Faalagolago i le Alii
“Ia e faatuatua i le Alii ma lou loto atoa” (Faataoto 3:5).
Ao avea au ma se teineitiiti sa ou mulimuli i lou tama i soo se mea e alu i ai. Ou te faamemelo lava ia te ia i lona tuuto i le Alii. Na ia faatuina se tulaga faatonuina maualuga mo au o le auauna atu ma le le manatu faapito. E vaiaso atoa lava e le galue ai i tausaga uma. Peitai, nai lo le o i se malaga, na te faatonuina lo matou aiga e fesoasoani ia te ia e vali le fale o le tina ua oti lana tane o loo matou tuaoi. Ua na o le tasi lea o faataitaiga o le tele o galuega auauna atu. E mafaufau pea lava o ia i isi.
Ina ua ou i ai i le aoga maualuga, sa ma’i tigaina lo’u tama. Sa ou tatalo e le aunoa ma aioi atu i le Tama Faalelagi ina ia faamanuia lou tama ina ia malosi. Sa i ai o ia i le falemai mo le masina e tasi, ona maliu ai lea.
O se mafatiaga lea i lo matou aiga. E lei i ai se uiga ia i matou o lenei mea ona matou te manaomia lo matou tama. Sa ou tatalo ina ia ou malamalama pe aisea ua tupu ai lenei mea ma pe aisea ua le tali ai e le Tama Faalelagi au tatalo. Sa foliga mai ia te au ua filemu le lagi. Ou te lei maua se tali o au tatalo. Sa ou lagona faapea ua tuulafoai au e le Tama Faalelagi. Ae sa faaauau pea ona ou tatalo.
I le tausaga mulimuli ane, sa ou auai atu i se sauniga faamanatuga lea na faitau ai e le failauga se mau mai le Faataoto:
“Ia e faatuatua i le Alii ma lou loto atoa; ae aua le faalagolago i lou lava atamai.
“Ia e manatua o ia i ou ala uma, ona faatonuina ai lea e ia lava ou ala.” (Faataoto 3:5–6).
Na molimau mai e le Agaga ia te au o le tali lea o lau tatalo! Sa manaomia ou te faalagolago i le Alii. Sa umi se taimi na ou maua ai lena tali, ma e le o se tali sa ou manao ai, ae sa avea o se tali sili ona matagofie o se tatalo. E le tau manaomia ona ou malamalama pe aisea ua tupu ai lenei mea. E manaomia ona ou faalagolago i le Alii.
Pe a e faalagolago i le Alii, e mafai ona e faia soo se mea lava—e tusa lava pe matuai faigata—aua e Na te taitaia ou ala. E na te savali i ou autafa. E Na te uuina lou lima. E Na te auina atu Ana agelu e siomia oe. O la’u molimau lena. Ma e moni ia i matou uma lava.
Ata o Sister Dalton na pueina e le Busath Photography; ata o le ula na pueina e Robert Casey; ata pue o le aiga mai le faaaloaloga a Sister Dalton