Fakahoko e Hivá ʻi ʻIukanitaá
Tā e hivá ʻi muʻa he tokotaha kotoa? ʻE lava ʻe Siaosi ʻo fai ia.
ʻOku ʻikai tokolahi ha fānau ʻoku ʻi ai honau uiuiʻi faka-Siasi kimuʻa pea ʻosi mei he Palaimelí. Ka naʻe kei taʻu 5 ʻa Siaosi N. mei ʻIukanitaá ʻi hono ui ia ko e fai hiva ʻi hono koló.
Ko e fai hivá ko ha tokotaha ʻoku tuʻu ʻi muʻa he tokotaha kotoa lolotonga e houalotu sākalamēnití ke tā e hivá. Ko ha fatongia mahuʻinga ia!
Naʻe pehē ʻe Siaosi, “Ne u faʻa manavasiʻi ʻi heʻeku kei siʻí.” Ka neongo iá, naʻá ne fai maʻu pē hono lelei tahá. Naʻe fakalakalaka he uike kotoa. ʻIkai fuoloa kuó ne tā loto falala e hivá.
ʻOku fiefia ʻa Siaosi ke ngāueʻi hono uiuiʻí. Naʻá ne pehē, “ʻOku ou fiefia.” “ʻOku ou ongoʻi ʻoku hangē ʻoku ʻi he lokí ʻa e Laumālié.”
ʻOku hoko e hivá ko ha konga lahi ʻo e moʻui ʻa Siaosí. ʻOku poto foki he tā pianó mo e kītaá. Ko e moʻoni, ʻoku tokoni ʻa e haʻu ʻa Siaosi mei ha fāmili hivá. ʻOku nau saiʻia kotoa he hiva fakatahá—ʻa Siaosi, ʻene mātuʻá, tuofāfine ʻe toko onó, mo hono tokoua ʻe toko tahá. Mei he lahi tahá ki he siʻisiʻi tahá, ko honau hingoá ko Lōsila, Meliame, Nenisī, ʻEsilī, Siaosi, Seini, ʻOnita mo Kitione. Ko e foʻi hiva ʻoku nau saiʻia taha ai ke hivaʻi he fāmilí ko e “Lotu ʻa ha Kiʻi Tamasiʻi” (Tohi Hiva ʻa e Fānaú, 6).
ʻOku taʻu 12 ʻeni ʻa Siaosi, pea ʻoku femoʻuekina lolotonga e konga ʻo e houalotu sākalamēnití ʻi heʻene tokoni ki hono tufa e sākalamēnití. ʻOku tokoni ʻa hono kiʻi tokoua taʻu 5 ko Kitioné, ki hono tā ʻo e hivá he taimi ʻe niʻihi. Naʻe akoʻi ʻe Siaosi ʻa Kitione ki hono founga fakahokó.
ʻOku fakatou malimali fiefia e ongo tautehiná ʻi hono tā e hivá. ʻOkú na ʻiloʻi ʻokú na tokoni ke ʻomi e Laumālié ki he fakatahá.
Maʻu e ngaahi taá ʻi he angalelei ʻa Karl mo Robin Beckle; tā fakatātaʻi ʻe Phyllis Luch mo Bradley Clark