ʻOku Mau Lea ʻia Kalaisi
Ofo ʻi he ʻOfa ʻOku Fai ʻe Sīsū Maʻakú
ʻOku nofo ʻa e tokotaha naʻá ne faʻú ʻi Mekisikou Siti, Mekisikou.
ʻI he Sāpate ʻe taha, ne fakafeʻiloaki mai e pīsopé kimuʻa he houalotu sākalamēnití, pea fehuʻi mai, “Te ke lava ʻo tokoni mai ke tāpuakiʻi e sākalamēnití?” Naʻá ku talaange ʻio te u lava fai ia.
Naʻá ku ʻalu ʻo ʻomai ʻeku tohi himí pea fanofano kimuʻa peá u nofo ʻi he tēpile sākalamēnití. Ne u fakaava hake ʻa e tohi himí, pea ko e fuofua himi naʻá ku fakatokangaʻí ko e “ʻOku Fakaofo” (Ngaahi Himí, fika 102). Ne teʻeki kamata ʻa e fakatahá, ne u kamata lau leva e ʻuluaki lainé: “ʻOku fakaofo ʻa e ʻofa ʻa Sīsū.” Fakafokifā kuo fakafonu hoku lotó ʻaki ha ʻofa lahi.
Ne u lau ʻi he pō kimuʻá he Tohi Tapú kau ki he fakaʻosinga e moʻui ʻa Sīsū Kalaisí—e ngaahi konga ʻoku kau ai ʻa e ʻOhomohe Fakaʻosí, Ngoue ko Ketisemaní, mo ʻEne pekiá mo e Toetuʻú. Naʻá ku fakakaukau ki hono fakamamahiʻi, haha mo manukia ʻo Sīsū ʻe he kau fai tauteá. Ne u sioloto atu foki ki hono fakahoko ʻe Sīsū ʻEne feilaulau fakaleleí ʻi he Ngoue Ketisemaní lolotonga ia ʻoku mohe ʻEne kau ākongá.
Naʻá ku fakatokangaʻi ne u ʻamanaki ke tāpuakiʻi ʻa e maá mo e vaí ʻokú ne fakafofongaʻi ʻa Hono sinó mo e taʻataʻá. ʻOku fakaʻatā ʻe he sākalamēnití kitautolu ke fakafoʻou e fuakava ne tau fai ʻi heʻetau papitaisó, ke manatu maʻu ai pē kiate Ia, ke tauhi ʻEne ngaahi fekaú, pea ke toʻo kiate kitautolu Hono huafá.
ʻI he kamata ʻa e houalotu sākalamēnití, ne ʻi hoku ʻatamaí e ngaahi fakakaukau kotoa ko ʻení. Ne u ongoʻi ʻaupito ne faingataʻaʻia ʻa Sīsū ʻi ha founga fakamamahi mo fakaofo ʻa ia ʻoku ʻikai mahino kiate kitautolu. Ne u fakakaukau leva, naʻá Ne kātakiʻi e mamahí koeʻuhí ko ʻEne ʻofa kiate kitautolú—kiate au.
Ne u ongoʻi ʻoku ʻofeina au ʻe he ʻEikí pea ʻikai lava ʻo mapukepuke hoku loʻimatá. Ne u ongoʻi ʻoku ʻikai ke u taau mo e meʻa ne fai maʻaku ʻe he Fakamoʻuí. Ka naʻá ku ongoʻi foki ʻoku haohaoa ʻEne ʻofa kiate aú. ʻE foaki ʻe ha kaungāmeʻa ʻene moʻuí maʻa hono kaungāmeʻá (vakai, Sione 15:13). ʻI he kamata e himi sākalamēnití, ne u tuʻu hake mo ha tangata ʻe taha ke kamata e ouaú.
Ne ma toʻo mai e ʻufiʻufi hinehina fakaʻofoʻofa naʻá ne ʻufiʻufi e maá. ʻI heʻeku toʻo hake e maá, ne u ʻilo ko hoku fatongiá ke paki iá ko ha konga ʻo e ouaú, ka naʻá ku momou ke fai ia. ʻOku fakafofongaʻi ʻe he maá ʻa e sino ʻo Kalaisí. Ne u fakakaukau ki he kau sōtiá ne nau fakamamahiʻi e ʻEikí, pea ʻikai ke u fie paki e maá. ʻI heʻeku pakiʻi e konga ʻuluakí, ne u fakakaukau ki he founga fakamamahi mo fakamā ne nau fai kia Sīsū kimuʻa Heʻene pekiá—ʻa e kalauni talatalá, ko hono hahá, mo faingataʻaʻiá. Ne mokulukulu hoku loʻi matá ʻi heʻeku teuteu ʻa e maá.
Ne u fakakaukau naʻe fie maʻu ke hoko e ngaahi meʻa fakamamahi mo fakamā ko ʻení. Ko e konga kinautolu ʻo e feilaulau fakalelei ʻa Sīsū Kalaisí, pea naʻá Ne fai e feilaulaú koeʻuhí ko ʻEne ʻofa kiate au mo kitautolu takitaha.
Naʻe kamata leva ke u ongoʻi ha nonga mo ha fiefia lahi. Ne u pakipaki tokanga mo māmālie e konga mā kotoa pē, ʻi hono ʻilo ʻoku ʻamanaki ke tāpuakiʻi mo fakatapui ʻa e meʻa ʻi hoku nimá ki ha taumuʻa makehe pea ʻokú ne fakafofongaʻi ha meʻa maʻongoʻonga ʻaupito, fakaʻofoʻofa mo fakaofo. Ne u ongoʻi ʻa e fatongia maʻongoʻonga ʻo hono fai ʻo e ouau ko ʻení koeʻuhí ke lava ʻe kinautolu ʻi he fakatahá ʻo fakafoʻou ha fuakava mo e ʻEikí pea maʻu ʻa e ngaahi tāpuaki ʻo e Fakaleleí.
ʻI heʻene ʻosí, ne u vakai ki he fonu ʻa e ngaahi laulaú ʻi he mā kuo pakí. Naʻe fakaofo mo fakaʻeiʻeiki e vakai ki aí. Ne fai ʻe hoku hoá e lotú. Ne teʻeki mahino lelei kiate au kimuʻa e kupuʻi lea “ke nau ʻilo ʻi he fakamanatu ki he sino ʻo ho ʻAló” (T&F 20:77).
ʻI heʻeku maʻu ʻa e maá, ne u toe ongoʻi ʻa e ʻofa ʻa hoku Fakamoʻuí. Ne u ongoʻi malu, loto fakatōkilalo, pea vēveke ke fai ʻa e meʻa totonú. Ne u fie maʻu ke vakavakaiʻi ʻeku moʻuí pea fakatomala mei heʻeku faihala kotoa pē.
ʻOku ou fakamālō kia Sīsū Kalaisi ʻi Heʻene ʻofa kiate aú. ʻOku ou fakamālō ko ʻetau lava ke maʻu ʻa e ngaahi tāpuaki ʻo ʻEne Fakaleleí: ke fakamolemoleʻi mei heʻetau ngaahi angahalá pea maʻu ʻa e faingamālie ke foki ki heʻetau Tamai Hēvaní.
Manukia ʻo Kalaisi ʻe ha Sōtia, tā ʻe Carl Heinrich Bloch © Hope Gallery