Ko ha Tāpuaki maʻa Mamá
ʻOku nofo ʻa e tokotaha naʻá ne faʻú ʻi ʻIutā, USA.
“Mafai kuo toe ʻomí, Moʻoni ʻilo ʻe he tangatá, Folofola ʻa e ʻOtuá ki māmani Hono mafaí kuo toe ʻomí” (Tohi Hiva ʻa e Fānaú, 60).
Naʻe tuku ʻa e Palaimelí, ʻoku faksio holo ʻe Lūpeni ʻoku taʻu 10 ʻa e ongo faifekaú. Naʻe ʻai ke na lue ki ʻapi mo ia. Naʻe akoʻi ʻe ʻEletā Sanisesi mo ʻEletā Losa ʻa Lūpeni mo hono taʻokete ko Tiekó e ngaahi lēsoni ʻa e kau faifekaú pea papitaiso mo hilifakinima kinaua. ʻOku fakakaukau ʻeni ʻa Lūpeni ko hono kaungāmeʻa mamae kinaua.
Naʻe vakai atu ʻa Lūpeni ʻi ha matapā sioʻata ʻo ha lokiako ne mapuni. Ko naua ē! Ka ko e hā ʻena meʻa ʻoku faí? Naʻe hili hona nima ʻi ha ʻulu ʻo ha tangata ʻi he uōtí, pea hangē ʻokú na lotu ʻo hangē ko ʻena fai kia Lūpeni ʻi hono hilifakinimá.
ʻI heʻena hū mai mei he lokí, naʻá ne fehuʻi ki he ongo faifekaú, “Ko e hā e meʻa naʻá mo faí?”
Naʻe pehē mai ʻa ʻEletā Sanisesi “Naʻá ma foaki kia Misa Menitosa ha tāpuaki ʻo e lakanga fakataulaʻeiki.” “ʻOku hangē ia ko ha lotu makehe, pea te ne lava ʻo ʻomi ha fiemālie, tokoni ke ʻilo ʻe ha taha e founga ke fakaleleiʻi ha palopalema pe fakamoʻui ha tokotaha ʻoku puke.”
ʻI he Sāpate hono hokó ne toe kumi ʻe Lūpeni ʻa e ongo faifekaú. “Te ke lava ʻo haʻu ki ʻapi ke foaki ha tāpuaki ki heʻeku faʻeé?” ko ʻene kolé ange ia. “ʻOku langa lahi hono tuʻá.”
Naʻa nau fakavavevave atu ki he fale ʻo Lūpení. Naʻe talanoa ʻa ʻEletā Sanisesi mo ʻEletā Losa ki he faʻē ʻa Lūpení. Ko ha mēmipa ia ʻo e Siasí, ka naʻe fuoloa ʻene taʻe haʻu ki he lotú.
Naʻe pehē ʻa ʻEletā Losa, “ʻOkú ma ʻilo ʻoku ʻikai te ke ongoʻi fiemālie.”
Naʻá ne talaange kiate kinaua, “Kuo felangaaki lahi hoku tuʻá ʻi ha ngaahi uike lahi. “Kuó u feʻiloaki mo ha kau toketā tokolahi ka ʻoku teʻeki pē ke nau lava ʻo tokoni mai.”
Naʻe pehē ʻa ʻEletā Sanisesi, “Ne kole mai ʻa Lūpeni ke ma haʻu ʻo foaki atu ha tāpuaki ʻo e lakanga fakataulaʻeikí. “Te ke loto nai ke ma fai ia?”
Ne talaange ʻe Mama, “ʻIo, kātaki.”
ʻI hono hili he ongo faifekaú hona nimá ki hono ʻulú pea foaki kiate ia ha tāpuakí, ne mokulukulu e loʻimata ʻo Mamá. ʻI heʻene ʻosí, ne fāʻofua ʻa Lūpeni kiate ia. Naʻá ne talaange, “ʻoku ou ʻilo ʻe tokoni atu e tāpuakí.”
Hili ha ʻaho ʻe tolu ne foki atu e ongo faifekaú ke vakaiʻi e tuʻunga ʻoku ʻi ai e mamá ʻa Lūpení. Naʻá ne talaange, “ʻOku ou fuʻu fiefia ke sio kiate kimoua.” “Naʻe mōlia atu e langa hoku tuʻá hili hoʻomo foaki mai e tāpuakí, pea ʻoku mole ʻaupito he taimí ni!”
Naʻe pehē ʻe ʻEletā Sanisesi “Sisitā Kāsia, kuo fakamoʻui koe ʻe he Tamai Hēvaní.” “Pea kuó Ne fakaʻatā kimaua ke tokoni kiate Ia ʻaki hono fakaʻaongaʻi homa lakanga fakataulaʻeikí ke tāpuakiʻi koe.”
ʻI he Sāpate hokó—mo e Sāpate kotoa pē mei ai—naʻe ʻalu ʻa Mamá ki he lotú mo Lūpeni mo Tieko. Naʻá ne ʻiloʻi naʻe moʻoni ʻa e mālohi ʻo e lakanga fakataulaʻeikí, pea pehē foki kia Lūpeni.
Tā fakatātā ʻa Simini Blocker