Ang mga Butang Mamahimo ra
Pagbaton og hugot nga pagtuo ug pagsalig sa Ginoo, ug Siya mohatag.
Natawo ko sa Germany ngadto sa buotan, mapinanggaon nga mga ginikanan nga mga miyembro sa Simbahan. Panahon sa Ikaduhang Gubat sa Kalibutan, sa dihang ang akong amahan 10 anyos ang pangidaron, gitudloan siya sa ebanghelyo pinaagi sa usa ka higala didto sa Stettin, nga karon ka bahin na sa Poland. Tungod sa gubat, walay mga misyonaryo didto sa Stettin nianang panahona. Human niya madawat ang ebanghelyo, ang akong amahan mitudlo sa iyang pamilya, ug sila nakabig. Sa wala madugay iyang nahimamat ang akong inahan, nga nagpuyo usab didto sa East Germany. Didto walay mga misyonaryo gihapon. Gitudloan sa akong amahan ang akong inahan sa ebanghelyo, ug siya midawat niini. Naminyo sila ug dayon namalhin ngadto sa West Germany sa wala madugay sa wala pa ko matawo.
Didto sa Germany nianang panahona, dili daghan ang mga miyembro sa Simbahan. Sa eskwelahan ako lang ang miyembro. Sa batan-on nga pangidaron nakabaton ako og usa ka lig-on nga pagpamatuod nga ang Dios buhi ug nga kini mao ang Iyang tinuod nga Simbahan. Wala gayud ako sukad magduhaduha sa kamatuoran sa ebanghelyo. Gihuptan ko kini nga pagpamatuod, ug mitabang kini kanako nga magpabiling aktibo sa akong kabatan-on.
Kahadlok nga Mawala
Ako adunay duha ka mga higala nga kaedad nako nga mga aktibo usab sa Simbahan. Managsoon sila nga mga lalaki, ug nagdungan og tubo. Hinoon, makakita lamang ko nila kon Dominggo tungod kay nagpuyo kami hapit 25 ka kilometro ang gilay-on sa usag usa. Magkitaay kami sa usag usa atol sa miting sa priesthood ug sa mga kalihokan sa Young Men. Bisan tuod og magkita lamang kami og kausa sa usa ka semana, ang pagkamaayo nga managhigala nakatabang kanamo nga magpabiling aktibo sa Simbahan.
Wala madugay akong namatikdan nga daghan sa mga edaran nga mga batan-on nahimong dili na kaayo aktibo sa Simbahan, ug ako adunay dakong kahadlok nga moabut ang adlaw basin mawala nako ang akong pagpamatuod. Diyutay ra kaayo ang mga kabatan-onan sa Simbahan didto sa Germany niadtong mga panahona nga kon sila mahimong dili na kaayo aktibo, ang ilang pagkawala mahibaloan dayon. Makahahadlok kadto alang sa akong mga ginikanan. Nawala kanila ang tanan aron sa pagmatuto sa ilang mga anak sa relihiyoso nga kagawasan, ug karon naghunahuna sila, “Unsa man ang atong mahimo aron dili mawala kanato si Erich?”
Usa ka adlaw sa dihang hapit na ko mag-edad og 14 anyos, ang akong pamilya nagdrayb pauli sa balay gikan sa simbahan. Among namatikdan, sa makausa pa, nga ang pipila sa mga kabatan-onan mitalikod sa Simbahan. Miingon ko sa akong mga ginikanan, “Gusto nako nga inyo kong guruyon paingon sa simbahan hangtud mag-edad ko og 21, ug dayon ako na ang bahala sa akong kaugalingon!” Gisultian ko gayud sila niana, ug ang akong inahan kanunayng mobalik-balik niini ngari kanako.
Usa ka Desisyon sa Edukasyon
Kini nga kabalaka nagpasabut kon ngano, sa dihang hapit na ko mag-edad og 10 ug nag-eskwela sa elementarya, ang akong mga ginikanan mihimo og usa ka desisyon. Didto sa Germany magsugod kamo og tumong sa mas taas nga edukasyon sa bata pa. Ang akong mga ginikanan midesisyon nga dili motugot kanako nga moadto sa mas taas nga edukasyon tungod kay ilang nakita ang daghang kabatan-onan nga mibiya sa Simbahan samtang mieskwela niining mga eskwelahana nianang higayona. Sila miingon, “Mahimo ka nga moadto bisan asa, apan dili ngadto sa Gymnasium [eskwelahan nga moandam kanimo alang sa edukasyon sa unibersidad], tungod kay dili kami gusto nga mawala ka ngadto sa kalibutan!”
Kana nga desisyon nagpasabut nga makadawat ako og nag-una nga edukasyon ug sunod bokasyonal nga edukasyon; alang kanako, nagpasabut kana og usa ka degree kabahin sa negosyo. Gilimitahan niini ang daghan nakong propesyonal nga mga posibilidad. Gikompleto nako ang akong training sa dihang nag-edad ako og 18 ug gitawag ako sa pagserbisyo isip usa ka misyonaryo didto sa Munich, Germany. Gihigugma nako ang pagkamisyonaryo.
Sa dihang nahuman na ako sa akong misyon, akong nakita sa akong kaugalingon nga walay daghang kapilian sa trabaho. Nakahuman ko sa akong edukasyon. Duha ka tuig human sa akong misyon, akong giminyoan ang akong asawa, si Christiane, ug ako wala nay higayon nga makabaton og edukasyon sa unibersidad. Adunay higayon nga mibati ko og kaguol mahitungod sa desisyon sa akong mga ginikanan tungod kay akong gibati nga limitado kaayo.
Dayon ang usa ka hunahuna miabut kanako: “Kon unsa man ang gibuhat sa akong mga ginikanan, gibuhat nila kini aron protektahan ako . Gibuhat nila kini tungod sa gugma, ug kini dili mahimong dili makaayo kanako.” Bisan tuod og usahay daw dili kini makaayo sa kalibutanong paagi, nakasabut na ako karon nga dili gyud kini mahimong tinuod nga dili makaayo. Nakahukom ko nga magtrabaho sa insurance business, ug wala madugay nahimo ko nga executive sa kompanya nga akong gitrabahoan.
Ang usa ka hagit alang kanako mao nga kaniadto pa ko gusto nga mahimong magtutudlo, ug dili ka mahimong magtutudlo sa Germany kon walay edukasyon sa unibersidad. Hinoon, sa kaulahian nahimo kong usa ka magtutudlo—usa ka magtutudlo sa relihiyon. Nahimo kong usa ka magtutudlo alang sa Sistema sa Edukasyon sa Simbahan. Ug sa laktud nga pagkasulti, mao kana ako karon—usa ka magtutudlo. Busa nakabaton ako og pagpamatuod nga importante kaayo nga maminaw sa inyong mga ginikanan, mosunod sa ilang mga tambag, ug mosalig nga sila nahigugma kaninyo, nag-ampo alang kaninyo, ug nasayud unsay labing maayo alang kaninyo. Ang tinguha nga magpabiling aktibo sa Simbahan lig-on kaayo diha sa akong bahin ug ang tinguha nga protektahan ako lig-on kaayo diha sa bahin sa akong mga ginikanan nga ang tanan naghiusa alang sa akong kaayohan.
Ang Akong Mas Taas nga Edukasyon
Ang lain pang butang nga nakatabang kanako nga magpabiling lig-on isip usa ka batan-on mao ang programa sa seminary, nga gisugdan didto sa Germany niadtong 1972, sa dihang 14 anyos pa ako. Kini adunay dakong natabang sa akong kinabuhi. Makahinumdom pa ako sa akong magtutudlo sa seminary, tungod kay nagbilin siya og dakong impresyon ngari kanako ug miimpluwensya kanako sa ingon ka positibo nga paagi.
Tungod sa akong kasinatian sa seminary ug sa akong indibidwal nga pagtuon sa mga kasulatan isip usa ka batan-on, nakat-on ako sa paghigugma sa mga kasulatan. Ang akong pagtuon mipalig-on sa akong pagpamatuod, ug wala gayud mawala kanako ang akong gugma alang sa mga klase sa seminary ug institute. Nagtudlo ako og usa sa unang sayo sa buntag nga klase sa seminary didto sa Germany. Maanindot kaayo kadto nga klase. Ganahan kaayo ang mga batan-on niini, ug motunga sila kada buntag. Ang uban kanila mibiyahe og layo-layo. Gikan niana nga grupo, ang batan-ong mga lalaki nakaadto tanan sa misyon, ug hapit tanan niadto nga mga batan-ong lalaki ug mga babaye nagpabiling aktibo sa Simbahan.
Kon maghunahuna ko kon giunsa nako sa pagbaton ang akong pagpamatuod ug kon unsay labing dako nga impresyon ngari kanako alang sa kaayohan, makaingon gyud ko nga mao kadtong mga klase sa seminary ug institute nga akong gitambongan. Kadto mao ang pagkat-on sa mga baruganan sa ebanghelyo ug mga doktrina sa mga kasulatan, uban sa grupo sa mga higala, gikan sa usa ka magtutudlo nga among gidayeg.
Usa sa labing maayo nga mga butang nga angayng buhaton kon magtuon sa mga kasulatan mao ang paggamit niini nganha sa imong kaugalingon. Moingon kanunay ang among magtutudlo, “Kon magbasa kamo sa kasulatan, sulayi og puli sa inyong kaugalingong pangalan.” Nadiskubrihan nako nga makabasa ko sa kasulatan nga daw ako si Nephi o si Helaman o si Moroni. Nakapausab kana sa tibuok nga kahimtang alang kanako kon ako magbasa sa mga kasulatan. Daw sama kini sa usa ka damgo; sa kalit lang akong makita ang akong kaugalingon diha sa sama nga sitwasyon ingon niadtong akong gibasa.
Ang mga kasulatan nagtabang kanako nga masabtan nga ang hugot nga pagtuo usa ka butang nga tinuod. Dili lamang nga makahibalo kita mahitungod sa mga butang diha sa mga kasulatan sa teyoryatikanhong paagi, apan ang hugot nga pagtuo nagkonektar kanato ngadto sa katinuod sa Ginoo alang kanato. Usa kini ka butang nga akong nabatunan gikan sa akong panahon sa seminary isip usa ka batan-on. Ako adunay usa ka sigurado nga pagtuo nga kon ang Ginoo mohatag og buluhaton, kita makahimo sa “pag-adto ug pagbuhat” (1 Nephi 3:7), ug mohatag Siya sa unsay atong gikinahanglan aron matuman kana nga buluhaton.
Kalig-on Gikan sa mga Kasulatan
Ang usa ka kasulatan nga nakatabang gayud kanako sa dihang batan-on pa ako mao ang Josue 1:6–9. Ang bahin niini, nag-ingon: “Magmakusganon ka ug magmaisug ka. … Pag-atiman sa pagbuhat sumala sa tanang balaod. … Ayaw pagtipas ngadto sa tuo ni ngadto sa wala gikan niana, aron magmauswagon ka.”
Isip usa ka batan-on, naghunahuna ko, “Sa higayon nga makadawat ko og buluhaton gikan sa Ginoo, dili ko motipas ngadto sa tuo ni ngadto sa wala.” Ako adunay pipila ka maayo nga mga kasinatian isip resulta. Sama pananglitan, usa ka adlaw samtang anaa ako sa akong training sa negosyo, kinahanglan ko nga moadto og usa ka miting sa Simbahan, apan ako adunay responsibilidad sa trabaho nga may kalabutan sa mga sulat. Kasagaran kini nga responsibilidad mokuha kanako ug sa uban nga mga trainee og laing usa ka oras human sa among regular nga mga oras sa pagtrabaho. Apan kinahanglan ko nga moadto sa Hamburg sa alas 5:30 sa hapon nga tren aron makaabut ko sa akong miting sa Simbahan. Akong gisultihan ang uban kabahin sa akong problema, ug sila miingon kanako nga, “Ayo-ayo na lang. Dili kini mahitabo.”
Miingon ko, “Siyempre mahitabo kini, tungod kay usa kini ka importante nga miting.” Gilihok nila ang ilang mga abaga ug may pagbugalbugal nga miingon, “Oo lagi—ikaw ug ang imong tinuohan. Naghunahuna ka nga kay relihiyoso ka man ang tanang butang mamahimo ra. Kana nagpasabut nga kinahanglan natong humanon ang mga sulat 10 minutos sa dili pa mag-alas 5:00. Wala pa gayud kini mahitabo sukad.” Miingon ko, “Aw, unsa man ang mahitabo mahitabo. Apan kinahanglan ko nga moadto sa Hamburg sa saktong oras karong gabii.”
Karon, motuo mo niini o dili, sa labing una ug mao lamang nga higayon sulod sa tulo ka tuig, ang tanan nahuman nianang adlawa 10 minutos sa wala pa mag-alas 5:00, ug nakaabut ko sa tren sa saktong oras. Nakapahingangha kini sa akong isigka mga trainee ug nakapaabli sa pultahan alang kanako nga makaistorya og pipila kabahin sa ebanghelyo uban kanila.
Ako adunay hingpit nga pagsalig ug hugot nga pagtuo nga kon ang Ginoo mohatag kaninyo og buluhaton, mamahimo ra kini kon kamo “dili motipas ngadto sa tuo o ngadto sa wala.” Wala ko makahibalo nga ang buluhaton sa mga sulat nga among gibuhat mahuman og sayo nianang adlawa. Sa kanunay dili gyud ninyo mahibaloan daan kadtong mga matang sa mga butang. Dili kamo makasulti sa Ginoo kon unsaon kini sa pagpahinabo, apan uban sa hugot nga pagtuo ug pagsalig Kaniya, sa kanunay mamahimo ra kini.
Ang akong pagtuon sa mga kasulatan ug ang mga ehemplo sa akong mga ginikanan naghatag kanako og usa ka butang nga importante kaayo, bisan isip usa ka batan-ong lalaki. Manag-uban, sila mitabang kanako nga mapalambo ang dakong pagtuo nga diha sa akong inadlaw-adlaw nga pagpuyo, ang Ginoo motabang ug mopanalangin kanako.
Paghulagway sa litrato ni Christina Smith
Alma 46:20: Duol, ni Walter Rane, sa maayong kabubut-on sa Church History Museum