Kae ʻOua Ke Tau Toe Feʻiloaki
Ko e Mālohi ʻo e Taimi ke Fakahoko Aí
ʻOku nofo ʻa e tokotaha naʻá ne faʻú ʻi Pilītisi Kolomupia, Kānata.
Naʻá ma ʻiloʻi ke sio ki he toʻukupu ʻo e ʻEikí ʻi heʻemau moʻuí, he ʻoku ʻikai makatuʻunga ʻEne takiekiná ʻi he kapau ka ko e taimí.
Ne fakatuʻupakē e puke hoku husepānití. Naʻá ne kosi e musié he pongipongi ʻe taha pea fakafokifā ʻene puke lahí. ʻI he ʻaho hokó naʻe tokoniʻi ia ʻe ha mīsini ke kei moʻui. ʻI heʻema hiki mei he loki fakatuʻutāmakí ki he loki tafá, naʻe pehē ʻe ha taha ʻo e kau toketaá ʻo pehē kapau te nau toe lava ke fakamoʻui ia.
Koeʻuhí he naʻe hāhāmolofia ʻa hono puké, pea ʻoku siʻisiʻi hono faingamālie ke moʻuí. Naʻá ku ʻohovale he fuʻu liliu lahi ko ʻeni ne hokó. Naʻá ne ongoʻi kuo siva e ʻamanakí.
Meʻamālié, naʻe lavaʻi ʻe Piea hono fuofua tafá pea ʻave ki he loki fakatuʻutāmakí (ICU). Ko ha fononga lōloa ʻe fakahokó, ka naʻe ʻalu pē taimí mo ʻene fakalakalaka angé. Naʻe lea mai ha taha ʻo ha kau neesi tokolahi ʻi he pongipongi hili e fuofua tafá. Naʻá ne talanoa ki he taimi ʻe aʻu ai ʻa Piea ki he sitepu hoko ʻo e faitoʻó. Naʻá ku kiʻi tuʻu ʻi he ongo mālohi ʻa e foʻi lea ko iá. Naʻe ʻi ai ha ʻamanaki lelei lahi ange he taimí ʻi he kapaú—ʻokú ne fakahaaʻi mai e loto falala, mo e ʻamanaki. Naʻá ku fakamālō ange ʻi he lea ʻokú ne fakaʻaongaʻí, peá ne malimali he ʻokú ne ʻiloʻi.
Naʻe fai ha ngaahi fai ngāue lahi ʻo e lakanga fakataulaʻeikí kia Piea, ʻa ia naʻá ne ʻomai ʻa e fakalotolahi moʻoni. Naʻá ma ʻiloʻi ke sio ki he toʻukupu ʻo e ʻEikí ʻi heʻemau moʻuí, he ʻoku ʻikai makatuʻunga ʻEne takiekiná ʻi he kapau ka ko e taimí. Ko e taimi kotoa pē ʻoku ʻi ha tuʻunga pelepelengesi ai e moʻui ʻa Pieá, ʻoku ou fakamanatu kiate ia e ngaahi tāpuakí pea ʻoku fie maʻu ke ma fakahaaʻi ʻema tui ki he ʻEikí. Ko ha fononga toputapu ʻeni, pea ko ha meʻaʻofa ʻa e ʻaho takitaha.
Ko e ʻamanaki leleí ʻoku ʻomai ʻe he taimí ʻokú ne fakafiemālieʻi kimauá. Neongo iá, ʻi he ʻaho hono 18 ʻo e fonongá ni, ne fehalaaki lahi e ngaahi meʻá. Lolotonga e tafa hono fitú, ne fakapapauʻi ʻe he kau toketaá ʻoku fuʻu mafola lahi ʻa e mahakí. Naʻe fakahaaʻi mai ʻe he timi fakafaitoʻó ʻenau loto mamahi, ʻi heʻenau talamai he ʻikai kei moʻui ʻa Piea ʻo fakalaka he pō ko iá.
Naʻe lava ke u fakataha mo hoku hoa taʻengatá, ʻi heʻene ʻalu atu ʻi he veilí. Ne mau monūʻia ke maʻu ʻene fānau ʻe tokotaha ʻoku kei moʻui mei ha mali kimuʻa he telefoní ke fakahoko ʻene ʻofa ki heʻene tamaí. Ne mālōlō ʻa Piea ʻi he nonga.
Hili ha ngaahi uike ne maʻu ʻi he tafaʻaki hono faʻitoká ha ngaahi lea ʻo e fakafiemālie mei he Mōsaia 2:41: “Mou fakakaukau ki he tuʻunga monūʻia mo fakafiefia ʻo kinautolu ʻoku tauhi ʻa e ngaahi fekau ʻa e ʻotuá. He vakai, … kapau te nau kātaki ʻi he tui faivelenga ʻo aʻu ki he ngataʻangá ʻe maʻu hake ʻa kinautolu ki he langí koeʻuhí ke nau nofo mo e ʻOtuá ʻi he tuʻunga fiefia ʻoku ʻikai hano ngataʻanga.” (tānaki atu hono fakamamafaʻí).
Ne u fakakaukau maʻu pē mo Piea ko e kapau ʻi he folofola ko iá ʻe hoko ia ko ha taimi kiate kimaua. Naʻá ma ʻilo ʻi heʻema tauhi ʻema ngaahi fuakavá, te ma toe fakataha—ko ha fehuʻi pē ʻo taimí. ʻOkú ma falala ki he palani ʻa e ʻEiki ki he fāmili taʻengatá mo e moʻui taʻengatá. Ko e mālohi ʻo e taimí ʻokú ne ʻai ke ma laka ki muʻá.
Kuó Ne Toe Tuʻu, tā ʻe Del Parson