Faateleina o a Tatou Auaunaga Agaalofa e ala i le Mulimuli i le Faaola
Na aoao mai le Faaola, “Aua ai se fia faasaogalemuina lona ola, e maumau ai ia te ia, a o le faamaumau i lona ola ona o au, e faasaoina e ia” (Luka 9:24).
Na saunoa mai Peresitene Thomas S. Monson e uiga i lenei apoapoaiga: “Ou te talitonu ua tau mai e le Faaola ia i tatou, sei vagana ua tatou faamaumau o tatou ola ona o isi, o le a itiiti se faamoemoega o o tatou lava olaga. O i latou o e ola mo na o i latou lava, e iu ina maanuminumi ma, maumau ai lo latou ola, a o i latou o e faaalu o latou lava ola e auauna atu ai i isi, e ola ma lauusiusi—ma faasaoina ai o latou ola.”1
E mafai ona faigata le mauaina o se taimi tatau ma le malosi e fesoasoani ai i o tatou aiga, tuaoi, tagata o le uarota po o le paranesi, nuu, e oo lava i tagata ese. O afea ma e faapefea foi ona tatou fesoasoani atu, aemaise lava pe a le lava o tatou taimi? E faapefea ona tatou auauna atu pe a tapulaa o tatou tulaga ma gafatia?
O lo tatou Faataitaiga Sili, o le Faaola o Iesu Keriso, o le na valaaulia i tatou e mulimuli atu ia te Ia (tagai i le Mataio 4:19). E ui lava tatou te le tauaveina Lona valaauga paia, ae e mafai ona tatou faasoa atu Lana galuega. O le faamatalaina o lena galuega, na faapea mai ai le Aposetolo o Peteru e uiga ia Iesu “sa femaliuai ma agalelei” (Galuega 10:38).
Sa faamalolo e Iesu tagata mamai ma auauna atu i e na mafatia (tagai i le Mataio 9:20–22; Mareko 8:22–25). Atonu o le a tatou le faia ia vavega maoae lea na Ia faia, ae e mafai ona tatou faamafanafana i e ua mafatia, mamai, pe faavauvau.
Na fafagaina faavavega e le Faaola i latou na leai ni meaai (tagai i le Mataio 14:15–21). E mafai ona tatou foai atu se taulaga anapogi limafoai, auauna atu i galuega faatino e gaosi ai taumafa o le uelefea a le Ekalesia, ma fai ni o tatou sao i taumafaiga faalelotoifale e fafaga i e le tagolima.
Na silafia e Iesu tagata taitoatasi ma auauna atu i ai (tagai i le Luka 8:45–48). A o tatou saili e mulimuli i Ana faataitaiga, o le a tatala e le Agaga o tatou mata ia tatou iloa ai tagata o puapuagatia, tuua toatasi, ma tuulafoaia. Ma e mafai ona taialaina i tatou e fesoasoani i le taulimaina o o latou manaoga.
Sa faaaluina e Iesu le taimi e faatasi ai ma isi, e tusa lava pe Na te lei fuafuaina (tagai i le Luka 24:29) ma e ui ina sa feagai foi o Ia ma Ona lava lava atugaluga (tagai i le Mataio 14). Ua fautuaina i tatou e tuuina atu auaunaga i le poto ma le auauai lelei, aua e le tatau ona “momoe vave le tagata ia silia le malosi [ua ia te ia]” (Mosaea 4:27). Ae o nisi taimi o o tatou avanoa sili e auauna atu ai ma faamanuiaina ai e oo mai ae ua le talafeauga [ma o tatou tulaga]. I le faataoto a le Faaola, na faasalaveia e le Samaria agalelei lana malaga, i lena lava taimi iina, ina ia auauna atu i manaoga o se tagata manua (tagai i le Luka 10:30–37).
E lei i ai lava se tasi e lei silafia e le Faaola pe faatauvaa foi mo Lona aapa atu i ai (tagai i le Mataio 9:9–13). E pei ona faia e le Faaola, e mafai foi ona tatou alolofa atu ma siitia isi, aoao i latou i se auala e lelei atu ma valaaulia i latou ia tatou i ai faatasi i le olaga faamanuiaina ua ofoina mai e le Faaola.
E silafia e le Tama Faalelagi o tatou tomai uiga ese, tulaga, ma manaoga, ma e Na te silafia le auala tatou te faaaogaina ai nei mea e faamanuia ai isi. A o tatou latalata atili atu ia te Ia, ma saili mo Lana taitaiga, o le Ia fesoasoani ia i tatou ia iloa po o ai, po o fea, ma po o le a foi le auala tatou te auauna atu ai.
Agavale i le pito: O Uso Chiroque, o le peresitene o Alii Talavou i Chulucanas, Peru, o loo galulue ma Aleki, o se tasi o le korama a aoao, i le faia o ni tootoo mo se alii o la latou paranesi na lavea.
Luga agavale: ata na pueina e Howard Collett; luga taumatau: ata na tusia e Jerry Garns