Kabatan-onan
Luwasa si Kathy
Niadtong Enero 1976, ako nakadawat og tawag sa telepono gikan sa usa ka higala kinsa nagtrabaho sa social services. Siya nangutana kon ang akong asawa ug ako andam ba nga mosagop og bata. Nianang panahona kami adunay duha ka batan-ong mga anak nga among kaugalingon, apan kami miuyon sa pagbukas sa among panimalay sa 17 anyos nga si Kathy.
Sa wala madugay human miabut sa among panimalay, si Kathy mihangyo kon siya makatambong ba sa simbahan uban kanamo. Siyempre kami miingon og oo, ug sa wala madugay si Kathy kanunay na nagtambong sa simbahan. Daghang mga higala ni Kathy gikan sa iyang daang kongregasyon nakabantay sa iyang pag-absent, ug sila wala malipay sa pagkahibalo nga siya nagtambong sa LDS nga Simbahan.
Usa ka adlaw human sa eskwela, si Kathy miingon kanamo nga ang iyang daang simbahan nagplano sa pagpahigayon og gabii alang sa “Pagluwas ni Kathy” alang sa ilang miting sa pangalagad sa kabatan-onan. Si Kathy mihangyo kon ako makauban kaniya niana nga miting ug motabang kaniya sa pagpanalipod sa Simbahan. Nagduha-duha ako sa pagsugot tungod kay bisan dili nako gusto nga makiglantugi uban sa iyang mga higala kabahin sa doktrinal nga mga kalainan, nasayud ko nga siya walay igong nahibaloan kabahin sa Simbahan sa pagpanalipod niini. Mihukom ako sa pagdala og laing kauban, si Richard Jones, kinsa bag-ohay lang miuli gikan sa iyang misyon.
Sa panahon sa gabii alang sa “Pagluwas ni Kathy” mao ang adlaw sa pagpuasa ug pag-ampo alang kanamong tanan. Nag-ampo ko nga ang Espiritu maanaa sa miting ug walay mahitabo nga panagbingkil.
Sa among pag-abut sa simbahan nianang gabhiona, among nabati nga may pagsupak, apan ang ministro sa kabatan-onan mainitong miabi-abi kanamo ug midapit kanamo sa pagsulti sa grupo kabahin sa Simbahan ug sa atong mga pagtuo. Samtang si Richard mipakigbahin sa unang panaghisgutan sa misyonaryo ug mitudlo kabahin sa Pagpahiuli ang 15 o mas batan-on nga mga tawo sa lawak naminaw pag-ayo. Bisan ang ministro sa kabatan-onan nadani.
Dayon among gigahin ang nahabilin sa kagabhion sa pagtubag sa mga pangutana ug adunay maanindot nga panaghisgutan kabahin sa ebanghelyo. Ang pagsupak nga among nabati sa sinugdanan dali nga nawala samtang kalma namong gipasabut ang atong mga pagtuo. Adunay pagtahud sa duha ka pundok. Ang Espiritu Santo mipuno sa lawak samtang among gipakigbahin ang among mga pagpamatuod ug gitubag ang mga pangutana.
Sa pagtapos sa panaghisgutan, ang ministro mipasalamat kanamo sa pag-adto. Dayon, sa among pagtalikud aron sa pagbiya, usa ka batan-ong babaye nga mibarug ug miingon nga gusto niyang mosulti kanamo og usa ka butang. Siya miingon nga sa wala pa kami moabut, siya wala maghunahuna nga ang mga Mormon mga Kristyano, apan karon siya mituo nga kami mas maayo pa nga Kristyano kay kaniya.
Wala kami maghimo daan og igsusulti aron mas mapanindot ang pagtapos sa among panaghisgutan. Nasayud ko nga ang miting dili unta maayo ang pagkahitabo kon kami wala magpuasa ug mag-ampo, naghangyo alang sa Espiritu nga maanaa, ug nangamuyo sa Ginoo nga walay panagbingkil. Ang paka-anaa lamang sa Balaang Espiritu nga kita mahimong epektibo sa pagpakigbahin sa mensahe sa ebanghelyo.