Tala Faamamai o le Talalelei
O Le Manatu Faavae o le Au Paia o Aso e Gata Ai i le Faaipoipoga
Na soifua mai Hugh B. Brown i le aso 24 o Oketopa, 1883, i Granger, Iuta. Sa faauuina e avea o se Aposetolo i le 1958. Sa avea o ia o se fesoasoani ia Peresitene Tavita O. MaKei mo le valu tausaga. O le tusiga o i lalo na sii mai i lana tusi o le You and Your Marriage.
O le faaipoipoga o se, ma e tatau ona avea ma se faamanatuga. O le upu faamanatuga e eseese ona faauigaga, ae i tagata Kerisiano e faailoa ai se faatinoga po o se sauniga faalelotu, e faapaiaina e se ua i ai le pule tatau. O se folafolaga, po o se feagaiga paia, o se faailoga faaleagaga po o se noataga i le va o ni vaega lava ia ma lo latou va ma le Atua. O lena faaipoipoga na faavaeina ma faapaiaina e le Alii Lava Ia ma o loo faaalia i upusii nei:
“Ua fetalai mai foi Ieova le Atua, E le lelei ina toatasi o le tagata; ou te faia sona fesoasoani e tatau ma ia. …
“O le mea lea e tuua ai e le tane lona tama ma lona tina, a e faatasi ma lana ava: ona avea ai lea o i laua ma tino e tasi” (Kenese 2: 18, 24).
Ina ua afio ese Iesu mai Kalilaia ma oo mai i le talafatai o Iutaia i talaatu o Ioritana, na mulimuli mai ia te Ia le motu o tagata, ma sa fesiligia o Ia e le Au Faresaio e faatatau i le teteaga.
“Ona tali atu ai lea o ia, ua faapea atu ia te i latou. Tou te lei faitaulia ea, o le na faia tagata i le amataga, na ia faia i laua o le tane ma le fafine,
“Na ia fetalai ane foi, O le mea lea e tuua ai e le tane o lona tama ma lona tina, a e faatasi ma lana ava: ona avea lea o i laua o le tino e tasi?
“O lea e le toe toalua ai, a o le tino e tasi i laua. O lenei, o e ua faatasia e le Atua, aua nei faateaeseina e se tagata” (Mataio 19:4–6).
O Le Faaipoipoga e faataunuuina ai Faamoemoega o le Atua
E manino lava na fuafuaina e le Atua ia tasi le alii ma le tamaitai. Na Ia faapaiaina le faavaeina o le faaipoipoga, e ala i le pulefaamalumalu ai i le uluai faaipoipoga. O se tulaga masani, maloloina, ma e manaomia ma na faavaeina ina ia faataunuu ai le faamoemoega o le Atua i le lalolagi.
O se elemene tutotonu i le faavaega o se aiga. E sili atu nai lo le faalapotopotoga faaletagata ina ia ogatasi lava ma tulafono faaleaganuu ma le lautele. E sili atu nai lo se maliliega i lalo o se faatagaga o le tulafono tatau. E tatau ma o se faamanatuga faalelotu lea e faia e alii ma tamaitai ina ia galulue faatasi ai ma le Atua i Lona faamoemoega ua faailoa mai ina ia avanoa ai le olaga faaletino ma le oti i Ana fanau agaga ma faataunuu ai le faaofuina o le tagata i le tino ola pea ma le ola e faavavau.
E i ai nisi ua fai mai e mafai ona ausia le tulaga aupito maualuga, tuuto, ma sili atu ona manaomia o le olaga i fafo atu o feagaiga o le faaipoipoga. I se isi faaupuga, latou te faasāina nisi o e saili le mamalu aupito maualuga ina ia “faaleagaina e ala i fegalegaleaiga faaletino ma pei ni manu.” E leai se faatagaga i tusitusiga paia mo lea ituaiga aoaoga faavae. I le tusi o Faataoto tatou te faitauina ai faapea, “O le ua maua le ava, ua maua e ia le mea lelei, ua maua foi e ia le alofa mai ia Ieova” (Faataoto 18:22). …
Tatou te faitauina i le Mataupu Faavae ma Feagaiga, “O lenei foi e moni ou te fai atu ia te outou, o se faasa i le faaipoipoina e lei faauuina lea e le Atua, aua o le faaipoipoga e faapaiaina lea e le Atua i tagata” (MFF 49:15).
O Le Faaipoipoga i le Malumalu e Aumai ai le Fiafia Moni
E talitonu le Au Paia o Aso e Gata Ai e tatau i alii ma tamaitai ona faaipoipo i le malumalu mo le olaga nei ma le faavavau ina ia maua ai le tulaga sili o le olaga ma le fiafiaga sili i lenei lalolagi ma le isi olaga. A aunoa ma sauniga o le faamauga o le faaipoipoga i le malumalu, e le mafai e le tagata ona ausia se tulaga faaleatua pe mauaina le atoatoaga o le fiafia. …
E na o le tasi lava le ituaiga faaipoipoga e talia atoatoa e se tagata o le Au Paia o Aso e Gata Ai: faaipoipoga i le malumalu po o le selesitila, lea na o malumalu lava o le Ekalesia e faataunuu ai. Ua fausia ma faapaiaina ia malumalu ina ia paia i le Alii ma avea o se nofoaga e faataunuu ai sauniga ma faapaiaga faaleagaga ma le faavavau. E ui tatou te taliaina faaipoipoga faalemalo o loo faataunuuina e faifeau a isi ekalesia ma alii faitulafono po o se tasi ua agavaa faaletulafono e faataunuuina, ae tatou te talitonu ua na o le malumalu o le Atua e mafai ai ona faataunuu se faaipoipoga mo le olaga nei ma le faavavau, e se tasi ua i ai le pule lea na tuuina atu e Keriso ia Peteru ina ua Ia fetalai atu, “O se mea foi e te fusifusia i le lalolagi, e fusifusia foi lea i le lagi” (Mataio 16:19).
O lenei pule ua faasino i ai i tusitusiga paia o “ki o le malo o le lagi” (Mataio 16:19), ma i le faaipoipoga faaselesitila e tatalaina e na ki le faitotoa i le malo lena.
E Faataunuuina Atoatoa Tulaga Manaomia
E i ai i le tagata manaoga patino autu—onomea, faaleagafesootai, faalenatura, ma le faaleagaga—ma e na o le faaipoipoga e faavavau ua faauuina e le Atua e mafai ai ona faataunuuina ma le atoatoa.
Ina ia ola ai i se olaga faamanuiaina iinei ma le olaga faavavau pe a mavae lenei olaga, e tatau i le tagata ona alofa atu ma ia alofaina mai, auauna atu ma ositaulaga, ia i ai se tiutetauave ma faatino le mana foafoa ua tuuina mai e lona Atua. “Ua ou sau ina ia latou maua le ola, ia maua atili ai lava” (Ioane 10:10).
Peitai atonu o le tulaga taua silisili o le faaipoipoga e le o le faamanuiaga lea e maua e le alii ma le tamaitai. O le faamoemoega o le la mafutaga na faailoa mai lava i le amataga i le poloaiga a le Alii: “Ia fanafanau, ma ia uluola, ma ia tumu ai le lalolagi, ia faatoilalo i ai” (Kenese 1:28). I faaipoipoga e tatau ai, e i ai le avanoa e faataunuu ai e le tagata sona manaoga faalenatura ina ia foafoaina ma fua mai. E na o le mafutaga faalefaaipoipoga lava e mafai ona faataunuuina ai ma le atoatoa ma le fiafia lenei tulaga, o le fanau mai ma le tausia o se fanau. E tatau ona manatua e matua o fanau o loo latou fananauina—o a latou fanau—o fanau foi ia a le Atua. O Ia o le Tama o o latou tino agaga, ma i le taimi o le muai olaga na Ia faia ai ma le poto se tuutuuga mo le elemene faavavau ma le agaga faavavau ina ia tuufaatasia ma mauaina le atoatoaga o le fiafia. O lea la e talitonu tagata o le Au Paia o Aso e Gata Ai o le Atua o le paaga lona tolu moni lea i lenei sootaga ma o le aumaia o fanau i le lalolagi i totonu o se mafutaga o le faaipoipoga ua faatagaina faalelagi o se vaega lena o Lana fuafuaga ina ia faataunuu ai le faaofuina o le tagata i le tino ola pea ma le ola faavavau.
O Le Natura e Faavavau o le Faaipoipoga
Ina ua filifilia e le Alii o Iesu le alofa atu i le Atua ma le alofa atu i tagata o ni poloaiga sili e lua, na Ia faamamaluina le alofa. E moni, ua ta’u mai ia i tatou o le Atua o le alofa lava ia. O le mea lea, e pei ona faavavau le Atua, e tatau foi ona faavavau le alofa, ma ua fuafuaina foi ina ia faaauau pea i le faavavau o le a oo mai ia fua ma faamanuiaga. Peitai ina ia fiafia ai i avanoa ma faamanuiaga o le alofa faavavau e pei ona faatatau lea i tane ma ava, matua ma fanau, o le sauniga lea e faatagaina ma faapaiaina ai lenei sootaga sili ona matagofie e le taliaina pe afai e i ai le tapulaa “o le oti lua te mavae ai.” Ina ia faavavau ia sootaga faaleaiga ma mafutaga o faaipoipoga, e tatau ona ta’u mai ma lemalosi i totonu o le feagaiga o le faaipoipoga, “mo le olaga nei ma le faavavau atoa.”
E tatau i tagata uma ona iloa o latou tiutetauave i a latou fanau ma i feagaiga latou te osia e faatatau i ai. Ina ua fetalai mai le Alii, “E le mafai ona faaatoatoaina i tatou e aunoa ma i latou” (MFF 128:18), na faatatau o Ia i se filifili lea e o’o atu ona sooga i le lumanai faapea foi ma mea ua tuanai. E moni, atonu e sili atu le tuusao mai o o tatou tiutetauave mo i latou ua tuuina mai ia i tatou i lenei olaga nai i o tatou augatama. E le mafai ona tatou tali atu mo agasala, pe o agasala o le faia po o le le faia, a o tatou augatama, ae na Ia lapatai mai nei te’i ua le faia le vaega a a tatou fanau, afai e mafai ona faasino lo tatou toilalo i o tatou tiute ia i latou, ona pau lea o agasala i o tatou ulu.
O le faatoateleina e faavavau, o le faamanuiaga lea e faaopoopo atu i faamanuiaga o i latou o e mauaina le tikeri maualuga i le malo selesitila, lea, a faaopoopo atu i isi mea, o lona uiga e tusa lava pe a mavae le oti e mafai ona faaauau pea ona ‘au’au faatasi ma le Atua i le faataunuuina o le faaofuina o le tagata i le tino ola pea ma le ola faavavau.
Alualu i Luma o ni Soa e Faavavau
O le manatu faavae o le Au Paia o Aso e Gata Ai e uiga i le alualu i luma e faavavau e aofia ai le atiina ae faavavau, faateleina o le malamalama e faavavau, mana, poto, iloa, ma uiga ma mana uma e avea ai ma se atua. Ae i le fuafuaga a le Atua, e le mafai e le tagata ona maua lenei tulaga o le faaatoatoaina faifai pea i lona tulaga e lē mae’a po o le lē faaipoipo. E tatau ona i ai le tuputupu ae ma le faateleina o le tagata atoa —i se isi faaupuga, o se tagata ua maua ma ua tuufaatasia i le isi ona afa.
O lenei manatu faavae o le faaipoipoga, faatasi ai ma se vaaiga faalelagi, e aumai ai se uiga fou ma faaopoopo atu ai le taua, faaaloalogia, ma le mamalu i le manatu o le faaipoipoga. Faatasi ai ma lenei manatu faavae, o le a matua faaeteete ma mataalia ai le tagata mafaufau e uiga i le filifilia o lana soa e faavavau. O le mea moni lava a o le i ulu atu se alii ma se tamaitai i sea ituaiga feagaiga faavavau, e tatau ona la lotomaualalo ma mafaufau loloto ma saili ma le agaga tatalo se taitaiga faalelagi.
O le tulaga paia faalelotu ma le mana e noatia ai sootaga faalefaaipoipoga [ua] matua faateleina ma talisapaia lea e tatau ai i le ulugalii, ao lei faaipoipo—ma e tatau lava, aua e taua, ona tutusa o la faatuatuaga—ona amata ma le sini e tasi i o la’ua mafaufau. E tatau ona la saunia ma agavaa e maua ia sauniga paia i maota e na o i latou e agavaa e mafai ona ulufale i ai. O iina la te maua ai aoaoga, osia ni feagaiga, ma tootutuli ai i le fata faitaulaga ma folafola atu le alofa faavavau ma le faamaoni, o le tasi i le isi, i luma o le Atua ma agelu. E moni o lea ituaiga talitonuga ma faatinoga, faatasi ai ma ona tiutetauve ua tuuina atu faatasi, e avea ma tulaga mausali o le aiga, o le faamamaluina o le faavae o le faaipoipoga, ma le faaolataga o agaga o tagata.
O Se Galuega o le Faatuatua
O sea faaipoipoga o se faatinoga o le faatuatua, ma ua faapaiaina i luma o se paaga faalelagi. E tatau ona i ai le faatuatua ma le lototoa ina ia faataunuuina ai, ma tumau pea e oo i le iuga, e ui i faigata, tofotofoga, lagona le lelei, ma nai maliu e ono fetaiai.
Pe a taliaina e se tasi ia tulaga ma matafaioi o lenei faigapaaga e faavavau, e tatau ona ia iloaina o le toilalo i i e toetoe lava o le toilalo popo lea. Po o a lava ona faamanuiaga i nisi tulaga o gaoioiga, a e afai e toilalo se tagata i le faatinoina o ana matafaioi ua tuuina atu i feagaiga e faavavau, o le faasalaga matautia o le lē maua lea o le malo selesitila, e o faatasi ai ma le tiutetauave ona o tulaga ua oo i ai i latou o e na faia le feagaiga lea e nafa ma ia.
“O le faaipoipoga e faapaiaina lea e le Atua i tagata.
“O lea, e tusa ai ma le tulafono e tatau ia te ia se ava e toatasi, ma ia avea ai i laua ma tino e tasi, ia faataunuuina ai e le lalolagi i nei mea uma le iuga o lona foafoaga;
“Ina ia faatumuina ai foi le lalolagi i le fuataga atoatoa o le tagata, e tusa ma lona foafoaga a o le i faia le lalolagi” (MFF 49:15–17).
Ata na tusia e Jerry Garns
Luga: ata na tusia e Jerry Garns; lalo: ata na tusia e April Newman