O Le Malosi o le Toatele
O Le Tulafono o le Anapogi
Na faavaeina e le Alii le tulafono o le anapogi e faamanuia ai Lona nuu ma saunia ai se auala e tausi ai i latou e le tagolima. Na Ia poloaiina le Au Paia “ina ia tuuina atu ni au mea i e matitiva, … ma o le a tuuina atu i luma o le epikopo … e fesoasoani i e matitiva ma e le tagolima” (MFF 42:31, 34). O taulaga anapogi o se punaoa autu lea mo le fale teuoloa a le Alii. Ua uunaia tagata o le Ekalesia e tuuina atu se taulaga ia tutusa ma le tau o aiga e lua e le’i taumafaina a o anapogi. Na talosagaina e Peresitene Spencer W. Kimball (1895–1985) tagata o le ekalesia ina ia foai atu “ia sili atu—ia silia ma le faasefulu pe afai tatou te i ai i se tulaga e mafai ai.”1
Pe a tatou malamalama ma ola i le tulafono o le anapogi, o le a faateleina lo tatou alolofa ma agalelei atu i e e le o maua lea manuia. O le anapogi, faatasi ai ma le tatalo, o se ituaiga o le tapuai moni. Pe a tatou usitaia le tulafono o le anapogi, o le a tatou maua le malosi faaleagaga, faamanuiaga faaletino, ma se naunautaiga sili atu e auauna atu i isi.
Na aoao mai Peresitene Thomas S. Monson: “O le mataupu o taulaga anapogi na i ai e amata mai i aso anamua i ona po o Isaia, ina ua tautala o ia e uiga i le anapogi moni, sa ia uunaia tagata e anapogi ma “ia tofitofi au mea e ‘ai i le ua fia ‘ai, ia … aumai i lou fale e ua matitiva ma faasauaina’ [Isaia 58:7]. Sa faavaeina e le Perofeta o Iosefa Samita le faiga o le aoina o le taulaga anapogi mo e matitiva i Katelani i Ohaio; ma mulimuli ane i Navu i Ilinoi, sa auina atu e le Korama a Aposetolo e Toasefululua se tusi faalauaitele i le Ekalesia e famalamalama ai ‘mataupu faavae o le anapogi,’ e faapea: “Ia avea lenei mea ma se faataitaiga i le au paia uma, ma o le a le i ai lava se le lava o ni mea e ‘ai: A fia aai e matitiva, ia tuu atu i e o i ai taumafa, e anapopogi i se aso e tasi ae foai atu taumafa na semanu latou te taumafaina, i epikopo e foai atu mo e matitiva, ma o le a ola tagata uma mo se taimi umi. … Pau lava le mea ia ola le au paia i lenei mataupu faavae faatasi ma le loto fiafia ma le mata fiafia o le a tele pea mea latou te maua.”’”2
Gaosiga o Taumafa
O le gaosiga ma le faagasologa o taumafa e fafaga ai e fiaaai ua leva ona avea o se maatulimanu o le fuafuaga o le uelefea talu ona faatoa folasia mai. O se mea na amata o ni togalaau tutusolo ma galuega faatino na faatulaga i Iuta, sa avea ma se upega fesootai tele e silia ma le 1,000 o faatoaga ma galuega faatino e gaosi ai taumafa o loo faafoeina e siteki ma uarota o le Ekalesia. O loo faagaoioia faatoaga o le uelefea i Amerika Matu, Europa, Ausetalia, ma le Atu Polenisia. E oo atu i le vaitau o le 1980 ua tuufaatasia, faalauteleina, ma faaleleia atili nei faatoaga ma fale gaosimea. Na faatau ese atu nisi o galuega faatino laiti.
E pei o le vaitaimi ua te’a, na lagolagoina nei faatoaga ma fale e tagata o le Ekalesia o e na latou faia le tele o galuega—e fai fua uma lava. Na tuuina atu e tagata o le ekalesia le fia selau afe o aso i tausaga taitasi e selesele ai, gaosi, ma tufatufa atu taumafa o le a faaaogaina e tausi ai e le tagolima. E silia ma le 100 miliona pauna (45 miliona kk) o sana, pi, aano o manu fasi, fualaau aina, fualaau faisua, ma isi oloa na gaosia i tausaga taitasi, ina ia mautinoa e i ai i epikopo ia taumafa e tausia ai i latou e le tagolima. I eria o le Ekalesia e le o i ai pe faigata ona oo atu i fale teuoloa, e faaaoga e epikopo ma peresitene o paranesi ia taulaga anapogi e tuuina atu ai mea e manaomia ma auaunaga.
O Le Faleteuoloa a le Alii
Talu mai le faalauiloaga o le polokalama o le uelefea i le 1936, ua galulue faatasi ai tagata o le Ekalesia ina ia faaitiitia tulaga mafatia o i latou o e le tagolima. O le pau o le tamaoaiga, mala faalenatura, leai o ni galuega, ma’i ma le le atoatoa o le malosi, po o maliu e manaomia uma ai le galulue faatasi o le Au Paia i lalo o le taitaiga a le perisitua ina ia mautinoa e taulimaina manaoga ma faamanuiaina tagata taitoatasi ma aiga. I le aluga o tausaga, ua faitau miliona tagata o le ekalesia na tuuina atu ma le loto malie o latou taimi ma taleni ina ia faamanuiaina isi ma suitalaga, e pei ona saunoa Peresitene Monson, “i le tulaga vaivai o se tagata se toatasi o loo tu toatasi [i le] malosi o le toatele e auauna atu faatasi.”3
Ina ua saunoa mai Peresitene Heber J. Grant e uiga i le polokalama o le uelefea i le 1936, sa ia muai silafia “e leai se masini fou a le Ekalesia” o le a manaomia ae “[o le a] tuuina atu e faalapotopotoga a le siteki ma uarota, korama a le perisitua, le Aualofa, ma isi ausilali ni auaunaga sili e mafai ona [latou] tuuina atu mo le faamanuiaina o le tulaga aoao o le uelefea a le Ekalesia.”4 Ina ua uma ona faatulagaina e le Alii le faalapotopotoga e manaomia ia manuia ai e matitiva ma e le tagolima—na faatulaga ia korama a le perisitua, na faatulagaina Aualofa, ma na i ai le perisitua a le Atua i luga o le lalolagi.
Sa avea tagata o le Ekalesia, faatasi ai ma a latou galuega faapaiaina, o latou taleni ma tomai, o se vaega taua o le fale teuoloa a le Alii. E faaopoopo atu i taulaga anapogi lea e totogiina atu i tupe o le taulaga anapogi a le Ekalesia, ua mafai e taitai perisitua ona utuvai mai i taimi, taleni, tomai, ma malosi o tagata uma o le ekalesia ina ia faamanuia ai e le tagolima.
Tatou te faaalia lo tatou alolofa mo le Atua ma Ana fanau, i le taliaina o le avanoa e fesoasoani atu ai i isi i taimi o lo latou le tagolima. O le uelefea lenei i lona malamalama sili ona mama, ma o lona faatinoina faamaoni o le a faaeaina uma ai le tagata na te foaiina atu ma le tagata foi na te taliaina, e pei ona muai oo i ai le silasila a perofeta i o tatou aso.
E faatusa i le malosi faaopoopo lea e oo mai pe a tatou aufaatasi e auauna atu i isi, ua fesoasoani ai le usoga a le perisitua i Louisiana, ISA, e aveese se laau na pau ina ua uma le Afa o Katarina i le 2005.
O galuega faatino e pei o le gaosiga o taumafa mai le fualaau aina o le peach ua maua ai ni taumafa tatau e tausia ma faafiafiaina ai olaga o i latou na semanu e pagatia i le fiaaai.
O taulaga anapogi, e pei ona aoina e nei tiakono, e taua mo le fesoasoani atu i e le tagolima.
O se vaega o le taumafaiga faifai pea ina ia taulimaina mea masani e tele ina manaomia e tagata, ua tuufaatasia ai e tamaitai talavou i Hong Kong ni fasimoli ma isi mea e manaomia mo le tumama mo tagata na aafia i faalavelave.
O galuega faatino e auauna atu ai i isi e faamalosia ai o tatou sootaga ma isi ma fesoasoani tatou te atiina ae ai uiga faaKeriso. O i, o loo aafia ai le autalavou a le Au Paia o Aso e Gata Ai i Mekisiko, i le faamamaina o le alalafaga, i le fufuluina o se fale.
Mai le agavale: ata na pueina e Jed Clark, Howard Collett, Norman Burningham, ma Craig Dimond