Faamanuiaga o le Perisitua Aoao e Faalagolago i le Atua
Na faataunuuina faamanuiaga uma—e ui lava matou te le i mauaina mea na sili ona matou mananao i ai.
Ou te le i talosaga atu lava i le Atua mo se mea Na te le i aumaia ia te au i lena lava taimi,” o le tala lea a lo’u toalua o, Tepora. Ou te maofa pea i lenei faamatalaga e ui lava sa ou i ai ma ia i le taimi atoa na faataunuuina ai. Ma e masalo e matuai tete’i ai foi nisi o e na silafia le tauiviga a Tepora ma le ma’i matautia o le pa’u mo le fitu tausaga, o le lua tausaga o tauivi ma le kanesa o le susu, ma iu ai lava ina maliu i le aso 19 o Setema, 1990. Peitai o i latou o e maofa ma tete’i atonu e le malamalama i faamanuiaga faaleperisitua po o ona faataunuuga. Sa ou aoaoina e a’u lava ia ma le faigata, le uiga o le umia o le perisitua ma faaaoga ina ia faamanuia ai isi.
E ui lava sa malolosi uma ou matua i le Ekalesia ma faamaoni i ona aoaoga, ae ou te le manatuaina le avea ai o le perisitua ma se faatosinaga faapitoa faaleagaga i le taimi o lo’u laitiiti. Ou te le manatua se taimi na ou ma’i tigaina ai ma moomia ai se faamanuiaga, ma e ou te le manatua foi se isi tagata o lo’u aiga na tuuina atu i ai se faamanuiaga faaleperisitua.
O lenei manatu le mamafa i faamanuiaga faaleperisitua na faaauau atu i lo’u lava aiga ina ua ou faaipoipo ma fai le ma fanau ma lo’u toalua. Sa ou tuuina atu se faamanuiaga faaleperisitua pe a matuai ma’i tigaina lava se tasi pe faia foi se taotoga. Sa ou faia foi ni nai faamanuiaga mo lo’u toalua mo se fesoasoani i ona lagona, ae na seāseā lava.
O le tuuina atu o se faamanuiaga sa avea lava pea o se aafiaga lelei mo au. Ae ona o lo’u le malamalama ma lo’u le faatuatuaina o au lava ia na faaitiitia ai lo’u faatinoina o lenei galuega faaleperisitua. Sa ou tauivi ina ia ou iloa upu e tautala atu ai, ma le le mautinoa po o upu na oo mai i lo’u mafaufau o le finagalo moni lava lea o le Atua.
Na i ai se tamai suiga o lenei tulaga ina ua iloa e lo’u toalua o loo ia mafatia i le ma’i matautia o le pa’u. O na tausaga o tauiviga ma se faama’i o le matua’i vaivai lava ma ua le toafimalie, sa na o faamanuiaga faaleperisitua i ni nai taimi sa fesoasoani ai. Sa iloa e lo’u toalua le tulaga o lo’u le mautonu e uiga i le tuuina atu o ni faamanuiaga ma na seasea lava ona ia talosagaina se fesoasoani faaopoopo faaleagaga lea atonu sa ia moomoo i ai.
Na suia o maua olaga, ina ua faailoa mai e le fomai, ia Mati 1989, ua maua lo’u toalua i le kanesa. Ona o le tulaga e le masani ai o lona kanesa, na le i iloaina ai e fomai tipitipi mo le lua tausaga. E oo atu i le taimi na iloa ai, ua salalau ma ua matuai faaitiitia lona avanoa e toe malosi mai ai. Ina ua iloa sa matou i ai i se tauiviga e le mafai ona matou taulimaina na o i matou, sa tatala atili o maua olaga mo se fesoasoani faaleagaga. Sa anapogi le matou uarota mo Tepora, ma sa ma talia ma le agaga faafetai le tausiga a le Aualofa. Sa oo ina toatele i latou na tauina lana taua. Sa fautua mai foi se tasi o uo sa onosa’ia lea lava ituaiga o togafitiga o le a oo i ai lou toalua, na ia talosagaina ma mauaina ni faamanuiaga faaleperisitua i taimi na sili ona faigata o togafitiga. Sa ia fautuaina i maua ia faia foi lea lava tulaga—ma saili se fesoasoani faaleagaga ina ia tatalia ai aafiaga o togafitiga.
Sa faigata le togafitiga e faaaoga ai le leisa. Sa oo lou toalua i tulaga uma na mafaufauina. Sa ma’i o ia mo le tele o aso pe a uma se togafitiga. O le tele lava o aso e taoto ai i le moega, ma na avea ma se galuega le ‘ai. Ae i lea taimi i lea taimi sa ma aoaoina ai ni auala e fetaiai ai ma luitau taitasi.
I le aluga o lenei periota faigata, sa valaau mai lo’u toalua mo se faamanuiaga faaleperisitua, e pei ona fautuaina mai e le ma uo. Sa ou tuuina atu ia te ia se faamanuiaga e tuuitiitia ai lona popole lea na ia lagonaina i le vaiaso muamua o lona togafitiga. E ala atu i se faamanuiaga faaleperisitua, o lona fefe lea sa i ai i le taimi o lona taotoga—e ui e le i aluese atoa—a e na faaitiitia. Na le toe faasuati ae na mafai nei ona maua se moe a o ou tuuina atu ou lima i luga o lona ulu ma faamanuia o ia. O nei faamanuiaga na aumaia ai ia i maua ni folafolaga o le fesoasoaniga ma le faamafanafanaga, faatasi ai ma se vaaiga i le lumanai. Sa faatumulia ai i maua i le mafanafana ma le fiafia.
Maimau pe ana mafai ona ou faapea atu na amata ona faafaigofie lou tuuina atu o faamanuiaga i lena taimi, ae e le mafai. Sa ou tuuina atu le faamanuiaga na talosagaina, ae sa faaauau pea ona faafaigata ia te au le faaaogaina o le perisitua. Ou te le i ta’uina lava i lo’u toalua lo’u tulaga le mautonu, ae na mafai ona ia iloa lo’u musua. Peitai, o tofotofoga faigata ia, ma sa ia iloa lelei e tatau ona maua e ia se fesoasoani ma o au le tagata e mafai ona ia maua mai ai. O lea la, a manaomia e ia se fesoasoani, ona fesili mai lea.
A e le i tuuina atu soo se faamanuiaga, sa ou iloa le mea na ou manao e faamanuia ai o ia: sa ou manao ina ia faamanuia o ia ina ia malosi na i lo se isi lava mea. Ma sa manao ai foi o ia. Ae e lei oo mai lava lena faamanuiaga. O mea na oo mai, o faamanuiaga o le mafanafana, ma e lei aveesea ai le faigata ae na faigofie atu ona tatalia.
Sa amata lemu lava ona ou malamalama atili i le auala e galue ai le perisitua ma faamanuiaga o le perisitua. E le o se meafaigaluega le tuuina atu o ni faamanuiaga ina ia maua mai ai le mea o loo ou moomia ae o se auala e maua mai ai se fesoasoani. Na ou aoao e faalagolago i le Alii ma Lona finagalo nai lo le mea na ou manatu e tatau ona fai. Sa ou maua le faamautinoaga o upu ia na oo mai i lou mafaufau o upu moni lava ia na finagalo le Atua ou te tautala ai. Ma e ui lava e le i faigofie ia te au le tuuina atu o ni faamanuiaga, ae na ou aoao ia faalagolago i lagona na ou maua a o tuuina atu ni faamanuiaga.
Ina ua maea togafitiga o Tepora, na amata loa le tulaga faigata o le faatalitali pe na aoga ia vailaau faafomai ia te ia. Sa ma fiafia i le taimi lenei ua leai ai ni toe faatulagaga o vaaiga a le fomai, suesuega, ma togafitiga. Peitai, sa i ai lava le popole i o ma mafaufau atonu na i ai ni siama o le kanesa na sao mai vailaau oona na taumafai e tape le kanesa ma ua toe ola.
Na faamautinoa mai lo ma popolega tele, i lea taimi ma lea taimi, i ni faailoga laiti faaletino: e le i manuia ia togafitiga. Sa foliga fiafia pea fomai, a e na ma iloa ua le o toe umi se taimi.
Sa matua toafilemu lava ia masina mulimuli e ono o le soifuaga o Tepora. Ina ua le manuia se tasi taumafaiga mulimuli, na ma filifili loa e le toe faaauauina ia togafitiga ae ma o i le fale ma faaaoga le taimi o totoe ma te fiafia faatasi ai. Atonu e le talitonu nisi sa avea o se taimi matagofie nei masina, peitai sa avea ma se taimi sili atu o lo’u olaga.
Na fautua mai nisi o uo ma aiga na popole i le taimi lea, e manaomia ona matou talitonu i le Alii i la matou taumafaiga e faasaoina lona ola. Na latou tau mai ia te au sa ia te au le perisitua ma sa tatau ona ou faaaogaina e faamalolo ai o ia. E ui ina sa ou malamalama i o latou lagona, a e le i malamalama nei uo i le mea na tupu. E lei i ai se isi mea na sili atu ona ou manao i ai nai lo le folafola atu o le ola ia Tepora, ae e le i oo mai nei upu ia te au a o ou tuuina atu se faamanuiaga ia te ia. E le i i ai se isi mea na ia moomoo i ai nai lo le mauaina o se faamanuiaga o le soifua maloloina, peitai na te le i lagona e tatau ona ia talosagaina. Na ma talitonu uma lava i vavega ae na ma iloaina le ma vaaiga faatapulaaina i se aafiaga lea e fetaui i se fuafuaga e faavavau.
O le mea na tupu sa avea ma se vavega maoae. E le i folafolaina atu ia te ia le ola, i ona faamanuiaga, ae na tuuina atu se faamautinoaga o le mea na tupu o le finagalo lea o le Atua. E le i folafolaina atu ia te ia se tulaga faigofie ae na tuuina atu se fesoasoani e onosaia ai taimi faigata. E le i faatagaina o ia e nofo ma tausi le ma fanau ae na faamautinoa atu ia te ia ia noataga o le faavavau. Na maliu o ia ma sina tiga itiiti ma sina le lagolelei, faatasi ai ma lona aiga i ona autafa.
Ou te iloa o loo soifua le Atua ma e matua popole lava mo i tatou. Na te tuuina mai ia i tatou le mafanafana ma le fesoasoani pe a tatou manaomia le malosi ma le malamalama. E ui ina faigata le olaga, ae ua folafola mai e le Alii o le a fesoasoani i o tatou tofotofoga, ma o se tasi o auala e oo mai ai le fesoasoani, e ala mai lea i faamanuiaga o le perisitua. I le iloaina o lenei mea, na mafai ai ona faapea mai lo’u toalua, “Ou te le i talosaga atu lava i le Atua mo se mea Na te le i aumaia ia te au i lena lava taimi.”
Ata na tusi e Brian Call