Ko e Lami Loto ʻApasiá
“ʻOku ou tuku ʻa e melinó kiate kimoutolu, ko ʻeku melinó ʻoku ou foaki kiate kimoutolú” (Sione 14:27).
ʻI heʻeku kei taʻu fitú nai, ne fie maʻu ʻe heʻeku palesiteni Palaimelí ke tokoniʻi e fānaú ke loto ʻapasia ange ʻi heʻemau Palaimelí. Naʻá ne faʻu ha papa fanongonongo hangē ha lamí. Ko e taimi kotoa pē ʻoku loto ʻapasia ha kiʻi tamasiʻi, naʻá ne fakapipiki ha kiʻi sitika ʻo ha lami hoko ki he hono hingoá. Naʻá ku fie maʻu moʻoni ha taha ʻo e ngaahi sitika lami ko iá. Ko ia ne u tangutu fakalongolongo mo kūnima ai ha ʻaho ʻe taha ʻi he Palaimelí, pea sio fakamamaʻu ki he palesiteni ʻo e Palaimelí ke ne ʻilo ʻoku ou loto-ʻapasia. Naʻe tangutu ha tamasiʻi lōloa ʻi muʻa ʻiate au, peá u ʻunuakiʻi leva e seá ke ne lava ʻo sio mai.
ʻI heʻeku tangutu loto ʻapasiá kuo kamata tā leʻo siʻi ʻe he tā pianó ha hiva Palaimeli fakaʻofoʻofa. ʻI heʻeku fakafanongó, ne u maʻu ha loto nonga, pea kamata ke u tangi. Naʻe ʻikai ke u ʻilo ko e hā naʻá ku fuʻu ongoʻi fiefia mo nonga ai ʻi hoku lotó.
ʻI he ʻosi ʻa e Palaimelí ne u talaange ki heʻeku faʻeé e meʻa ne u ongoʻí, pea naʻá ne talamai ko e Laumālié ia. Naʻá ku ʻilo ʻi he ʻaho ko iá, pe ʻoku ongo fēfē ʻa e Laumālié. Ko e taimi kotoa pē ʻoku fie maʻu ke u fai ha ngaahi fili mahuʻinga mo e fakahinohino mei he Laumālié, ʻoku ou manatuʻi e nonga ne u maʻu he ʻaho ko iá, peá u ʻilo e founga ʻo e folofola mai ʻa e Laumālié.
Tā fakatātā ʻa Brad Teare