Ngano nga ang Simbahan mihatag man og ingon nga gibug-aton diha sa pagserbisyo? Nganong dili man kita mahimong maglingaw-lingaw lang?
Ang ebanghelyo ni Jesukristo naghatag og dakong gibug-aton diha sa pagtabang sa atong isigkatawo. Dili lang igo nga mobati kita uban sa tawo nga nanginahanglan—ato kining responsibilidad ang pagbuhat. “Hinoon tumana ninyo ang pulong, ug dili kay magpaminaw ra kamo niini” (Santiago 1:22).
Ang Manluluwas nagtudlo, “Maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako” (Mateo 25:40), ug si Haring Benjamin nagtudlo nga “kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17). Ang pagserbisyo sa uban nagpakita sa atong pagkamapahinunguron ngadto sa Ginoo ug ngadto sa kaayohan sa Iyang mga anak.
Ang pagserbisyo dili lamang makatabang sa uban. Modala usab kini ngadto sa atong kaugalingong espirituhanon nga pagtubo. Kon kita nagserbisyo diha sa atong mga calling ug naghimo og uban pa nga serbisyo, wala lamang kita nagpalig-on sa uban apan nahimo usab nga mas maayo nga mga tawo.1
Dugang pa, ang pagserbisyo mahimong makalingaw kaayo kon inyo kining tan-awon uban sa sakto nga kinaiya. Hunahunaa ang inyong mga talento ug mga kahanas ug kon unsaon ninyo sa paggamit niini aron sa pagtabang sa uban. Ang indibidwal nga pagserbisyo magantihon, ug mahimo usab nga malingaw kamo sa pagserbisyo uban sa mga higala! Pagpundok og usa ka grupo sa mga tawo, ug paghunahuna og maayo kon unsaon ninyo nga makatabang sa usa ka bag-o ug mamugnaon nga paagi. Mahingangha kamo kon unsa kanindot ang pagserbisyo.
Ang pagserbisyo mahimong makalingaw kaayo kon inyo kining tan-awon uban sa sakto nga kinaiya.