E Te Manao i se Faamanuiaga?

Lia McClanahan, Iuta, ISA

I se tasi taeao a o ou savali agai atu i se mauga i le itu i saute o le lotoa o le Iunivesite o Polika Iaga sa ou faalogoina ai se patatu i ou tua. Sa ou faliu ma vaaia ai se alii talavou o loo taatia e u i lalo ona foliga i luga o le auala savali, sa taatia mamao ese lana uila ua matuai malepe. Sa ou tu ma le te’i seia oo ina taumafai o ia e tuu i luga ma le vaivai lona ulu. Ona ou faatopetope atu lea ia te ia, faatasi ai ma isi tagata e toafa o e na savavali i luga o le mauga.

O le tamaitiiti aoga na mua’i oo atu i le alii na lavea na ia fuliina ma le faaeteete i luga, ma iloa ai ni lavea tuga i ona laugutu, isu, auvae, ma luga ae o ona mata. Sa valaau atu se isi tamaitiiti aoga mo se fesoasoani i lana telefoni feaveai. Sa ofo mai e se tina talavou lea sa tutu i ou autafa se fasi ieie, ma na to’o ai e le tamaitiiti aoga lea na muamua taunuu atu ia le laugutu ua tafetotoi o le alii na lavea. Sa ma tutu ma se isi tamaitai, ma faatalitali ma le popole mo le au laveai a le falemai.

Sa pulapula mai mata o le alii na lavea, ma tilotilo mai ma le le mautonu i foliga sa siomia o ia.

“O fea o ou i ai?” na ia fai mai ai. “O le a le mea na tupu?”

Na tali atu le tamaitiiti aoga lea na tuuina le fasi ieie i ona laugutu, “O lea e te i le itu i saute o le lotoa. Sa lavea lau uila.”

Na ōiōi mai le alii. “E tiga,” o lana tala lea. “Fesoasoani mai ia te au.”

Sa fai atu le tamaitiiti aoga o loo agai mai le fesoasoani ma na ia fesili atu po o ai lona igoa.

“O Tavita,” na ia fai mai ai, a o masusu lemu. “O fea o ou i ai?” o lana toe fesili mai lea.

Na oo mai se alii e faamatua tagata sa ofu sona suti—e foliga o se polofesa—ma fesili atu ia Tavita pe manao i se faamanuiaga. Sa lue mai lona ulu ma le agaga faafetai.

Sa tu le polofesa. “Ae e leai sa’u suauu,” o lana tala lea, ma tilotilo solo. Na lulu ulu o i latou na lata ane. Na ōi le taulealea na lavea ma tau genogeno agai i lana taga. Na aapa atu le tamaitiiti aoga lea na i ona autafa i totonu o le taga ma aumai se tautau ki tele o loo pipii ai se fagu laitiiti o le suauu paia.

“E i ai lana suauu!” na fai mai ai le tamaitiiti aoga.

Na to’a le alii na lavea i le taimi lava na tuu atu ai e le polofesa ma tama a’oga o latou lima i luga o lona ulu ma tuu atu ai se faamanuiaga. Sa oo mai foi ia te au se lagona toafilemu ina ua folafola atu e le polofesa i le taulealea o le a toe malosi o ia, maua le filemu, ma latalata atili atu ai i le Faaola e ala i lenei aafiaga.

E lei leva ae oo mai le au laveai a le falemai ma aveese atu le alii na lavea. A o ou savali atu i le vasega, sa ou iloa na te tauaveina le suauu paia ma ia ina ia mafai ona ia faaaogaina le perisitua e faamanuia ai se tasi e manaomia. Peitai, i lenei aso, o ia lava ua faamanuiaina. Sa ou aluese mai ma se lagona loloto o le alofa mo alii faamaoni o e ola saunia ina ia faamanuiaina isi ma mo le Alii, o lē faamanuiaina foi i latou.

Na ōi le taulealea na lavea ma tau genogeno agai i lana taga. Na aapa atu le tamaitiiti aoga lea na i ona autafa i totonu o le taga ma aumai se tautau ki tele o loo pipii ai se fagu laitiiti o le suauu paia.