Sa Ou Matuai Manao Lava e Taofi
O le auala ua ou faatoilaloina ai la’u vaisu o ponokalafi.
Sa amata lau tauiviga ma ponokalafi i lou talavou, ina ua faailoa mai e nisi ia te au ni tusi ma amioga le talafeagai. E le i avea le talalelei ma se vaega taua o lo’u olaga i lena taimi. E ui lava ina sa o lo’u aiga i le lotu i le taimi na ou i ai i le Peraimeri, ae i le taimi ina ua 13 pe 14 o’u tausaga, matou te le’i toe o. O se taunuuga la, sa le’i i ai moni ia aoaoga o le talalelei i le faiga o a’u faaiuga.
E lei i ai lava so’u manatu e ta’u i ou matua mea na faailoa mai ia te au e tuaoi ma uo. Sa ou matua maasiasi lava e toe talanoa i mea na ou vaai ma aafia ai. Sa ou le iloa pe faapefea ona ou foiaina. O le a avea pea ma a’u mealilo, i le tele o tausaga a sau, la’u vaisu o ponokalafi.
Faatosinaga a le Talalelei
A o lei toe mamao ona ou faauu lea mai le aoga maualuga, sa tupu ai se vavega laitiiti, o se mea o le a toe liliu ai lo’u olaga i le isi itu. E ui i le vavamamao o a’u faatinoga ma tulaga faatonuina o le talalelei, ae i se tasi o Aso Sa i le taeao na ou mulimuli ai i se uunaiga malosi ou te alu i le lotu ma totogi le sefuluai. Ina ua ou taunuu i le falesa, sa ou fesili mo tagata sa ou iloa. O se tasi o igoa na ou ta’ua o le peresitene o Alii Talavou sa i ai a o ou tiakono, i le taimi mulimuli na ou lotu ai. Ua epikopo nei i le uarota.
Sa fesoasoani lenei epikopo lelei e toe aumai a’u i le Lotu. Sa ou tautau atu au agasala, ma sa ma galulue e faatulaga se fuafuaga o le alualu i luma. Sa ou salamo i le aluga o nai masina. Sa siitia lou perisitua. Sa i ai sou tofiga. Sa matua lelei lava lou tulaga, ma sa valaauina au e auauna atu i se misiona, ma e tele ni nai tausaga na puleaina ai le mea na fai ma a’u vaisu.
Mau i le Neti
Ina ua ou foi mai ua mae’a la’u misiona, ou te le i tauivi ma se ponokalafi; aua sa leai se mea ou te maua ai. Na suia lena tulaga i le faaiuga o le vaitau o le 1990, ina ua matua faateleina le Initoneti. Sa faafuasei lava ona ou oo atu i ni ata mataga i luga o le initoneti, ma sa ou toe foi ai pea lava pea i saite o ata mataga i masina na sosoo ai. Na maileia au e le uepi.
Sa ou manao e aapa atu i se tasi mo se fesoasoani, ae sa ou le mautinoa po o ai—ae pe faapefea foi. Pe faapefea ona ou talanoa atu i ou matua e uiga i lenei mea? Pe faapefea ona ou tauina atu i lo’u epikopo e ui lava sa tele lo’u alualu i luma, a e ua le mafai ona tuu lenei ituaiga amioga le mama? Sa ou matuai manao lava e tuu, ae sa ou matuai maasiasi lava i lo’u vaivaiga e tau atu i se tasi, o lea sa ou nofonofo ai lava ma la’u vaisu.
Ou te le i tauina foi i lou toalua, lea sa ma faaipoipo i le 2000. Sa ou manao e tau atu ia te ia la’u tauiviga i le taimi na ma tafafao faamasani ai, ae sa ou fefe nei vaai maualalo mai o ia ia te au, pe sili atu foi ona leaga, ne’i musu ma te faaipoipo. O lea sa ou pepelo ai. Ma sa faaauau ai pea i le ma mafutaga. Sa ou tau lafilafi ne’i maua a’u. Sa ou nanaina a’u ata i lau komepiuta. Pe a fesili mai lou toalua e uiga i ni saite faapitoa i le Initoneti, sa ou faafitia le mea o loo talanoa mai ai. E faapena ia vaisu; latou te foafoaina ni tagata pepelo maoae. Sa ou iloa le fausiaina o se papupuni sima i le ma ulugalii ma sa tiga tele ai o ia, ae sa le mafai ona ou faailoa atu lo’u faafitauli. E lei taua tele ia te au lau amio ae o le vaaiga a tagata ia te au.
O lo’u olaga itu lua—ma iu ai ina aluese le Agaga—na ou oo atu ai i le faateleina o agasala matuia, e aofia ai ma le le faamaoni. Sa maua e lo’u toalua ni uunaiga malolosi o loo i ai se mea o loo sese ma sa ia ta’u maia ia te au. Ma le matuai salamo, sa ou tauina atu ia te ia la’u mea sa fai.
O lo’u manatu aupito maualalo lena, o le manatu lea na ou iloa ua tatau ona ou sui. Sa nofo mai i ou luma le tamaitai ou te alofa i ai. E alofa o ia ia te au. Sa ou faalataina o ia. Ona ou naunau ai lea e faia soo se mea e faasao ai le ma mafutaga ma lo ma aiga.
Toe faaleleia
Sa amata ona ma feiloai soo ma lo’u epikopo e galulue i le faagasologa o le salamo ma le a’oa’iga a le Ekalesia. Sa ia fautuaina lou auai atu i fonotaga o le polokalama o le toe faaleleia o se vaisu, lea na faia e le Tautua a le AAG mo Aiga. Ou te le i faalogo lava i le polokalama. Sa ou faalogo e fai e le vaega ni fonotaga e le faalauaiteleina ma e leai se totogi, e faatatau lava i laasaga e 12 o le Alcoholics Anonymous, ma fausia ai se auivi o aoaoga faavae ma mataupu faavae o le Ekalesia.
Ou te tau atu o fonotaga muamua lava, sa ou manatu ai faapea, “E le manaomia lo’u i ai iinei. E le o i ai so’u faafitauli i ponokalafi. E mafai ona ou tia’ia i soo se taimi.” O lena mea, ioe, e lē sa’o.
Faatasi ai ma se faamalosiau mai lo’u epikopo, sa faaauau pea ona ou auai. Na amata ona liusuavaia lo’u faamaualuga, ma sa amata ona ou galueaiina ia laasaga o le polokalama: o le faamaoni, faamoemoe, faalagolago i le Atua, upu moni, tautau atu, suiga o le loto, lotomaualalo, saili le faamagaloga, totogi ma toe faalelei, tali atu mo au lava i aso uma, faaaliga patino, ma le auauna atu. Mo le taimi muamua lava mai se taimi umi, sa ou ola ai i se olaga e “manino le mafaufau”, o se olaga e saoloto mai ponokalafi. O le toe faaleleia e le faapea ua matua “uma” lava, ae ua folasia mai ia te au se tulaga fou o le saolotoga. Na oo mai aua a o ou faatinoina laasaga e 12, sa ou malamalama i mea na i tua atu o le mea sa fai ma a’u vaisu.
Sa ou aoaoina o le toatele lava o tagata e tauivi ma vaisu, e liliu atu i ni “vailaau faaletagata lava ia” e faatumu ai le gaogaosa i o latou olaga. O le tiga, faanoanoa, tuulafoaiina, fefe, po o isi ituaiga o faaletonu e mafai ona avea ma ‘amoti e faaosofia ai tagata e faaaoga nei vailaau faaletagata lava ia e faanofogofie ai i latou. O nisi e faaaogaina fualaau e faatonuina. O isi e faaaoga fualaau faasaina. O isi e faaaoga meainu malolosi. Mo a’u, sa aumaia e ponokalafi se “fofo vave” puupuu e le moni, lea sa ou manatu ou te moomia.
O le iloaina o le mea na faaosofia ai la’u vaisu o le tasi lea o vaega. O le aloese mai siosiomaga na fesoasoani i la’u vaisu o le isi lea. O lenei tulaga e manaomia ai le mataala i le 24 itula o le aso, fitu aso o le vaiaso mo lo’u olaga atoa. E le mafai ona ou alu i le initoneti e “tau ina autilo.” O le mea moni, afai e na o au, ou te le alu lava i le initoneti. E le mafai ona ou tilotilo i se faasalalauga ma faafiafia i lo’u mafaufau. E leai se keipo o la matou TV i le fale. A ou alu i le galuega, ou te aloese mai le faaaogaina o nisi o auala ou te iloa o loo i ai ni ata o loo faapipii i na auala e mafai ona faaosofia ai ni manatu le talafeagai. A amata ona ou se’e ese ma alu solo lo’u mafaufau, ou te liliu atu i lo’u toalua, i lo’u epikopo, ma le tatalo mo le malosi.
O a’u vaisu na aafia ai vaega aupito iti o lo’u olaga, ae o le faia o nei puipuiga e matua aoga lava. E le mafai ona ou faatalale i nei puipuiga aua ou te iloa le mea e mafai e la’u vaisu ona fai ia te au ma i latou ou te alofa i ai.
Faalagolago i le Atua
E ui i lea, e le o se mea e na o le aloese mai le leaga. E tatau foi ona ou faia e le aunoa, ma le mataala ni taumafaiga e liliu atu i le lelei. Na fesoasoani le tele o laasaga e 12 ia te au e faia lenei mea i le aumaia atili o au i le Atua.
O aso uma pe a ou ala, ou te tootuli ma faafetai i le Tama Faalelagi mo le tuuina mai ia te au o le avanoa e salamo ai i au agasala ma alu atu ia te Ia e ala i le Togiola a Lona Alo o, Iesu Keriso. Ou te aioi atu ia te Ia e ta’u mai ia te au Lona finagalo ina ia mafai ona ou faia. Ou te aioi atu ia te Ia e taitai ese au mai faaosoosoga. Ou te tatalo e pei o loo ou faalagolago atu i le Tama Faalelagi i minute uma o le aso—aua o loo ou faia—ma e ou te teuina lena tatalo i lo’u loto i le aso atoa. Ou te toe tatalo i po taitasi. Ou te faaaluina foi sina taimi i tusitusiga paia i aso uma ina ia mafai ona taulai atu ou mafaufauga i mea mama. Afai ou te le faia nei mea o se mausa, ou te le maua le Agaga i lo’u olaga. Ma pe a tuua na o au, e le lava lo’u malosi e teena ai faaosoosoga.
Sa ou talitonu mo se taimi umi e mafai ona ou foia au amioga i soo se taimi ou te manao ai i lo’u lava loto. Ae na ou matua toilalo mataga. Ina ua mavae se taimi, sa ou le lavā i au lava taumafaiga, ae maise ina ua le aoga “a’u lava taumafaiga.” Sa ou iloa e le mafai ona ou faia le mea na ou manaomia e aunoa ma le fesoasoani a le Alii. Na fesoasoani mai leEteru 12:27 ia ou malamalama atili i lenei mea. Na fetalai atu le Alii ia Moronae, “Ua lava lo’u alofa tunoa i tagata uma o e faamaulaloina i latou lava i o’u luma; aua afai latou te faamaulaloina i latou lava i ou luma, ma faatuatua ia te au, ona ou faia lea o mea vaivai ma mea malolosi ia te i latou.”
O le taimi lava na ou alu atu ai ia te Ia, ma faia pea mea uma na mafai ona ou faia (tagai i le 2 Nifae 25:23), sa ou iloa ai o Lana fesoasoani e mafai ai ona sili atu mea ou te mafaia ma avea ma sē e sili atu nai lo se isi lava mea na ou moemiti i ai pe a ou faalagolago i au lava taumafaiga (tagai i le Alema 7:14).
O loo ma galulue nei ma lou toalua o ni tagata faamaopoopo i fonotaga a le polokalama o le toe faaleleia o mea ua fai ma vaisu. Na ia aoaoina—ma o loo fesoasoani i isi ia malamalama—o le Togiola e le gata ia i latou o loo galulue e foia se mea ua fai ma vaisu ae faapea foi i latou ua aafia i vaisu ae le o ni a latou lava filifiliga. Pe a tatou liliu atu i le Faaola, e mafai ona galue Lona alofa mutimutivale i o tatou olaga uma.
Mo i latou o loo tauivi ma vaisu ma i tagata latou te alolofa i ai, e mafai ona ou molimau atu o loo i ai le faamoemoe. E i ai pea lava le faamoemoe i le talalelei a Iesu Keriso.
Faamoemoe i le Faaola
Ou te matuai faafetai ia Iesu Keriso ona sa Ia faasaoina moni mai lava au mai filifili o le agasala. O vaisu e pei lava ua taofia oe e ni filifili lea e “noanoatia ai le fanauga a tagata, ina ia avea faatagataotaua i latou i le vanu faavavau o le malaia ma le auega” (2 Nifae 1:13). Ina ua ou iloa ua ou oo i faafitauli, sa ou le iloa po o fea ou te liliu i ai. Sa ou matuai popole aua sa le mafai ona ou faasaolotoina au lava mai ou mafatiaga. Peitai na mafai ona faasaoloto au e le Alii. Ina ua ou liliu atu ia te Ia, sa i ai o Ia iina e fesoasoani mai.
E mafai ona ou faapea atu e pei o Amona: “Ioe, ua tusa au nei ma le leai; o lo’u malosi foi ua ou vaivai ai; o le mea lea ou te le mitamita ai ia te au lava, ae peitai, ou te mitamita i lo’u Atua, aua o Lona malosi ou te mafaia ai mea uma” (Alema 26:12). Ou te iloa e mafai ona fesoasoani mai leAtua ia tatou faia mea uma, e aofia ai le faatoilaloina o filifili o vaisu.