Fitusefulu Lima Tausaga o le Ola Fuafua Lelei mo le Lumanai

E ui e lei aloaia lelei le fuafuaga o le uelefea a le Ekalesia, ae na iloa e le Au Paia anamua le taua o le ola i se olaga o le faalagolago o le tagata ia te ia lava, tausia e matitiva ma e le tagolima, ma auauna atu i isi. Na faailoa mai e le Perofeta o Iosefa Samita, “O se tagata e faatumulia i le alofa o le Atua, e le faamalieina i le faamanuiaina na o lona lava aiga, a e ia faasalalau atu i le lalolagi atoa, e naunautai e faamanuia tagata uma lava.”¹

E lei leva ona faatulaga le Ekalesia, ae faatu loa tamai faleteuoloa a epikopo ma ofisa o le sefuluai e fesoasoani ai i e le tagolima. Na faavaeina e Iosefa Samita le aoina o le taulaga anapogi i Katelani, Ohaio, i le vaitau o le 1830² Na faalauiloa ai foi ma le mataupu faavae o le sefuluai i lena lava vaitau (tagai i le MFF 119). Na totogiina le sefuluai ma taulaga anapogi i le tulaga o galuega, fua o faatoaga, ma isi oloa. Na vaai e epikopo ma peresitene o paranesi le tufatufaina o nei punaoa i auala e talitutusa ma le taimi nei.³

Na tauivi le tele o tagata o le Au Paia anamua e lagolagoina i latou lava. Ina ia foia le paie, sa tuufaatasi ai taitai o le Ekalesia ma le au paia e saili ni auala e fatufatu ai ni galuega e tausi ai i latou. Na maua e nisi ni galuega o le fausiaina o fale a le Ekalesia ma faamaea ni galuega faatino lautele. O nisi na galulue i faatoaga ma faatau atu ni oloa e tausi ai i latou lava ma o latou lava aiga. A o latou galulue faatasi, na faamanuiaina le Au Paia i le lava o mea na latou manaomia.

E ui e eseese luitau o o tatou taimi, ae o loo faaauau pea ona tausia e le Au Paia o Aso e Gata Ai i latou lava, faapea ma e matitiva ma lē tagolima e ala i le mulimuli i aoaoga a le Faaola ma le faataitaiga na faataatitia e augatupulaga anamua.

O faamatalaga i lea augavaitau e sau mai punaoa nei, sei vagana ua faamatalaina: Susan Clayton Rather, Supporting the Rescue of All That Is Finest (2005); Glen L. Rudd, Key Moments in Church Welfare Services (2008); Glen L. Rudd, Important Events for Historical Church Welfare (1999); Glen L. Rudd, A Brief History of the Church Employment Program (1998); Glen L. Rudd, Pure Religion (1995).

Faamatalaga

1. Aoaoga a Peresitene o le Ekalesia: Iosefa Samita (2007), 353.

2. Tagai i le Howard W. Hunter, “Aso Anapogi,” Liahona, Ian. 1986, 57.

3. Tagai i le Glen L. Rudd, Pure Religion (1995), 2, 4.

1936

• 6 Aperila: Fofoga mai e Peresitene Heber J. Grant ma ona fesoasoani i le konafesi aoao le fuafuaga o le saogalemu a le Ekalesia.

• Oketopa: Faatulaga e le Ekalesia le Komiti Aoao o le Uelefea.

1937

• Faavaeina e le Ekalesia le uluai Fale Teuoloa Tutotonu o Epikopo, i le Aai o Sate Leki.

1938

• Faatauina le fanua o le Lotoa o le Uelefea i le Aai i Sate Leki, ma amata ai ona fausiaina.

• Aperila: Toe faaigoa le fuafuaga o le saogalemu a le Ekalesia i le fuafuaga o le uelefea a le Ekalesia.

• 12 Aokuso: Tatala le uluai faleoloa o le Falegaosi Oloa a le Tesareta mo oloa taugofie i le Aai o Sate Leki.

1939

• Amata le uluai fale teuoloa ma le gaosiga o meaai tuuapa i le Lotoa o le Uelefea.

1940

• 27 Aokuso: Faapaiaina e Peresitene Tavita O. MaKei le lifi e faaaoga mo le sana ma le saito a le Lotoa o le Uelefea. Na ofoina atu e tagata o le Ekalesia le silia ma le 70,000 itula faigaluega e fausia ai.

1941

• 20 Aperila: Amata ona faaaoga le fale tele gaosi susu a le Lotoa Autu o le Uelefea.

1948

• 1 Mati: Faavaeina se ofisa faarisone o le Ekalesia mo galuega i le Aai o Sate Leki.

1960

• Mati: Maea le fale tele gaosi susu i le Lotoa Fou o le Uelefea.

1963

• Amata ona faaaoga le fale tele mo le faiga o pasta ma tuuapa ai meaai i le Lotoa fou o le Uelefea.

1973

• Fatuina e le Ekalesia le Tautua Lautele a le AAG e fesoasoani i aiga.

1976

• Ua faateleina fale o le uelefea i le Iunaite Setete ma Kanata.

• 29 Mati: Maea le fale teuoloa o epikopo i le Lotoa fou o le Uelefea.

1978

• Faatulaga e le Ekalesia le Komiti e Tali Atu i Faalavelave Faafuasei e fesoasoani ai i le faitau miliona o tagata i le salafa o le lalolagi e aafia i mala.

vaitau o le 1980

• Faavae uluai nofoaga autu mo galuega i fafo atu o le Iunaite Setete, i Atenitina, Chile, Parakuei, ma Iurukuei.

1981

• Fausia e le Ekalesia se faleoloa taugofie o le Deseret Industries i le Lotoa o le Uelefea.

1982

• 10 Setema: Asiasi atu le peresitene o le I.S. o Ronald Reagan i nofoaga o le uelefea i Ogden, Iuta.

1983

• Ua tofia le Au Epikopo Pulefaamalumalu e faatonutonuina le polokalama o le uelefea.

1985

• Amatalia le polokalama o le Tautua o Galuega Agaalofa a le Ekalesia.

vaitau o le 1990

• Faaaoga e le Ekalesia lona Nofoaga Autu o Auaunaga o Galuega Alofa e faavasega ai lavalava ma isi aitema e totoe mo le auina atu i le lalolagi atoa e tali atu ai i le mativa ma mala.

1996

• Faavae e le Ekalesia ia Auaunaga Lima Foai a le Au Paia o Aso e Gata Ai o se faalapotopotoga e le lavea i le malo e faatautaia gaoioiga agaalofa i atunuu e filifilia.¹

• Fausia e le Tautua o le Uelefea lana uluai fale teuoloa o epikopo ma nofoaga autu e teu ai meaai i fafo atu o le Iunaite Setete, i Mekisiko.

• Amata galuega o le toefaafouga o le Lotoa o le Uelefea.

1997

• Ausia e le Tautua Lautele a le AAG se matatia o le fuainumera o le aofaiga o tamaiti na vaetamaina i le tausaga e tasi, e 629—o se numera aupito i maualuga na ausia e le matagaluega i le seneturi lona 20.²

1999

• Mati: Ua amata e le Tautua o le Uelefea se taumafaiga tele mo galuega ina ia faavaeina e oo atu i le 50 nofoaga autu fou mo galuega i le lalolagi atoa.

• Toe faaigoaina le Tautua Lautele a le AAG o le Tautua a le AAG mo Aiga, ma ua faalauaiteleina ana polokalama.

2001

• Faalauiloa mai e le tautua o punaoa mo galuega se fale mo le aoaoina o matata fou. Na faalauiloa i le tausaga na sosoo ai ni mea e faaaoga i le fale mo galuega a le tagata lava ia.

• 5 Setema: Sa faia se sauniga e toe faapaia ai le Lotoa o le Uelefea, ina ua maea le toefaafouga.

2003

• 25 Ianuari: Na faalauiloa ai le uepisaite o le Ola Fuafua Lelei, providentliving.org.

• Faamaonia se fautuaga tele ina ia faateleina le aofai o faleteuoloa o epikopo i le lalolagi atoa.

• Amataina e le Ekalesia ni taumafaiga tetele se fa o auaunaga alofa: o aoaoga faamasani mo le faamanavaina o pepe fou, vai inu mama, tufatufaina o nofoa faataavalevale, ma le togafitiga o mata.

2009

• Iuni: Na faalauiloa ai se uepisaite fou mo vaetamaga, ItsAboutLove.org.³

2010

• Aperila: Na faalauiloa ai se uepisaite fou mo galuega, LDSjobs.org, o loo maua nei i le ganana Peretania, Sipaniolo, ma le Potukale.

• Ua faaopoopo le gaosiga o taumafa i taumafaiga agaalofa.

Faamatalaga

1. Tagai “Humanitarian Activities Worldwide,” providentliving.org/content/display/0,11666,4600-1-2323-1,00.html.

2. Tagai i le C. Ross Clement, “LDS Family Services” (o talafaasolopito e le’i lolomiina na saunia e le Tautua a le AAG mo Aiga, 10 Me, 2000).

3. Tagai i le Kimberly Bowen, “LDS Family Services Launches New Web Site,” Ensign, Sete. 2009, 78.

Na galulue le Au Paia i Central Valley Kalefonia i le togavine a le Ekalesia i Madera, Kalefonia, ISA. Na maua mai i le togavine le faitau selau o tone o vine mamago mo le faaaogaina e tagata matitiva i le lalolagi atoa.

Agavale, luga: Na fafai ma uta e le Au Paia i Tenimaka ni pateta mo le Au Paia i Siamani i le 1947. Luga: O aoaoga i le gaosiga o meaai i Ekuatoa na fesoasoani lea i tagata o le ekalesia ina ia maua atili ni togalaau e fua tele mai.

Luga, mai le agavale: ata na pueina e Cornelius Zappey, faaaloaloga a le Church History Archives; Howard Collett; ma Peter Evans