Mga Ideya sa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang pipila ka mga ehemplo.

“Napanalanginan Tungod sa Akong Calling,” p. 11: Samtang magtudlo kamo sa leksyon, hunahunaa ang paghisgot kon giunsa sa Ginoo pagpagaan ang gibug-aton nga gipas-an sa tigsulat samtang mialagad siya uban sa bug-os niyang kasingkasing. Pagdapit og mga sakop sa pamilya sa pagpaambit kon sa unsang paagi sila napanalanginan sa ilang pagserbisyo sa Ginoo.

“Unsa ang Gidala sa mga Pioneer?” p. 16: Hunahunaa ang paglista sa upat ka mga punto sa kaalam nga gipresentar ni Presidente Stephen L. Richards dinhi niini nga artikulo. Hisguti kon sa unsang paagi nga ang matag usa niini molig-on sa inyong pamilya ug mopanalangin sa mga kinabuhi niadtong kinsa mosunod sa inyong mga tunob.

“Pagpakigbahin sa Ebanghelyo uban ang Pagsalig,” p. 30: Hunahunaa ang pagdapit sa inyong pamilya sa paghisgut kon unsaon sa paggamit ang mosunod nga mga pulong gikan sa artikulo: “Palihug hinumdumi nga dili kamo kinahanglang mobati nga kinahanglan kamong mangatarungan sa inyong gituohan; kinahanglan lamang ninyong ipasabut kanila sa usa ka diwa sa paghigugma ug pagkamabination. Ang kamatuoran kanunay nga mopatigbabaw kon ang tinuod nga doktrina itudlo.”

“Siya Miingon Kanako, ‘Dili Mahimo,’” p. 58: Human sa pagbasa o pag-summarize sa istorya, isipa ang pagrole-play sa mga pamaagi sa pag-atubang kon adunay mga tintasyon. Ang mga sakop sa pamilya mahimong magpraktis sa pagsulti og kusog sa “Dili mahimo,” sama sa gibuhat ni Chase.

Unsaon na man lang Ang Family Home Evening?

“Unsaon na man lang ang family home evening? Dili ba karong gabii ta maghimo niini?” ang akong sayis anyos nga anak nga babaye, si Leilani, nangutana. Usa ka pagbati nga nakasala ang mikuyanap kanako. Ang akong bana ug ako naningkamot sa paghimo og family home evening, apan tungod sa daghang mga katarungan bahin sa among oras, nawala na kanamo kini nga batasan. Ang pagpahinumdom ni Leilani nakahimo kanamo nga mopasalig og usab sa dili na pagpakyas sa family home evening sa bisan unsa nga rason.

Samtang si Leilani ug ang iyang igsoong babaye, si Nadia, nagkadako, ganahan na silang magtudlo panahon sa family home evening sa mga butang nga ilang nakat-unan sa Primary. Gani ilang i-drawing ang kaugalingon nilang mga visual aid aron sa paghulagway sa mga baruganan nga gusto nilang itudlo. Kami nalipay isip mga ginikanan nga magtan-aw kanila nga maghisgot kabahin sa ebanghelyo ug sa kasagaran makapasabut sa hilisgutan nga ilang napili.

“Unsaon na man lang ang family home evening? Dili ba karong gabii ta maghimo niini?” mao ang mga pulong nga gipaningkamutan nako nga dili na unta balik-balik nga madungog. Nasayud ako nga samtang gagmay pa ang mga bata mao kana ang pinakamaayong panahon sa pagtudlo kanila. Ang kalibutan mahimong mogamit sa iyang impluwensya, apan kon kita molihok ug mag-uswag kauban sa atong mga anak, makab-ot nato ang atong tumong sa pagpatubo og mga lalaki ug mga babaye nga adunay baruganan.

Patricia Cárdenas de Prado, Guatemala