Tama, Ou Te Manaomia Oe
Michael K. Hewett, Iuta, ISA
Sa ou fetosoaia paipa e faaalu ai le vai i se vaega o la matou faatoaga i Kalefonia i matu, ISA. O lena aso faapitoa o se faamanuiaga ona sa i ai lo’u Tama e fesoasoani ia te au. Ina ua uma le ma galuega, sa ma feosofi i a ma taavale (ATV) ma agai atu i le fale ma mafaufau i le taumafataga o le afiafi. Sa ta’i e Tama le ala.
E tuaoi le isi itu o la matou faatoaga ma le Vaitafe o le Pit. Sa ui a ma taavale i autafa o le faatoaga ina nei papaioa le vaofalī i pa’u tetele o a ma taavale. O le itu taumatau o le faatoaga, a o le vaitafe, sa i lalo ifo o se faupuega eleele, i lo ma itu tauagavale. Sa le mafai ona ma iloa lelei atu ona o le puaoa.
Sa fai sina saoasaoa o le alu o a ma taavale ma sa ou se’e ese ai mai le ala ma so’a se pupulaau i le pa’u i tua o le itu taumatau. O lea tulaga na ou seu faamalosia ai le ATV i le tauagavale agai i le vaitafe ma lalo i le faupuega eleele. Sa ou taumafai e taofi le taavale, ae na tifato le auvai ma sa saoasaoa tele la’u alu. Sa ou manatu o le a ou tofu tonu lava i le vaitafe. O le mea na laki ai, sa i ai se laau i le auvai o le vaitafe i lo’u ala. O le isi mea na ou iloa, na ou tilotilo ifo i lalo i le taavale—mai le laau! Sa ou matuai fefe lava.
Sa ou faapea na toeitiiti lava a ou oti, peitai ou te lei lavea, sa na o ni nai maosiosia ma ni unooa. Ina ua ou maua sina to’a ma tau manavanava, sa ou iloa ai e le mafai ona ou toe aumaia na o a’u i luga le taavale mai le auvai. Sa ou saga manatu pea ia faliu mai le ulu o lo’u tama i luga a’e o le faupuega eleele, e tauautilo mai a’u, ae leai. Sa atili ai ona ou faanoanoa.
Sa ou tau tolotolo atu i luga o le auvai, ae sa ou le iloa atu lo’u tama. Sa ou tatalo lemu atu i lou Tama oi le Lagi, ma aioi atu ia te Ia e auina mai Tama ia te au. Ona amata lea ona ou savali.
O le taimi lea, ua toeitiiti taunuu Tama i le fale ae manatu loa sa ia faalogoina lo’u valaau atu ia te ia. Na tilotilo mai o ia i tua mo le taimi muamua lava talu ona ma tuua le faatoaga. Ona ia iloa ai lea ou te le o mulimuli atu i ona tua. Sa ia iloa e i ai se mea o tupu ona toe sau ai lea e su’e au seia oo ina maua.
Sa faamatala mulimuli ane e Tama ia te au na faalogo o ou fai atu, “Tama, ou te manaomia oe!” O le taimi lena, ua silia ma le lua maila (3 km) lona mamao. Sa ou iloa ai, sa faafofogaina e se Tama Faalelagi alofa la’u tatalo ma ta’u atu ai i lo’u tama sa ou manaomia lana fesoasoani.
Ou te faafetai mo le Agaga Paia ma musumusuga o le upumoni ma le taitaiga lea tatou te maua mai ia te Ia. Ou te faafetai foi mo se tamā alofa na ola i se tulaga na mafai ai e le Agaga Paia ona talanoa atu ia te ia ma ia lagonaina.