Kau Palōfita ʻo e Fuakava Motuʻá
Samuela
“ʻOku hoko maʻu pē ko ha fakalotolahi kiate au ʻa e aʻusia ʻa e kiʻi tamasiʻi ko Samuelá ʻi heʻene tali ki he ui ʻa e ʻEikí.” —Palesiteni Thomas S. Monson1
Naʻe paʻa ʻeku faʻē ko Hená peá ne lotu ʻi he temipalé ki ha foha mo fuakava ke foaki ia ki he ʻEikí. Naʻe tali ʻe he ʻOtuá ʻene ngaahi lotú; naʻá ne fāʻeleʻi au. ʻI heʻeku kei siʻí, naʻá ne ʻomi au ki he temipalé ke tauhi kiate Ia. Ne tokangaʻi mo akoʻi au ai ʻe he taulaʻeiki ko ʻĪlaí.2
ʻI heʻeku kei siʻí, ne u fanongo ki hono ui hoku hingoá ʻi he pō ʻe taha. Ne tuʻo tolu ʻeku ʻalu kia ʻĪlai, ka naʻe teʻeki ke ne ui au. Naʻá ne pehē ko e ʻEikí ʻokú Ne ui aú. Naʻá ku muimui ʻi he faleʻi ʻa ʻĪlaí ʻi heʻeku toe fanongo ki hono ui hoku hingoá ko hono tuʻu faá pea tali ʻo pehē, “Ke ke folofola mai; he ʻoku ongoʻi ʻe [hoʻo] tamaioʻeikí.”3 Naʻe folofola mai e ʻEikí kiate au, pea ʻi heʻeku tupu haké, naʻá Ne ʻiate au. Naʻá ne ui au ke hoko ko ʻEne palōfita.
ʻI heʻeku toulekeleká, ne u fili hoku ngaahi fohá ke fakamaau ʻi ʻIsileli. Naʻe taʻe-māʻoniʻoni hoku ngaahi fohá ko ia ne kole ʻe he kaumātuʻa ʻo ʻIsilelí ke fokotuʻu ha tuʻi. Ne u fakatokanga ange ki he kakai e ngaahi fakatuʻutāmaki ʻo ha tuʻí, ka nau vili taʻeʻunua pē ʻi heʻenau kolé. Naʻe fekauʻi au ʻe he ʻEikí ʻoku totonu ke u “tokanga ki honau leʻó.”4
Naʻe ʻomai he ʻEikí ʻa Saula—“ko ha tangata talavou lelei”5—peá u fakanofo ia ko e “ʻeiki ki [he] kakai ʻo ʻIsilelí.”6 Naʻá ne hoko ko honau tuʻi. Neongo iá, ʻi hono fekauʻi ʻe he ʻEikí kia Saula ke fakaʻauha e kau ʻAmalekaí mo e meʻa kotoa pē naʻa nau maʻú, naʻá ne talangataʻa. Naʻá ne tauhi ʻa e fanga monumanu ʻa e kau ʻAmalekaí mo foaki ia ko e feilaulau. Ne u akoʻi ʻa Saula “ʻoku lelei lahi ʻa e talangofuá ʻi he feilaulaú, pea ko e fakafanongó ʻi he ngako ʻo e fanga sipi tangatá.”7
Koeʻuhí ko e talangataʻa ʻa Saulá, naʻe fekauʻi au ʻe he ʻEikí ke fili ha tuʻi foʻou mei he ngaahi foha ʻo Sesé. Naʻe ʻomi kiate au ʻe Sese ʻa hono ngaahi foha ʻe toko fitu lahi tahá, ka naʻe ʻikai fili kinautolu ʻe he ʻEikí.8 Naʻe fakahā mai ʻe he ʻEikí ko e foha siʻisiʻi tahá, ʻa Tēvita ʻoku totonu ke tuʻí. ʻI he fōtungá pe ko e lahí, mahalo ne hangē ange e ngaahi taʻokete ʻo Tēvitá ko ha ngaahi tuʻi ʻi he kahaʻú, ka naʻe fili ʻe he ʻEikí e tauhisipi kei talavoú ni ke tataki Hono kakaí. Ne u ako mei he aʻusia ko ʻení, “ʻoku ʻikai mamata ʻa [e ʻEikí] ʻo hangē ko e mamata ʻa e tangatá; he ʻoku sio ʻa e tangatá ki he anga ʻoku hā ʻi tuʻá, ka ʻoku ʻafioʻi ʻe [he ʻEikí] ʻa e loto.”9
Hā ʻa e ʻOtuá ʻi ha Mata Meʻa-Hā-Mai he Poʻulí ki he Tamasiʻi Palōfita ko Samuelá, tā ʻe Harry Anderson; Fakaʻamu e Kau ʻIsilelí ki ha Tuʻi, tā ʻe Paul Mann; konga naʻe toʻo mei he Samuel Instructing Saul, tā ʻe Ted Henninger; faitā ʻo e scroll ʻe forplayday/iStockphoto/ThinkStock