Ko Hono Vahevahe ‘o e Ongoongoleleí ʻi he ʻInitanetí
ʻOku nofo ʻa e taha naʻá ne faʻú he Loto Kolo Manilá, ʻOtu Filipainí.
Naʻá ku ʻiloʻi e meʻa ne u tui ki aí, ka naʻá ku manavasiʻi ʻi he feinga ke tali e ngaahi fehuʻi kotoa pē ʻeku timi tipeití ʻo kau ki he Siasí.
Ne ʻikai ke u loto-toʻa maʻu pē ʻi hono vahevahe ʻo e ongoongoleleí mo hoku kaungāmeʻá. Ko e tokolahi ʻo kinautolu ʻoku nau ʻiloʻi ʻeku tui fakalotú, ka ne ʻikai ke u teitei fai ha meʻa lahi ange ke vahevahe ʻeku fakamoʻoní. Ka neongo iá, kapau ne maʻu hala ha taha ki he Siasí, ʻoku ou feinga hoku lelei tahá ke fakatonutonu ia.
ʻI heʻeku kamata he ʻunivēsití, ne u kau ki he sosaieti tipeití. Ne ʻilo ʻe he kau mēmipa kehé ʻoku ou kau ki he Siasí ʻi heʻeku fakatonutonu ʻenau fakamatala kau ki he Māmongá hili ha tipeiti. Kuo teʻeki ke u teitei talanoa kau ki heʻeku tui fakalotú ki muʻa, ko ia naʻe lahi ha ngaahi fehuʻi he ʻaho ko iá. Ne u ongoʻi manavasiʻi pea ne u meimei fakaʻehiʻehi mei hano tali. Naʻá ku ʻiloʻi e meʻa ʻoku ou tui ki aí, ka naʻe ʻikai ke u ʻilo pe ʻe vahevahe fēfē ia. Ne u lotu ka naʻe hangē ne ʻikai maʻu ha talí.
Hili ha ngaahi ʻaho siʻi mei ai, lolotonga ʻeku ʻi he Facebook, naʻá ku sio ki ha fakamatala mei he LDS.org naʻe fai ʻe heʻeku taki faka-Siasí. Ne u fakatokangaʻi te u lava foki ʻo vahevahe ai ha ngaahi meʻa mei he Siasí. Ne u kumi e ngaahi tefito ʻo e fehuʻi ʻeku timi tepeití, vahevahe ha fakafehokotakiʻanga (link) ʻi heʻeku pēsí, pea fakaʻilongaʻi (tag) ki ai ʻa kinautolu ʻoku kaunga ki aí. Ne u ongoʻi te nau fiemālie ange ʻi he ngaahi talí.
Kuo teʻeki ke u vahevahe he ʻinitanetí ha fakamatala kau ki heʻeku tuí, ko ia naʻe fakatupu heni ha fifili lahi ange ha kakai ʻo fehuʻi kau ki heʻeku tui fakalotú. ʻI heʻenau fehuʻí, ʻoku ou feinga ke fai e tali faingofua tahá pehē ki he fakafehokotaki ki he ngaahi nāunau ʻa e Siasí. ʻI he founga ko ʻení, ʻoku ʻikai fakafalala pē e kakaí ki heʻeku talí ka ke falala foki ki he lea ʻa e Kau Taki Maʻolungá kau ki heʻenau ngaahi fehuʻí. ʻI he taimi ne fakaʻau ke pelepelengesi ai e talanoá, ʻoku ou tali fakatāutaha ia ʻaki ha pōpoaki fakaʻilekitulōnika.
ʻOku ou fiefia lahi ʻoku ʻomi ʻe he Siasí ha ngaahi nāunau ʻi he ʻinitanetí. ʻOku ou kei ongoʻi ilifia pē ʻi hano fakaʻohovaleʻi au ʻe ha taha ʻaki ha fehuʻi kau ki he Siasí. ʻOku ʻikai ke u toe tatali ʻeni ki heʻenau fehuʻí; ʻoku ou vahevahe he ʻInitanetí e ngaahi nāunau ʻa e Siasí. ʻOku ou ʻilo ʻe lava ke tokoniʻi ʻe he ngaahi nāunau ko ʻení hoku kaungāmeʻa Siasi mo taʻe siasí fakatouʻosi.