa kanunay sa pagsunod pinaagi niini. Diha sa mas batan-ong henerasyon sa Simbahan nakapatong ang responsibilidad sa pagtudlo sa mga doktrina sa Ginoo ug sa pagkahibalo unsaon sa pagtukod sa Iyang Simbahan. Palihug hinumdumi nga dili kamo kinahanglang mobati nga kinahanglan kamong mangatarungan sa inyong pagtuo; kinahanglan lamang ninyong ipasabut kanila sa usa ka diwa sa paghigugma ug pagkamabination. Ang kamatuoran kanunay nga mopatigbabaw kon ang tinuod nga doktrina itudlo.

Ani ang pipila ka mga ehemplo:

Kita nagsunod sa doktrina ni Jesukristo sa pagserbisyo ngadto sa atong mga isigkatawo. Kita nagserbisyo sa mga miyembro sa atong Simbahan ingon man usab niadtong dili. Ang talagsaong buhat nga atong gihimo sa humanitarian nga pagserbisyo sa tibuok kalibutan makahupay sa pag-antus ug kalisud. Gibuhat nato ang tanan sa pagbahin sa atong mga kapanguhaan sa oras ug kwarta sa pagtagbaw sa mga panginahanglan niadtong atong mga miyembro ug niadtong dili mga miyembro, nag-ila nga “maingon nga gibuhat ninyo kini ngadto sa usa sa labing gagmay niining akong mga igsoon, gibuhat usab ninyo kini kanako” (Mateo 25:40).
Kita nagsunod sa doktrina ni Jesukristo sa pagpaningkamot sa pagsunod sa Pulong sa Kaalam, diin usa ka maayong paagi sa pagtagamtam og himsog nga pisikal nga lawas. Kita naglikay sa pag-abuso sa druga sa tanang matang tungod kay ang atong mga lawas balay sa atong mahangturong mga espiritu ug tungod kay ang kalipay niining kinabuhi maangkon pinaagi sa kalig-on sa espirituhanong paagi ug kahimsog sa pisikal nga paagi.
Kita nagsunod kang Jesukristo pinaagi sa pagsunod sa balaod sa kaputli. Ang Dios mihatag niini nga sugo, ug wala gayud Siya mobawi o mousab niini. Kini nga balaod klaro ug yano. Walay bisan kinsa ang moapil og sekswal nga pakigrelasyon gawas sa mga utlanan nga nahan-ay sa Ginoo. Kini ma-apply ngadto sa kinaiya sa homosexual sa bisan unsa nga matang ug niadtong adunay makihilawasnong tinguha nga relasyon [heterosexual relationsip] gawas sa kaminyoon. Usa kini ka sala ang paglapas sa balaod sa kaputli.
Kita mosunod kang Jesukristo pinaagi sa pagsunod sa balaod sa Dios sa kaminyoon, diin ang kaminyoon tali sa usa ka lalaki ug usa ka babaye. Kini nga sugo gipahimutang na sukad pa sa sinugdanan. Ang Dios miingon, “Tungod niini ang lalaki magabiya sa iyang amahan ug sa iyang inahan, ug moipon siya sa iyang asawa: ug sila mahimong usa ka unod” (Genesis 2:24). Ang Dios misugo kang Adan ug Eva nga “sumanay, ug dumaghan, ug pun-on ang yuta, ug magagahum niini” (Genesis 1:28).

Ang moderno nga mga propeta ug mga apostoles mimatuod pag-usab niini nga sugo diha sa “Ang Banay: Usa ka Pamahayag ngadto sa Kalibutan,” nga giisyu niadtong 1995:

“Ang Dios misugo nga ang sagrado nga mga gahum sa paglalang pagagamiton lamang tali sa lalaki ug babaye, kinsa legal nga naminyo isip bana ug asawa. …

“Ang banay gi-orden sa Dios. Ang kaminyoon tali sa lalaki ug babaye mahinungdanon ngadto sa Iyang mahangturon nga laraw.”⁴
Kita mosunod kang Jesukristo ug motudlo sa unang mga baruganan sa ebanghelyo ug sa tanang uban pang talagsaong mga doktrina sa Pagpahiuli nga, kon hangupon ug sundon, makahatag og kalinaw, ug hingpit nga kalipay ngadto sa mga anak nga lalaki ug mga anak nga babaye sa Dios. Ingon ani lamang kini ka yano.

Hinaut ang Dios mopanalangin kanato sa atong mga paningkamot sa kalipay pinaagi sa pagkahibalo ug pagsunod sa mga pagtulun-an ni Ginoong Jesukristo ug pinaagi sa pagpa-apil sa uban sa mga pag-istoryahanay kabahin sa gipahiuli nga ebanghelyo nga dili makapasakit.

Paghulagway pinaagi ni Gregg Thorkelson