Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo e ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. ʻOku ʻoatu heni ha fakakaukau ʻe ua.

“Mālohi ʻo e Lakanga Fakataulaʻeikí—ʻAtā ki he Tokotaha Kotoa,” peesi 18: Kimuʻa pea fai e efiafi fakafāmilí, lau e fehuʻi ʻe fā ne fai ʻe Sisitā Peatoni ʻi he fakamatala ko ʻení. ʻOmai ha kiʻi maama ki he efiafi fakafāmili ʻi ʻapí (fakapapauʻi ʻoku ʻikai palaki). ʻAi ha kau mēmipa kehekehe ʻo e fāmilí ke nau ʻahiʻahi fakamoʻui. Fakatatau ʻa e mālohi ʻoku fie maʻu ke moʻui e māmá ki he mālohi ʻo e lakanga fakataulaʻeikí. Palaki pea fakamoʻui e māmá pea aleaʻi e founga ʻe tokoni mai ai e māmá kiate kitautolu kotoa, pe ko e mālohi ʻo e lakanga fakataulaʻeikí. ʻAi ke fakakaukau e kau mēmipa ʻo e fāmilí ki he ngaahi founga kuo tāpuekina ai kinautolu ʻe he lakanga fakataulaʻeikí. Te ke lava ʻo kamata hono ako maʻuloto e folofola ʻi he Tokāteline mo e Ngaahi Fuakava 84 ne kole mai ʻe Sisitā Peatoni ke tau ako maʻulotó.

“Ko e Fakakaukau Lelei ʻa Uilí,” peesi 78: Te ke lava ʻo kamata ʻaki hono hivaʻi e “ʻOku Ou Fie Sio he Temipalé” (Tohi Hiva ʻa e Fānaú, 99) pe hiva ʻe taha kau ki he temipalé. Lau fakafāmili e fakamatala ko ʻení pea aleaʻi e ʻuhinga ʻoku mahuʻinga ai e temipalé. ʻAi ke tā ʻe he mēmipa takitaha ʻo e fāmilí ha fakatātā ʻo e temipalé, mahalo pē ko ia ʻoku ofi taha ki he feituʻu ʻokú ke nofo aí. Fakakaukau ke tautau e ngaahi tā fakatātā mo e fakatātā ʻi he peesi 79 ʻi homou ʻapí he feituʻu te nau mamata ki ai he meimei ʻaho kotoa. Talanoa fekauʻaki mo e founga ʻe lava ke fakamanatu mai ʻe he vakai ki ha fakatātā ʻo e temipalé ke tau fai e ngaahi fili te tau kei taau ai ke hū ʻi he temipalé.

ʻI Hoʻo Lea Fakafonuá

ʻOku maʻu ʻa e Liahoná mo e ngaahi nāunau kehe ʻa e Siasí ʻi ha ngaahi lea fakafonua lahi ʻi he languages.lds.org.