Ko ha Tāpuaki Maʻa Hoku Tokouá

Fai ʻe Jesse Jones

ʻOku nofo ʻa e tokotaha naʻá ne faʻú ʻi Siuāuā ʻi Mekisikou.

Tā fakatātā ʻa David Habben

Ne u ako fekauʻaki mo e mālohi mo e ngaahi tāpuaki ʻo e lakanga fakataulaʻeikí ʻi ha taimi faingataʻa. ʻI he ngaahi taʻu siʻi kuo hilí, ʻi he kei taʻu 14 hoku tokouá, ne hoko ha fakatuʻutāmaki ʻi heʻene paikí ʻo motu hono vaʻé. Naʻe tā mai ʻeku tamaí ʻo talamai ʻoku nau ʻave ia ki falemahaki. Ne u ilifia ʻi heʻeku fakavave ki he falemahakí. ʻI heʻeku aʻu atú ne u fakatokangaʻi ha taha ʻeku ngaahi faʻētangatá. Naʻá ne fakamatala ki he lahi ʻo e fakatuʻutāmakí.

Ne u manavahē ki he meʻa te u mamata ki aí, ne u fakaava e matapaá ʻo hū atu ki he loki ne ʻi ai hoku tokouá. Ne u manga atu, mo kuikui pea fakafokifā ʻeku ongoʻi nongá. Hangē ko e ʻikai ke toe ngalo e ongoʻi ilifia ne u maʻú, he ʻikai ke ngalo e ongoʻi nonga mo e fiemālie ne u maʻú. Ne u fakatokangaʻi e ongó—ʻoku mei he Laumālié.

Ne u fanongo leva ʻoku lea ʻeku tamaí. Naʻá ne foaki mo ʻeku faʻētangatá ha tāpuaki ʻo e lakanga fakataulaʻeikí ki hoku tokouá. Naʻá ne tāpuakiʻi hono foha ʻi he loto fakatōkilalo ʻi he huafa ʻo Sīsū Kalaisí ke ne SAI PĒ, ke fakamoʻui pea toe ngāue lelei hono vaʻé.

Hili e faingāué, ne fakalongolongo e tokotaha kotoa. Naʻá ku ʻiloʻi he momeniti ko iá ʻoku fie maʻu ke u moʻui taau ke maʻu ʻa e Lakanga Taulaʻeiki Faka-Melekisētekí pea lava ʻo fai ha tāpuaki ki heʻeku fānau he kahaʻú.

ʻI heʻemau fakataha ʻi tuʻa he loki hoku tokouá, naʻe kamata talanoa ʻeku ongo mātuʻá ki he meʻa ʻoku totonu ke na faí. Naʻá na aleaʻi pe te nau mavahe mei Mekisikou ke ʻave ia ki ha toketā ʻi he ʻIunaiteti Siteití pe ko hono fai pē e tafá ʻi heni. Tatau ai pē pe ko e hā ʻena fili naʻá na ongoʻi ʻoku lelei ki hoku tokouá, ne u ʻilo kuó ne ʻosi maʻu e tokanga lelei taha te ne lava ke maʻú. Kuó ne maʻu ha tāpuaki mei ha ongo tangata ʻokú na maʻu e lakanga fakataulaʻeikí, ko ia, tatau ai pē pe ko e hā e fili ʻeku mātuʻá, ʻe sai pē hoku tokouá.

Naʻá na fakakaukau ke nofo pē ʻi Mekisikou ke fai ai e tafá. Naʻe fakahū ʻe he kau toketaá ha ukamea mo e foʻi sikalu ʻe 10 ki he vaʻe hoku tokouá. Naʻe sai lelei, pea hili ha ngaahi māhina ne kau ki ha timi ʻakapulu. Ne fakahoko e tāpuakí ʻo hangē ko ia ne lea ʻaki ʻe heʻeku tamaí.

ʻOku ou ʻilo ko e lakanga fakataulaʻeikí ko e mālohi mo e mafai ʻo e ʻOtuá ʻoku foaki ki he tangatá. Ko e meʻaʻofa maʻongoʻonga ia kuó Ne foaki maʻatautolu.

“ʻI he taimi ʻoku tau maʻu ai ʻa e lakanga fakataulaʻeikí, ʻoku tau maʻu ai ʻa e mafai ke ngāue ʻi he huafa ʻo e ʻOtuá mo taki ʻi he ngaahi founga ʻo e moʻoni mo e anga-fakamoʻomoʻoní. Ko e mafai ko ʻení ko ha maʻuʻanga tokoni mahuʻinga ʻo e angatonú mo e ueʻi fakalaumālie ki he lelei ʻa e fānau ʻo e ʻOtuá ʻi he māmaní pea ʻe aʻu ia ki he tafaʻaki ʻe taha ʻo e veilí.”

ʻEletā L. Tom Perry ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e Ngaahi Tokāteline mo e Ngaahi Tefitoʻi Moʻoni ʻoku Maʻu ʻi he Ngaahi Tefito ʻo e Tuí,” Liahona, Nōvema 2013, 47.

Ngaahi Lēsoni ʻo e Sāpaté

Ko e Tefito ‘o e Māhina ní: Ko e Lakanga Fakataulaʻeikí mo e Ngaahi Kī ‘o e Lakanga Fakataulaʻeikí