Ki Hono Fakamālohia ʻo e Toʻu Tupú
ʻOku ʻOmi ʻe he Vahehongofulú ʻa e Mālohi ʻo e Lotó
Fili he taimí ni ke totongi vahehongofulu kakato. ʻOku tokoni atu ʻa hoʻo fai iá ke ʻilo ʻoku tauhi ʻe he ʻEikí ʻEne ngaahi talaʻofá.
Tā fakatātā ʻa Jim Madsen
Naʻe akoʻi ʻe Palesiteni Tōmasi S. Monisoni ʻoku hanga “ʻe hono totongi kakato ʻo e vahehongofulú ʻo ʻoange ki ha tokotaha ha mālohi ʻi loto mo e tukupā ke tauhi e ngaahi fekau kehé.”1 Naʻá ku monūʻia ke maʻu ha fakamoʻoni ki he tefitoʻi moʻoni ko ʻení ʻi heʻeku kei talavoú.
ʻI heʻeku kei taʻu 14, ne maʻu ai ʻeku fuofua ngāué, vahe paʻanga ʻe 2 ʻAmelika ʻi he houa ko ha tangata leipa ngāue langa. Naʻe paʻanga ʻe 80 ʻeku vahe he ʻuluaki uiké. Ne u fie maʻu ke fakatau ha tepi (eight track), ʻa ia ko e tekinoloasia foʻou taha ia he taimi ko iá. Naʻe paʻanga ʻe 320 e kalasi naʻá ku fie maʻú. Ne u vahevahe fiefia mo e Fineʻeikí mo e Tangataʻeikí ʻeku fakakaukau ke fakatau e tepí hili haʻaku ngāue ʻi ha uike ʻe fā.
Ne laka hake ʻi he Uike ʻe Faá
Naʻe akonaki fakapotopoto e ongomātuʻá, “ʻE laka hake he uike ʻe fá e ngāue ke maʻu ha paʻanga feʻunga ke fakatau e tepí. ʻOku totonu ke ke fakahaaʻi e houngaʻia ki he ʻOtuá ʻi he ʻene ngaahi tāpuaki lahí ʻaki hano totongi e peseti ʻe 10 ʻo hoʻo paʻanga hū maí ko e vahehongofulú. ʻE fie maʻu ke ke totongi ki he puleʻangá ha tukuhau peseti ʻe 10 nai. Pea ʻoku totonu ke ke ako ʻi hoʻo kei talavoú ke talangofua ki he faleʻi e kau palōfitá ke teuteu fakapaʻanga ki he kahaʻú, kau ai ho ngāue fakafaifekaú; ʻoku mau fokotuʻu ke tuku mavahe ʻo fakahū ha pesiti ʻe 30 ʻo hoʻo paʻanga hū maí.”
Ne u fikaʻi vave leva ʻi hoku ʻatamai kei taʻu hongofulu tupú kapau te u fai ʻa ia kuo akoʻi ʻe heʻeku mātuʻá, ko e paʻanga pē ʻe 40 he uike ʻe toe ki ha fakamolé, ʻa ia kuo pau ke u ngāue ʻi ha māhina ʻe ua pe lahi ange ke fakatau e tepi ne u fie maʻú. Ne u ʻi ha taimi ke fai ha fili mahuʻinga—ʻe hoko nai ʻa hono maʻu ʻo e koloa fakamāmani ko e meʻa mahuʻinga tahá, pe ko ʻeku feilaulau ke totongi vahehongofulu pea fakahū ha paʻangá?
Tomuʻa Totongi e Vahehongofulú
ʻOku faleʻi mai e Ki hono Fakamālohia ʻo e toʻu Tupú ʻo pehē: “ʻUluaki totongi [e vahehongofulú], neongo kapau ʻokú ke pehē he ʻikai feʻunga hoʻo paʻangá ke feau hoʻo ngaahi fie maʻu kehé. ʻE tokoni atu ʻi hoʻo fai iá ke fakatupulaki ha tui ʻoku lahi angé, ikunaʻi e siokitá pea ongongofua ange ki he Laumālié.”2
Ne u fili ʻi heʻeku taʻu 14 ke totongi vahehongofulu kakato ʻi he toenga ʻo ʻeku moʻuí. Ne u fakapapau ke muimui ʻi he palōfitá ʻi hono fakahū ha paʻanga ki heʻeku ngūae fakafaifekaú mo e ako ʻi he kahaʻú. ʻOku akoʻi mai foki ʻe he aʻusia ko ʻení ke faikehekeheʻi e holí mei he fie maʻú. Ne u holi ke maʻu e tekinolosia fakamuimui tahá, ka naʻe ʻikai ke u fuʻu fie maʻu ia. Ko ia ne u fakakaukau ke fakatau mai ha kalasi ʻoku kiʻi maʻamaʻa ange ʻa ia ʻoku siʻisiʻi pe ngaahi ngāue ʻokú ne faí, pea naʻe kei ngāue lelei pē ʻo aʻu ki heʻeku ʻalu ʻo ngāue fakafaifekaú.
Tauhi ʻa e Ngaahi Talaʻofá
ʻI heʻeku ako ʻi he totongi vahehongofulú ʻoku tauhi ʻe he ʻEikí ʻEne ngaahi talaʻofá, ne mālohi ange ʻeku tuí mo ʻeku holi ke tauhi ʻEne ngaahi fekau kehé. Ne u ʻilo kapau te u foaki loto fiemālie ha foaki ʻaukai, te Ne tali ʻeku ngaahi lotú pea hokohoko atu hono tataki aú (vakai, ʻĪsaia 58:6–11). Ne ʻilo kapau te u lau e Tohi ʻa Molomoná, te Ne fakahā ʻa e moʻoní kiate au ʻi he mālohi ʻo e Laumālie Māʻoniʻoní (vakai, Molonai 10: 4–5). Ne u ʻilo kapau naʻá ku talangofua ki he Lea ʻo e Potó, te Ne foaki mai e moʻui lelei, poto, ʻilo pea lava ke u “lele kae ʻikai helaʻia” (vakai, T&F 89: 18–21). Pea naʻá ku ʻilo kapau te u tauhi ʻa e fono ʻo e angamaʻá, ʻe hoko ʻa e Laumālie Māʻoniʻoní ko hoku takaua maʻu pē pea ʻe falala mai ʻa e Fakamoʻuí ke u tuʻu taʻe mā ʻi ha ʻaho ʻi Hono ʻaó (vakai, T&F 121: 45–46).
Ko e founga ʻe taha ʻoku fakatupulaki ai ʻe he totongi vahehongofulú mo e ngaahi foakí ʻo fakamālohia e mālohi ʻo e lotó ʻoku fakafou ia ʻi he ngaahi fuakava ʻo e temipalé. ʻOku akoʻi ʻi he Ki Hono Fakamālohia ʻo e Toʻu Tupú, “Kuo pau ke ke hoko ko ha tokotaha totongi vahehongofulu kakato kae toki lava ke ke hū he temipalé.”3 ʻI heʻeku hū ki he temipale māʻoniʻoní, ʻoku ou ongoʻi e ʻi ai ʻa e ʻOtuá mo ʻEne ʻofá. ʻOku ou fakamoʻoni, ʻi he ngaahi ouau ʻo e temipalé, ʻoku tau maʻu e “mālohi mei ʻolunga” (T&F 95:8) ke fua ʻaki mo ikunaʻi fiefia e ngaahi faingataʻa ʻo e matelié.
Ko ha Tāpuaki kuo Teuteu
Kuo fakatupulaki ʻe he totongi vahehongofulú mo e ngaahi foakí ʻeku tui ʻoku fakahoko ʻe he ʻEikí ʻEne ngaahi talaʻofá. Naʻe fakafou mai ʻEne folofola ʻi he palōfita ko Malakaí ʻo pehē, “Mou ʻomi ʻa e ngaahi vahehongofulu ʻo e meʻá … pea mou ʻahiʻahiʻi ai au, … pe te u fakaava ʻa e ngaahi matapā ʻo e langí pe ʻikai, peá u lilingi hifo kiate kimoutolu ha tāpuaki, ʻe ʻikai ha potu ʻe faʻa hao ia ki ai” (Malakai 3:10).
ʻI heʻeku moʻuí, ʻo aʻu ki he ngaahi faingataʻa fakapaʻanga ʻi he kamata ʻeku nofomalí, ʻoku fakaava maʻu pē ʻe he ʻOtuá e ngaahi matapā ʻo e langí ke maʻu ʻe hoku fāmilí e ngaahi fie maʻu fakatuʻasino ʻo e moʻuí. ʻOku ou fakamoʻoni tuʻunga ʻi he talangofua ki he fono ʻo e vahehongofulú, ʻe tupulaki hoʻo tuí ki ha maʻuʻanga tokoni lelei ʻo e mālohi ʻi hoʻo moʻuí.
ʻOku ou fakaafeʻi e toʻu tupu takitaha—mo e mēmipa kotoa—ke fakafanongo kia Sīsū Kalaisi mo ʻEne kau palōfitá ʻaki hono totongi kakato e vahehongofulú mo e ngaahi foakí ʻi hoʻo moʻuí. ʻOku ou palōmesi ʻe fakamālohia koe ʻe he ʻEikí mo fakamonūʻiaʻi koe ʻi hono ikunaʻi hoʻo ngaahi holi kau ki Heʻene ngaahi taumuʻa māʻoniʻoní.